ەلوردامىزدا جاز ماۋسىمىندا ۆەلوسيپەدپەن جۇرەتىندەر كوپ.
كەپتەلىستەگى كۇن قىزدىرعان كولىك ىشىندە وتىرعاندا جانىمىزدان ءجۇزىن سامالعا ءوپتىرىپ, ۆەلوسيپەدشى زۋىلداپ وتسە, قىزىعىپ قارايتىنىمىز دا وتىرىك ەمەس.
ءيا, جۇرت كولىكتىڭ نەشە ءتۇرى, پويىز, ءتىپتى, ۇشاق شىقسا دا, ءبارىبىر, ۆەلوسيپەدتەن باس تارتپايدى ەكەن. ەكى اياققا – كۇش, قان اينالىمىن جاقسارتىپ, بويعا قۋات بىتىرەتىن, دىتتەگەن جەرىڭە دە جەتۋگە مۇمكىندىك تۋدىراتىن بۇل «تەمىر تۇلپاردى» استانالىقتار دا تەرىس كورمەيدى.
وتكەن جىلى استانا اكىمدىگى, «سامۇرىق قازىنا» ۇاق, قر سپورت جانە دەنە شىنىقتىرۋ جونىندەگى اگەنتتىگى اراسىندا ۆەلوسيپەد جولى ينفراقۇرىلىمىن دامىتۋ تۋرالى مەموراندۋمعا قول قويىلعان.
كەلىسىمگە سايكەس, استانادا ۆەلوسيپەدتى جالعا بەرەتىن اۆتوماتتاندىرىلعان پۋنكتتەر اشىلىپ, ىسكە قوسىلا باستاعان ەدى.
سونىڭ ناتيجەسىندە مىڭداعان ادام ارنايى كارتوچكا اشتىرىپ, قالا ىشىندە ۆەلوسيپەدپەن ءجۇرۋدى ادەتىنە اينالدىرعان ەكەن. بۇل قالاداعى كولىك قوزعالىسىنىڭ ازايىپ, ەكولوگيانىڭ تازا ساقتالۋىنا از دا بولسا ىقپالىن تيگىزەتىن جاڭا باستامانىڭ حالىق تاراپىنان قولداۋ تاپقانىنىڭ ناقتى دالەلى ەدى.
جوسپار بويىنشا, 2015 جىلى 200 جاڭا ۆەلوسيپەد ساتىپ الۋ, قالانىڭ سول جاعالاۋىنىڭ ورتالىعىنان 40 ۆەلوپارك اشۋ كوزدەلگەنى بەلگىلى. قازىرگى كۇنى, بەلگىلى بولعانداي, وڭ جاعالاۋدان دا 110 ۆەلوتۇراق اشۋ ماقسات ەتىلۋدە ەكەن. تيىسىنشە تاعى 1000 ۆەلوسيپەد الۋ قاجەتتىگى تۋىپ وتىر.
سوندا قالامىزدا ۇزىن-سانى 160-قا تارتا ۆەلوسيپەدتى جالعا الاتىن اۆتوماتتاندىرىلعان پارك بولماق. ولاردىڭ اربىرىنە سۇرانىسقا قاراي 8-10 ۆەلوسيپەد قويىلادى.
«Astana bike» بەرگەن مالىمەتكە سۇيەنسەك, بيىل ۆەلوسيپەدپەن جۇرۋگە كوپشىلىكتىڭ قۇلشىنىسى ارتا ءتۇسىپتى. ازاماتتار قازىردىڭ وزىندە «مەگا», «حان شاتىر», «ازيا پارك», تاعى باسقا ورىندارداعى وپەراتورلار ارقىلى وزدەرىنە كارتوچكا اشتىرىپ الۋدا. كارتوچكاعا اقشا اۋدارىپ وتىرۋ ارقىلى, اۆتوماتتاندىرىلعان ۆەلوسيپەد پاركتەرىنەن «شايتان اربالاردىڭ» بىرەۋىن الىپ قولدانا الادى. بۇل قىزمەتتى العاش تۇتىنىپ وتىرعان ادامعا ءبىرىنشى جارتى ساعات سىيلىق رەتىندە تارتىلادى ەكەن. ودان ءارى ءاربىر ساعات سايىن شوتىنداعى 100 تەڭگە تولەم رەتىندە الىنادى.
«Astana bike» قىزمەتكەرلەرىنىڭ ايتۋىنشا, پاركتەردەگى ۆەلوسيپەدتەردى ۆانداليزمنەن, ۇرى-قارىنىڭ تەرىس نيەتتى ارەكەتتەرىنەن ساقتاۋ ءۇشىن بارلىق قاۋىپسىزدىك شارالارى قاراستىرىلعان. ول ءۇشىن ارنايى كومپيۋتەرلىك جۇيە جۇمىس ىستەيدى.
سونىمەن, قازىردىڭ وزىندە ەلورداداعى وپەراتورلاردان جۇزدەن استام ادام كەلىپ, كارتوچكا اشتىرىپ ۇلگەرىپتى.
اتالمىش قىزمەت ءتۇرىن پايدالانۋشىلارعا كارتوچكامەن بىرگە ارنايى جول قاۋىپسىزدىگى ەرەجەلەرى مەن نۇسقاۋلىعى كورسەتىلگەن «ۆەلوسيپەدشى جادىناماسى» كىتاپشاسى بەرىلەدى.
14 جاستان اسقان كەز كەلگەن ازامات قاۋىپسىزدىك ەرەجەسىمەن تانىسا وتىرىپ, قالاداعى جالعا بەرىلەتىن ۆەلوسيپەدتى تۇتىنا الادى.
P.S.
قولدانىستاعى «جول قاۋىپسىزدىگى» ەرەجەسى بويىنشا, ۆەلوسيپەدشى جولدا جۇرگەندە جاياۋلار قاتارىنا جاتقىزىلادى. ايتالىق, ولار باعدارشامنان, جاياۋ جۇرگىنشىلەر وتپەسىنەن ۆەلوسيپەدىن سۇيرەپ جاياۋ وتۋگە ءتيىستى. الايدا, جاياۋلارمەن قاتار ۆەلوسيپەدشىلەرگە تروتۋارمەن جۇرۋگە تىيىم سالىنعان.
وسىنداعى ءبىر كىلتيپاندى جويۋ ءۇشىن قازىر استانا اكىمدىگى جۇمىس ىستەپ جاتىر. استانا قالاسىنىڭ 2030 جىلعا دەيىنگى باس جوسپارىنا سايكەس, قالادا ۇزىندىعى 206,5 كيلومەترگە دەيىن جەتەتىن ۆەلوسيپەد جولدارى سالىناتىن بولادى.
ءنازيرا سايلاۋقىزى
