استانادا ءوتىپ جاتقان «ەURASIAN BOOK FAIR – 2024» حالىقارالىق كىتاپ كورمە-جارمەڭكەسى اياسىندا اقىن اقۇشتاپ باقتىگەرەەۆانىڭ «مەنىڭ فاريزام» اتتى ەستەلىك كىتابىنىڭ تانىستىرىلىمى ءوتىپ, تۇساۋى كەسىلدى.
قازاق ادەبيەتىنە وزىندىك ءۇن قوسقان قوس ارۋ فاريزا وڭعارسىنوۆا مەن اقۇشتاپ باقتىگەرەەۆانىڭ دوستىعى كوپشىلىككە ءمالىم. اقۇشتاپ اقىن بۇل كىتابىندا قازاق ايەلدەرى اراسىنان شىققان بىرەگەي قالامگەر, حالىقپەن ەتەنە ارالاسقان تانىمال تۇلعا فاريزا وڭعارسىنوۆا تۋرالى سىر شەرتەدى.
– زامانداسىم فاريزا ەكەۋمىزگە قازاق قىزىنىڭ دا ولەڭ جازا الاتىنىن دالەلدەۋگە تۋرا كەلدى. ءبىز ونى دالەلدەدىك تە. اسىرەسە, فاريزا. سەبەبى ول بۇكىل قىز عۇمىرىن, كوكتەمىن, ءومىرىن ولەڭگە ارنادى. مىنە, كىتاپتا وسى دۇنيەلەر قامتىلدى. سونداي-اق ستۋدەنتتىك كەزدەن بىرگە وتكىزگەن شاعىمىز, تالقىلانعان ويىمىز ايتىلادى. وزدەرىڭىزگە ءمالىم, فاريزا دەپۋتاتتىققا, مەن وتباسىلىق ومىرگە بەت بۇردىم. قازاق قىزدارىنىڭ قايراتكەرلىگىمەن قوسا ادامگەرشىلىگى, دوستىققا بەرىكتىگى, اقىندىق قاسيەتتەرى تۋرالى ادەمى ەستەلىك قالدىرعىم كەلدى. بۇل ەڭبەگىم فاريزا وڭعارسىنوۆانىڭ 85 جىلدىعىنا, مەنىڭ 80 جىلدىعىما ورايلاستىرىلىپ, جارىق كوردى, – دەيدى اقىن اقۇشتاپ باقتىگەرەەۆا.
كىتاپتىڭ تۇساۋكەسەرىنە بەلگىلى اقىن-جازۋشىلار, قوعام قايراتكەرلەرى, جاستار, ەلوردا تۇرعىندارى مەن قوناقتارى قاتىستى.
– اقۇشتاپ پەن فاريزا اپالارىمىزدىڭ ولەڭدەرىن ستۋدەنتتىك شاقتان جاتتاپ وستىك. كوپشىلىك اياۋلى اقىننىڭ مىنەزىن جاقسى بىلەدى. سول جايىندا كىتاپتا جاقسى جازىلعان. فاريزا اپاي اقۇشتاپ اپايعا «نە قالام ۇستا نە قازان ۇستا» دەگەن. ءومىر عوي, رۋحى مىقتى قىزدارعا ماحابباتى مىقتى ادام كەزدەسپەگەن شىعار… دەپ وڭايگۇل تۇرجان ويىمەن ءبولىستى.
قازاق پوەزياسىنىڭ پاديشاسى فاريزا وڭعارسىنوۆا جايلى ەستەلىك-ەسسە كوپشىلىك وقىرماندى جالىقتىرمايتىن تارتىمدى تىلمەن جازىلعان. تانىستىرىلىمنان سوڭ باعالى كىتاپ وقىرماندارعا جول تارتتى.
ءىس-شارا سوڭىندا اقىن, قازاقستان جازۋشىلار وداعى استانا قالاسى فيليالىنىڭ ديرەكتورى داۋلەتكەرەي كاپۇلى «فوليانت» باسپاسى مەن جينالعان قاۋىمنىڭ اتىنان اقۇشتاپ باقتىگەرەەۆاعا يىعىنا شاپان جاۋىپ, قۇرمەت كورسەتتى.
سابينا كاكىمجان
