قازاقستان رەسپۋبليكاسى پرەزيدەنتىنىڭ جۇلدەسى ءۇشىن قازاق كۇرەسىنەن وتەتىن «قازاقستان بارىسى» رەسپۋبليكالىق تۋرنيرىندە ەلوردا نامىسىن قورعايتىن بالۋانداردى ىرىكتەيتىن «استانا قىرانى» جارىسى ءوتتى. بيىل بەسىنشى رەت ۇيىمداستىرىلاتىن بايراقتى باسەكەدە استانا اتىنان كۇرەسكە شىعۋ ءۇشىن 23 بالۋان سىنعا ءتۇستى.
«قازاقستان» سپورت سارايىنىڭ باستى الاڭىندا توسەلگەن بوز كىلەمدە كۇنى بويى بەلدەسكەن بالۋانداردىڭ شەبەرلىگىن كورۋگە جينالعان جانكۇيەر قاۋىمنىڭ دا قاراسى از بولعان جوق. جارىس الدىندا قر مادەنيەت جانە سپورت مينيسترلىگى سپورت كوميتەتىنىڭ توراعاسى ەلسيار قاناعاتوۆ ەلوردانىڭ اتىنان ەلباسى جۇلدەسى ءۇشىن الامان سايىسقا ەڭ مىقتى بالۋاندار عانا قاتىسا الاتىنىن, وسى ورايدا كۇرەسكە شىعاتىن استانالىق بالۋانداردىڭ بارىنە ساتتىلىك تىلەدى.
باس تورەشى قازاقستاننىڭ ەڭبەك سىڭىرگەن جاتتىقتىرۋشىسى عالىم كۇلەكەشەۆ جارىس رەگلامەنتىن جاريالاعاننان كەيىن ءاپايتوس جىگىتتەردىڭ ايقاستارى باستالىپ كەتتى. ەكى توپقا بولىنگەن بالۋاندار اراسىندا قازاق كۇرەسىنەن قازاقستاننىڭ ەڭبەك سىڭىرگەن سپورت شەبەرى, دزيۋدو, سامبو كۇرەستەرىنەن بىرنەشە حالىقارالىق دارەجەدەگى سپورت شەبەرلەرى بولدى. ءبىراز جانكۇيەرلەر «اتتەڭ-اي, وسى جارىستىڭ فينالىندا كەزدەسۋى مۇمكىن عاني سەيدىلداەۆ پەن ارمان ابەۋوۆ ءبىر جاققا ءتۇسىپ قالعان ەكەن, ەندى ەكەۋىنىڭ ءبىرى فينالعا جەتپەي قالاتىن بولدى عوي» دەپ توپشىلاپ تا جاتتى. الايدا, سول ءۇمىت ارتقان ارمان بالۋان ەكىنشى بەلدەسۋىندە ايبار ابدۋللوۆقا ەسە جىبەرىپ قويدى. ال قازاق كۇرەسىنەن الەمنىڭ بىرنەشە دۇركىن چەمپيونى, «استانا باتىرى» جەكپە-جەك سپورت كلۋبىنىڭ وكىلى عاني سەيدىلداەۆ كۇرەسكەن سايىن شيرىعىپ, ءار قارسىلاسىن ايقىن باسىمدىقپەن ۇتا بەردى. ءسويتىپ, ءبىرىنشى توپتان توپ جارىپ فينالعا ءوتتى. ەكىنشى توپتان وسى مەكەمەنىڭ اتىنان شىققان ايبات سەيتەن اقتىق سىنعا دەيىن القىنباي جەتتى. وسىلايشا «استانا باتىرى» جەكپە-جەك كۇرەس كلۋبى» مكقك (ديرەكتورى ا.ابدراحمانوۆ) بالۋاندارى «استانا قىرانى» اتاعى ءۇشىن كۇرەسىپ, بۇل بەلدەسۋدە تالاي جارىستاردا توپ جارعان «جاۋجۇرەك» بالۋان عاني سەيدىلداەۆ جەڭىسكە جەتتى. ال ايبات سەيتەن كۇمىس مەدال جانە جەڭىمپازبەن بىرگە «قازاقستان بارىسى» رەسپۋبليكالىق تۋرنيرىندە ەلوردا نامىسىن قورعايتىن بولدى. ءۇشىنشى ورىن ءۇشىن كۇرەستە №7 وربجسم بالۋانى ايتۋار ابدۋلوۆتىڭ جولى بولدى.
«استانا قىرانى» ىرىكتەۋ جارىسىنىڭ جۇلدەگەرلەرىن استانا قالاسى تۋريزم, دەنە تاربيەسى جانە سپورت باسقارماسىنىڭ باسشىسى بەرىك مارجىقپاەۆ قۇتتىقتاپ, ديپلومدار, مەدالدار جانە باعالى سىيلىقتار تابىس ەتتى. سونىمەن, «قازاقستان بارىسى» رەسپۋبليكالىق تۋرنيرىندە ەلوردامىز استانانىڭ نامىسىن ع.سەيدىلداەۆ پەن ا.سەيتەن قورعايتىن بولدى. ال, بۇل الامان ايقاس 5 شىلدە كۇنى «سارىارقا» ۆەلوترەك كەشەنىندە وتەتىن بولادى.
