ەلوردالىق سپورتشىلاردىڭ, دەنە شىنىقتىرۋ جانە سپورت باسقارماسىنىڭ, ۆەدومستۆولىق باعىنىستى ۇيىمدار قىزمەتكەرلەرىنىڭ كۇشىمەن تاعى 8 توننا گۋمانيتارلىق كومەك جينالىپ, قوستاناي وبلىسىنا جىبەرىلدى.
دەنە شىنىقتىرۋ جانە سپورت باسقارماسىنىڭ باسشىسى ۆاسيلي لەۆيت ارىپتەستەرىنە قازىرگى قيىن جاعدايدا كومەك كورسەتكەنى ءۇشىن العىسىن ءبىلدىردى.
سونداي-اق استانالىق سپورتشىلار يليا يلين, ۆاسيلي تاحتاي, سەرگەي تسىرۋلنيكوۆ, ابزال اجگاليەۆ, مەرەي اقشالوۆ, ايتىم جاقىپوۆ جانە كاراتە فەدەراتسياسىنىڭ, گيمناستيكا فەدەراتسياسىنىڭ وكىلدەرى سۋ تاسقىنىنان زارداپ شەككەندەرگە گۋمانيتارلىق كومەك كورسەتۋدە. بۇعان دەيىن Amanat پارتياسىنىڭ استانا قالالىق فيليالىنىڭ كۇشىمەن, «جاستار رۋحى» جاستار قاناتىمەن, «استانا جاستارى» جرو ەرىكتىلەرىمەن بىرلەسىپ, قالا اكىمدىگىنىڭ, قالالىق ءماسليحات دەپۋتاتتارىنىڭ, قوعام قايراتكەرلەرىنىڭ, ۇكىمەتتىك ەمەس ۇيىمداردىڭ, شاعىن, ورتا جانە ءىرى بيزنەس يەلەرىنىڭ قولداۋىمەن گۋمانيتارلىق كومەك جينالىپ, وڭىرلەرگە جولداندى.
سونىمەن قاتار ەلوردالىق قازاقستان حالقى اسسامبلەياسى دوستىق ءۇيىنىڭ بازاسىندا سۋ تاسقىنىنان زارداپ شەككەن وڭىرلەردىڭ تۇرعىندارى ءۇشىن گۋمانيتارلىق كومەك جيناۋ بويىنشا الەۋمەتتىك اكتسيا ۇيىمداستىردى. كومەك اقمولا جانە قاراعاندى وبلىستارىنىڭ تۇرعىندارىنا جەتكىزىلدى. زارداپ شەككەندەرگە كيىم, تاماق, گيگيەنا قۇرالدارى, توسەك-ورىن, ىدىس-اياق جانە ءدارى-دارمەك جينالدى.
ەستەرىڭىزگە سالا كەتەيىك, ەلوردادا گۋمانيتارلىق كومەكتى قابىلدايتىن 9 پۋنكت جۇمىس ىستەيدى, جيىنعا 30-عا جۋىق ەرىكتىلەر ۇيىمى قاتىسادى. كۇن سايىن 200-دەن استام ەرىكتى قاجەتتى زاتتاردى سۇرىپتاپ جىبەرەدى. جينالعان كومەكتىڭ ىشىندە كيىم, ازىق-تۇلىك, گيگيەنا قۇرالدارى مەن اياق كيىم – باستى قاجەتتى زاتتار. ەرىكتىلەر قارجىلاي كومەكتى قابىلدامايدى. نيەت بىلدىرۋشىلەر جيناۋ ورىندارىنا قاجەتتى زاتتاردى جيناپ, اكەلە الادى.
