كەشە كۇيشى دينا كوشەسىندە ورنالاسقان زەينەتكەرلەردىڭ شاعىن دەمالىس ورتالىعىندا سوعىس ارداگەرلەرى اراسىندا شاحمات پەن دويبى ءتۋرنيرى ءوتتى.
جەڭىستىڭ 70 جىلدىعىنا وراي الماتى اۋدانىنىڭ ارداگەرلەر كەڭەسى ۇيىمداستىرعان تۋرنير وليمپيادالىق جۇيە بويىنشا وتكىزىلدى.
«استاناداعى وسى سىندى 11 شاعىن دەمالىس ورتالىعىنان ىرىكتەلىپ كەلگەن ارداگەرلەر جارىسقا قاتىسقاندارىنا ءدان ريزا بولىپ, ينتەللەكتۋالدى سپورت تۇرىنەن كاسىبي دەڭگەيلەرىن تانىتىپ جاتىر. وتىز ادام – شاحمات, ال ون سەگىزى دويبى سايىسىنا قاتىسۋدا. ولاردىڭ ىشىندەگى ەڭ ۇلكەنى 95 جاستاعى قاريا ءابدىراحمان ساپاروۆ» دەيدى اۋداندىق ارداگەرلەر كەڭەسىنىڭ توراعاسى سايلاۋبەك بايبولوۆ.
ويىن قورىتىندىسى بويىنشا شاحماتتان ءبىرىنشى ورىن – ۆالەري ۆدوۆينگە, دويبىدان ساقتاي سالىمباەۆكە بۇيىردى. ال, ايەلدەر اراسىنداعى دويبى جارىسىنان كۇلپاش احمەتقاليەۆا جەڭىمپاز اتاندى.
ءمادينا جاقىپ
