نۇر-سۇلتان قالاسى ىشكى ساياسات باسقارماسى قولداۋىمەن قازاقستان رەسپۋبليكاسى تاۋەلسىزدىگىنىڭ 30 جىلدىعى اياسىندا ەلوردانىڭ مادەني كودىن قالىپتاستىرۋ ماقساتىندا «قازاقستان تاۋەلسىزدىگىنە 30 جىل: ەلوردا – مادەنيەت پەن ونەردىڭ ورداسى» اتتى دوڭگەلەك ۇستەل ۇيىمداستىرىلدى.
جوبانىڭ ماقساتى – قوعامدىق سانانى جاڭعىرتۋ جانە استانانى مادەني دامىتۋ ارقىلى ەلوردانىڭ مادەني كودىنىڭ مودەلىن قالىپتاستىرۋ, ەلوردانىڭ مادەني جانە كيەلى ورىندارىن, حالىقتىڭ مادەني تىرشىلىگىن زەرتتەۋ, استانانىڭ الەۋمەتتانۋشىلارىن, مادەنيەتتانۋشىلارىن, ساياساتتانۋشىلارى مەن مادەني قوعامداستىقتارىنىڭ ماماندارىن تارتا وتىرىپ, مادەني كود مودەلىن تالقىلاۋ.
دوڭگەلەك ۇستەل اياسىندا قالانىڭ مادەني كودىن قالىپتاستىرۋ جانە ەلوردانى ودان ءارى مادەني دامىتۋ, قالا تۇرعىنىنىڭ بەينەسىن, سونداي-اق «نۇر-سۇلتان – جايلى قالا», «نۇر-سۇلتان – سالاماتتى قالا», «نۇر-سۇلتان – بەيبىتشىلىك قالاسى» بەينەلەرىن قالىپتاستىرۋ ماسەلەلەرى تالقىلاندى. جيىنعا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ساۋىتبەك ابدراحمانوۆ, نۇر-سۇلتان قالاسىنىڭ ىشكى ساياسات باسقارماسىنىڭ باسشىسى داۋرەن بابامۇراتوۆ جانە رەسپۋبليكالىق ەتنومادەني بىرلەستىكتەردىڭ باسشىلارى مەن وكىلدەرى قاتىستى.
«ەلوردامىزداعى «دوستىق ۇيىندە» اسەرلى ءىس-شارالار جۇيەلى تۇردە ءوتىپ تۇرادى. بۇگىن سونداي شارالاردىڭ ءبىرى ءوتتى. «قازاقستان تاۋەلسىزدىگىنە 30 جىل: ەلوردا – مادەنيەت پەن ونەردىڭ ورداسى» تاقىرىبىنا ارنالعان دوڭگەلەك ۇستەلدە نۇر-سۇلتان قالاسىنىڭ مادەني كودىن قالىپتاستىرۋ, ەلوردانىڭ مادەني دەڭگەيىن كوتەرۋ, قالا تۇرعىندارىنىڭ ەستەتيكالىق تاربيەسى تۋرالى ماسەلەلەر قوزعالدى. تاريح ماسەلەلەرى ايتىلدى. بۇگىنگى تاڭدا ەلوردامىزدا مادەني ورتا قالىپتاستىرۋ, ەلوردالىقتاردىڭ قالاعا دەگەن قۇرمەتىن ارتتىرۋ ماسەلەلەرى جان-جاقتى تالقىلاندى. بۇگىنگى مادەني مەكەمەلەردىڭ مۇمكىندىگىن پايدالانۋ ماسەلەلەرى قوزعالدى. سونىمەن بىرگە, كەيىنگى كەزدە قالادا الاڭداتارلىق وقيعالاردىڭ ورىن الىپ وتىرعانى. مىسالى, جەدەل ساتىلاردا, ءۇيدىڭ كىرەبەرىستەرىندەگى جاعىمسىز جاعدايلار, كەيبىر جاستاردىڭ ءوزىن كورسەتۋ ءۇشىن وعاش قىلىقتارعا بارۋى, ولاردى الەۋمەتتىك جەلى ارقىلى باتىرسىنىپ تاراتۋى سىندى جاعدايلار ءبىزدى الاڭداتىپ وتىر. بۇلاردىڭ بارلىعى – ەلوردا جاستارى مەن تۇرعىندارىنا جاراسپايتىن مىنەزدەر. ءبىز وسى ءىس-ارەكەتكە قالاي جاۋاپ بەرۋىمىز كەرەك؟ وتىرىستا وسى ماسەلەلەر تالقىلاندى, الداعى ۋاقىتتا ناتيجەلەرىن بەرەدى دەپ سەنەمىز» دەدى ءماجىلىس دەپۋتاتى ساۋىتبەك ابدراحمانوۆ.
