قالالىق ءماسليحاتتىڭ زاڭدىلىق, قۇقىق ءتارتىبى جانە قوعاممەن جۇمىس جونىندەگى تۇراقتى كوميسسياسىنىڭ كەزەكتى وتىرىسىندا ەلوردا اۋماعىنداعى ميگراتسيا ماسەلەسى كەڭىنەن ءسوز بولدى.
بۇگىنگى تاڭدا استانا قالاسى ىشكى ىستەر دەپارتامەنتىنىڭ كوشى-قون پوليتسياسى باسقارماسىندا اتقارىلىپ جاتقان جۇمىستار از ەمەس. اتالمىش باسقارما باسشىسى گ.دونەنباەۆانىڭ ايتۋىنشا, سوڭعى بەس جىلدا ەلوردادا تىركەلگەن شەتەلدىك ازاماتتاردىڭ قاتارى 500 مىڭعا كوبەيىپ وتىر. ولاردىڭ باسىم بولىگى باس قالاعا سىرتتان جۇمىس ىزدەپ جانە تۇراقتى تۇرۋ ءۇشىن كەلەتىن ىشكى ميگرانتتار كورىنەدى.
– 2015 جىلدىڭ ءۇش ايىندا قالالىق كوشى-قون باسقارماسىنا 27 123 شەتەلدىك ازامات تىركەلدى. بۇل وتكەن جىلدىڭ سايكەس كەزەڭىمەن سالىستىرعاندا 29 پايىزعا كوپ. بىلتىر تىركەلگەن شەتەلدىكتەردىڭ سانى – 19 325. سونداي-اق, ۇستىمىزدەگى جىلى استاناداعى بەس حالىققا قىزمەت كورسەتۋ ورتالىعىندا كوشى-قون باسقارماسىنىڭ قىزمەتكەرلەرى 29 مىڭنان استام قازاقستان رەسپۋبليكاسىنىڭ ازاماتىن تىركەۋدەن وتكىزىپ, 2 901 ادامدى تىركەۋدەن شىعاردى, – دەدى گ.دونەنباەۆا.
تالقىلانعان ماسەلەگە وراي پىكىر بىلدىرگەن حالىق قالاۋلىلارى استانالىقتاردىڭ تۇراقتى تىركەلگەن مەكەنجايى بويىنشا ناقتى تۇرۋىن باقىلاۋدى كۇشەيتۋ كەرەكتىگىن ەسكەرتتى. سونىمەن بىرگە دەپۋتاتتار شەتەلدىك جۇمىس كۇشىن پايدالانۋ بارىسىندا جۇمىس بەرۋشىلەردى زاڭ تالاپتارىن بۇلجىتپاي ورىنداۋعا شاقىردى.
