كوكتەم ىزگىلىگىن تانىتاتىن اكتسيا
7 ساۋىردە م.وتەمىسۇلى اتىنداعى وقۋشىلار سارايىندا ۇلى وتان سوعىسىنداعى جەڭىستىڭ 70 جىلدىعىنا ارنالعان «كوكتەمنىڭ ىزگى كۇندەرى – 2015» اتتى ءداستۇرلى پاتريوتتىق اكتسيا وتەدى.
اكتسيا وقۋشىلار سارايىنىڭ فويەسىندە «دالالىق پوشتا» – «ارداگەرگە جازىلعان حاتتار» اتتى شارادان باستالادى. بۇل ارقىلى وقۋشىلار ارداگەرلەرگە وزدەرىنىڭ نيەت-تىلەكتەرىن جەتكىزبەك.
سونىمەن قاتار, فويەدە سوعىس جىلدارىنا ارنالعان فوتوكورمە اشىلادى, وندا سوقتالاڭ جىلداردىڭ كورىنىسى رەتىندە ەسكى فوتوسۋرەتتەردى عانا ەمەس, سول ۋاقىتتا پايدالانىلعان زاتتاردى دا (ەسكى فوتواپپارات, پاتەفون, ەسكى فوتوالبومدار) تاماشالاۋعا بولادى.
«زامانداس» جاستار حالىق تەاترىنىڭ شاكىرتتەرى اكتسياعا قاتىسۋشىلاردى سۋرەتكە تۇسىرەدى.
اكتسيا اياسىندا وقۋشىلار سارايى جانىنان مايدان بريگادالارى قۇرىلادى, وعان ەلوردانىڭ ءۇش اۋدانىنداعى مەكتەپ وقۋشىلارى تارتىلادى.
شارا بارىسىندا وقۋشىلار ارنايى بەزەندىرىلگەن شاعىن اۆتوبۋسپەن ارداگەرلەردىڭ ۇيىنە بارىپ, «دالالىق پوشتاعا» جينالعان وقۋشىلاردىڭ حاتتارىن تاراتادى.