استانا قالاسى اكىمدىگىنىڭ مۋزىكالىق جاس كورەرمەن تەاترىنىڭ ۇجىمى قازاق ۇلتتىق ونەر ۋنيۆەرسيتەتىنىڭ رەكتورى, قازاقستاننىڭ ەڭبەك سىڭىرگەن قايراتكەرى ازامات جىلتىركوزوۆپەن كەزدەسۋ وتكىزدى.
كەزدەسۋ بارىسىندا تەاترىمىزدىڭ ديرەكتورى اسحات ماەميروۆ پەن قازاق ۇلتتىق ونەر ۋنيۆەرسيتەتىنىڭ رەكتورى ازامات جىلتىركوزوۆ كاسىبي ساحنا مەن بەلگىلى ونەر وقۋ ورداسى اراسىندا ءبىلىم بەرۋ جانە شىعارماشىلىق ۇدەرىستى دامىتۋ باعىتىندا, بىرلەسكەن جوبالاردى ىسكە اسىرۋ جولىندا بىرقاتار كەلىسىمگە قول جەتكىزىپ, ارىپتەستىك پەن ىنتىماقتاستىقتى دامىتۋ بويىنشا مەموراندۋمعا قول قويدى.
ازامات قايراتۇلى ءدۋالدى وقىتۋ ادىسىمەن ءبىلىم الىپ بيىلعى جىلدىڭ مامىر ايىندا ۋنيۆەرسيتەتتى اياقتاعالى وتىرعان تۇلەكتەرمەن, ياعني قازىرگى تاڭدا مۋزىكالىق جاس كورەرمەن تەاترىندا ەڭبەك ەتىپ جۇرگەن جاس ارتيستەرمەن وقۋ ۇدەرىسى بويىنشا وي ءبولىسىپ, ديپلومدىق قويىلىمداردىڭ دايىندىق پروتسەسىنە قاتىسىپ, ءوز تىلەگىن جەتكىزدى.
سونىمەن بىرگە بيىل كۇزدەن باستاپ تەاتر بازاسىندا ايماقتاعى تەاتر ارتيستەرىنىڭ ءبىلىمىن ارتتىرۋ, بىلىگىن جەتىلدىرۋ, تاعىلىمدامادان ءوتۋ جونىندە ەكى تاراپ اراسىندا شىعارماشىلىق بايلانىستاردى عىلىمي-پراكتيكالىق نەگىزدە دامىتۋعا ءمان بەرۋ قاجەتتىلىگى سارالاندى.
