الەمدىك ەكونوميكادا كاپيتالدى «كولەڭكەدەن» شىعارۋ اسا وزەكتى ماسەلە بولىپ تابىلادى. وسى ماقساتپەن كوپتەگەن ەلدەردە مۇلىكتى جاريا ەتۋ شارالارى جۇرگىزىلەدى. ەلىمىزدە ءۇشىنشى رەت وتكىزىلىپ وتىرعان اتالمىش شارانىڭ ەلورداداعى بارىسىن استانا قالاسى بويىنشا مەملەكەتتىك كىرىستەر دەپارتامەنتىنىڭ ءباسپاسوز حاتشىسى اينارا جۇگىنىسوۆادان بىلگەن ەدىك.
− ەلوردادا مۇلىكتى جاريا ەتۋ شاراسى قالاي وتكىزىلىپ جاتىر؟ زاڭداستىرۋ ناۋقانىنداعى استانالىقتاردىڭ بەلسەندىلىگى قانداي?
− استانا تۇرعىندارى مۇلىكتى جاريا ەتۋدە ايتارلىقتاي بەلسەندى. 2015 جىلدىڭ 27 ساۋىرىندەگى كورسەتكىش بويىنشا ازاماتتاردىڭ 1978 ءوتىنىشى قاناعاتتاندىرىلدى. زاڭداستىرىلعان مۇلىك قۇنى – 8 ميلليارد 699 مىڭ 676 تەڭگە.
− بۇگىنگە دەيىن جەرگىلىكتى اتقارۋ ورگاندارىنا ەل اۋماعىنداعى جانە قازاقستان ازاماتتارىنىڭ شەت مەملەكەتتەردەگى مۇلكىن زاڭداستىرۋعا قانشا ءوتىنىش ءتۇستى؟
− اعىمداعى جىلدىڭ 27 ساۋىرىنە دەيىن ەل اۋماعىنداعى تۇرعان مۇلىكتى زاڭداستىرۋعا جەرگىلىكتى اتقارۋ ورگاندارىنا قۇنى 33 129 712 تەڭگەنىڭ 2 539 تۇرعىن ءۇي نىسانى, قۇنى 16 392 025 تەڭگە بولاتىن
2 833 تۇرعىن ءۇي ەمەس نىسان, سونىمەن قاتار 12 282 668 تەڭگەنىڭ 317 كوممەرتسيالىق نىسانى زاڭداستىرىلدى. سونداي-اق, 5 زاڭدى تۇلعانىڭ 457 949 تەڭگەلىك ۇلەسى دە جاريا ەتىلدى. بۇگىنگى تاڭدا قازاقستان رەسپۋبليكاسىنان بولەك شەت مەملەكەتتەردەگى مۇلىكتەردى جاريا ەتۋگە ءبىر دە ءبىر ءوتىنىش تۇسپەدى.
− مۇلىكتى جاريالاعاننان كەيىن قۇقىق قورعاۋ, سالىق جانە باسقا دا ورگاندارمەن ارادا ماسەلەلەر تۋىنداماي ما؟ مۇلكىن جاريا ەتكەندەردىڭ ۇستىنەن قىلمىستىق جانە اكىمشىلىك ىستەردىڭ قوزعالماۋىنا قانداي كەپىلدىك بار؟
− «قازاقستان رەسپۋبليكاسى ازاماتتارىنا, ورالماندارعا جانە قازاقستاندا تۇرۋعا ىقتيارحاتى بار ادامدارعا ولاردىڭ مۇلىكتى جاريا ەتۋىنە بايلانىستى راقىمشىلىق جاساۋ تۋرالى» زاڭنىڭ 13-بابىندا مۇنىڭ بارلىعى قاراستىرىلعان. زاڭدا جاريا ەتۋدى جۇرگىزۋ بارىسىندا الىنعان مالىمەتتەر نەگىزىندە ناقتى ءبىر سۋبەكتىگە جاريا ەتىلگەن مۇلىكتىڭ شەگىندە قىلمىستىق قۋدالاۋ, اكىمشىلىك جانە تارتىپتىك جاۋاپكەرشىلىككە تارتۋ شارالارى قولدانىلمايتىنىنا كەپىلدىك بەرىلگەن. سوندىقتان, مۇلىكتى جاريا ەتۋدەن قورقۋدىڭ قاجەتى جوق.
مۇلىكتى زاڭداستىرۋ جونىندەگى قۇجاتتاردى قابىلداۋ ءالى دە جالعاسۋدا. جالپى, زاڭداستىرۋ ءۇشىن قۇجاتتار قابىلداۋ اعىمداعى جىلدىڭ قاراشا ايىنا دەيىن جۇرگىزىلەدى.
گۇلنار جۇپاربەك
