ينتەرناتسيونالنىي تۇرعىن الابىنىڭ ءبىر توپ تۇرعىندارى اتىنان استانا قالالىق ءماسليحاتىنىڭ دەپۋتاتى توكەن ەگىنباەۆقا وسى اۋداندا «ارمانداستار» اۋلالىق ورتالىعىنىڭ اشىلۋىنا قوسقان زور ۇلەسى ءۇشىن شىنايى ريزاشىلىق بىلدىرەمىز.
قالالىق ءماسليحاتتىڭ دەپۋتاتى, «قۇلاگەر» قۇرىلىس كورپوراتسياسىنىڭ باسقارما توراعاسى ت.ەگىنباەۆ ءبىزدىڭ ەلدى مەكەندەگى «ەسكەندىر» تۇرعىن ءۇي كەشەنى تۇرعىندارىنىڭ ءوتىنىشى بويىنشا اۋلالىق كلۋب اشۋعا سەبەپكەر بولدى. وسى ماڭدا تۇراتىن ۇلكەن كىسىلەر مۇنداعى جاسوسپىرىمدەر مەن بالالاردىڭ بوس ۋاقىتتارىن وتكىزەتىن ورىننىڭ جوقتىعىن ايتىپ, حالىق قالاۋلىسىنا بىرنەشە مارتە ءوتىنىش بىلدىرگەن بولاتىن. بۇل ۇسىنىس قالالىق اكىمدىك تاراپىنان قولداۋ تاۋىپ, ەلوردالىق جاستار ساياساتى ماسەلەلەرى باسقارماسىنىڭ ارالاسۋىمەن توكەن جىلقايدارۇلى تۇرعىن ءۇيدىڭ 400 شارشى مەتر جەرتولەسىنە كۇردەلى جوندەۋ جاساپ, جارىعى مەن جىلۋىن وتكىزىپ بەردى. كەيىن اۋلالىق ورتالىققا قاجەتتى قۇرال-جابدىقتاردى ساتىپ الىپ, ءبىزدىڭ ءوتىنىشىمىزدى اياقسىز قالدىرمادى.
بۇگىندە بۇل ورتالىقتا التىدان ون التى جاسقا دەيىنگى ءتورت جۇزگە جۋىق وقۋشى قازاقشا كۇرەس, بوكس, گرەك-ريم كۇرەسى, ەركىن كۇرەس, دزيۋدو, كاراتە سىندى سپورت تۇرلەرىمەن, ۇلتتىق جانە قازىرگى زامان بيلەرىمەن اينالىسىپ, دومبىرا, كوركەمسۋرەت, شاحمات, دويبى, توعىزقۇمالاق ۇيىرمەلەرىنە قاتىسىپ ءجۇر. مۇندا وسى ماڭدا عانا ەمەس, ءتىپتى, بۇل جەردەن سىرتقارىراق ورنالاسقان ەلدى مەكەندەردە تۇراتىن بالالار دا كەلىپ, ءتۇرلى ۇيىرمەلەرگە قاتىسىپ, سپورت تۇرلەرىمەن اينالىسۋدا.
ءبىر كەرەمەتى, ءبىزدىڭ ورتالىقتا ارداگەرلەر بۇرىشى دا جۇمىس ىستەيدى. وندا ينتەرناتسيونالنىي تۇرعىن الابىندا تۇراتىن اقساقالدار مەن زەينەت جاسىنداعى اجەلەردىڭ بوس ۋاقىتتارىن ءتيىمدى وتكىزۋگە بارلىق جاعداي جاسالعان. قانشا جىلدار بويى شەشىمىن تاپپاي كەلگەن وسى ماسەلەنى قولىنا الىپ, جاسوسپىرىمدەر تاربيەسىنە وسىلايشا ۇلەس قوسىپ, كەلەر ۇرپاق ءۇشىن وسىنداي يگىلىكتى ءىس اتقارىپ, اۋدانىمىزدا كەرەمەت ورتالىقتىڭ اشىلۋىنا ۇيىتقى بولعان دەپۋتات توكەن جىلقايدارۇلىنا وسى ماڭداعى بارلىق تۇرعىندار مەن اتا-انالار اتىنان شەكسىز ريزاشىلىعىمىزدى بىلدىرەمىز.
مايرا قورازوۆا,
ينتەرناتسيونالنىي تۇرعىن الابى ارداگەرلەر باستاۋىش ۇيىمىنىڭ ءتورايىمى
