ەلوردادا «تازا قازاقستان» اكتسياسىنىڭ «كيەلى مەكەن» اپتالىعى اياسىندا ەسكەرتكىشتەر مەن تاريحي عيماراتتاردى جانە اۋماعىن تازالاۋ جۇمىستارى جۇرگىزىلدى.
اكادەميك قانىش ساتباەۆتىڭ بيىك تۇعىرى استاناعا ءسان بەرىپ تۇر. «مەنىڭ حالقىم مەنەن دە بيىك» دەگەن ءسوز ماڭدايشاسىنا جازىلعان ەسكەرتكىش ماڭىنا ءماسليحات دەپۋتاتتارى, مەملەكەتتىك قىزمەتشىلەر, مادەني مەكەمە ماماندارى, جاس ساربازدار جانە ۆولونتەرلەر جينالدى. ماقسات – ەسكەرتكىش اۋماعىندا تازالاۋ جۇمىستارىن جۇرگىزۋ.
مادەنيەت باسقارماسى ۇيىمداستىرۋ ءبولىمىنىڭ باسشىسى سالتانات مۇقسيموۆانىڭ سوزىنشە, 15-21 ءساۋىر ارالىعىندا «كيەلى مەكەن» اپتالىعى اياسىندا تاريحي ورىنداردى تازالاۋ جانە جيناۋ جۇمىستارى جۇرگىزىلەدى. ق.ساتباەۆ ەسكەرتكىشىنە 100-گە جۋىق ادام كەلىپ, تازالىق اكتسياسىنا دەم بەردى.
– مۋزىكالىق جاس كورەرمەندەر تەاترىنان 20 ارىپتەسىممەن بىرگە كەلىپ, قازاق عىلىمىنىڭ نەگىزىن قالاۋشى قانىش ساتباەۆتىڭ ەسكەرتكىشىن جۋ جانە ماڭىن تازالاۋ جۇمىستارىنا اتسالىستىق. تاريحي ورىنداردى قۇرمەتتەۋدىڭ ءبىر كورىنىسى تازا ۇستاۋدان كورىنەدى. مۇنداي يگىلىكتى ىسكە جاستاردى دا تارتۋ ماڭىزدى. ءىس-شاراعا ۆولونتەرلەر مەن ساربازداردىڭ قاتىسقانى قۋانتتى, – دەدى تەاتر ديرەكتورى اسحات ماەميروۆ.
جاستار جۇرگەن جەر ەنەرگياعا تولى بولماي ما؟! اسىرەسە جاس ساربازدار ساتباەۆ ەسكەرتكىشىن بوي جەتكەن جەرىنە دەيىن جۋىپ, جاسىل جەلەكتى تىرمالاپ, ىسكە سەرپىن بەردى. حالىق قالاۋلىلارى دا تازالىق جۇمىسىنا دەم بەردى.
– دەپۋتاتتار حالىقپەن بىرگە يگىلىكتىڭ ىستەردىڭ ورتاسىندا ءجۇرۋى كەرەك. ارىپتەستەرىممەن بىرگە «كيەلى مەكەن» اپتالىعىنا ارنايى كەلدىك. بيىل 125 جىلدىق مەرەيتويى اتالىپ وتەتىن قانىش ساتباەۆ ۇلتتىق عىلىمنىڭ نەگىزىن قالاپ, دامۋىنا كۇش سالدى. قالامىزدا تاريحي تۇلعاعا لايىقتى ەسكەرتكىشتىڭ بوي كوتەرگەنى – قۇپتارلىق جايت. ەندى ەسكەرتكىشتى ءوز قالپىندا ساقتاۋ ءۇشىن تۇراقتى تازالاۋ جۇمىستارىن اتقارىپ, جاستاردىڭ بويىنا اكادەميكتىڭ تانىم-تاعىلىمىن ءسىڭىرۋ ماڭىزدى, – دەدى استانا قالاسى ءماسليحاتىنىڭ دەپۋتاتى نۇرلان وتەشەۆ.
ودان بولەك, №6 مامانداندىرىلعان ءورت ءسوندىرۋ بەكەتىنىڭ اۋماعىندا ەرلىكپەن قازا تاپقان استانالىق ءورت ءسوندىرۋشى اسقار زابيكۋلين ەسكەرتكىشى ماڭىندا قالا تۇرعىندارى تازالاۋ جۇمىستارىن جۇرگىزدى.
مادەنيەت باسقارماسىنىڭ وكىلى سالتانات مۇقسيموۆا ەسكەرتكىشتەردى جۋ جانە تازالاۋدى مامانداندىرىلعان مەكەمەلەر ارنايى تەحنيكامەن كەلىپ جۇرگىزەدى دەدى. ازىرگە اپتالىق اياسىندا تازالاۋ, جيناۋ جۇمىستارىنا ءمان بەرىلۋدە.
