كەشە بارشا جۇرتشىلىق اسىعا توسىپ جۇرگەن مەملەكەتتىك ءبىلىم گرانتىنا يە بولعان تالاپكەرلەردىڭ ءتىزىمى جاريالاندى. مەملەكەتتىك ءبىلىم گرانتتارىنىڭ يەلەرىن انىقتايتىن كوميسسيا بولگەن 31 702 گرانت يەگەرلەرى انىقتالدى.
ونىڭ ىشىندە 2 950 ورىن جوعارى وقۋ ورىندارىنىڭ دايىندىق بولىمدەرىندە وقۋعا, 28 752 گرانت ءبىرىنشى كۋرسقا قابىلداۋعا قاراستىرىلعان.
سوڭعى جىلدارى ەلىمىزدە يندۋستريالىق-يننوۆاتسيالىق دامۋ باعدارلاماسى جۇيەلى دامىپ كەلەدى. بيىلعى مەملەكەتتىك گرانتتىڭ كوپ بولىگى دە وسى ماقساتتى جۇزەگە اسىرۋعا باعىتتالعان. سوندىقتان دا 12 593 گرانت تەحنيكالىق جانە تەحنولوگيالىق ماماندىقتارعا بولىنگەن. سونىمەن بىرگە, 5 000 گرانت – پەداگوگيكالىق, 2 690 گرانت – اۋىل شارۋاشىلىعى مەن ۆەتەريناريا جانە 3 000 گرانت مەديتسينالىق ماماندىقتاردى قامتىعان.
قر ءبىلىم جانە عىلىم مينيسترلىگىنىڭ مالىمەتىنشە, كونكۋرستىق نەگىزدە مەملەكەتتىك تاپسىرىس بەرىلەتىن جوعارى وقۋ ورىندارىنىڭ ءتىزىمى ناقتىلاندى. ەلىمىزدىڭ 112 ازاماتتىق جوعارى وقۋ ورىنى اراسىندا وقۋ گرانتتارى 87 جوعارى وقۋ ورىندارىنا ءبولىندى. وتكەن جىلى 64 وقۋ ورنى عانا قامتىلعان ەدى.
بيىلعى وقۋ گرانتتارىن الۋ كونكۋرسىنا 59 677 تالاپكەر قاتىسۋدا, ولاردىڭ ىشىندە 47 342-ءسى – قازاق تىلىندە ءبىلىم الۋعا (80 پايىزعا جۋىعى), 12 335 تۇلەك ورىس تىلىندە وقۋعا تاپسىرعان.
ءبىلىم باسەكەسىنە قاتىسقاندار اراسىندا 2 208 «التىن بەلگى» يەگەرى, 303 كوللەدج تۇلەگى, 169 حالىقارالىق جانە رەسپۋبليكالىق وليمپيادالاردىڭ جۇلدەگەرى, 854 حالىقارالىق جانە رەسپۋبليكالىق عىلىمي جارىستاردىڭ جەڭىمپازى, 948 ءتۇرلى سپورتتىق سايىستاردىڭ جۇيرىكتەرى مەن 9 پرەزيدەنتتىك وليمپيادانىڭ جەڭىمپازى بار. ولار گرانتتى الۋدا باسىمدىققا يە بولدى.
سونداي-اق, كونكۋرسقا ءى, ءىى توپ مۇگەدەكتىگى بار 363 ادام, قازاقستان رەسپۋبليكاسىنىڭ ازاماتتىعى جوق قازاق ۇلتى وكىلدەرىنەن 1 053 ادام جانە 492 اتا-اناسىنىڭ قامقورلىعىنان ايىرىلعان بالالار مەن جەتىم بالالار قاتىسۋدا. بۇل تالاپكەرلەرگە كۆوتالار بەلگىلەنگەن.
ازامات ەسەنجول
