7 مامىر كۇنى ماسكەۋ مەتروسىنىڭ زاموسكۆورەتسك جەلىسىندە قازاقستاننىڭ ۇلى جەڭىسكە قوسقان ۇلەسىن پاش ەتەتىن 12 پوستەر ورناتىلعان «حالىق جاساعى» دەپ اتالاتىن ارنايى پويىز جولعا شىقتى. جىلجىمالى ەكسپوزيتسيا قازاقستاندا جاساقتالىپ, ماسكەۋدى, سەۆاستوپولدى, لەنينگرادتى قورعاۋعا, ۋكراينانى ازات ەتۋگە قاتىسقان ديۆيزيالاردىڭ جورىق جولى, جاۋ قولىنا تۇسكەن ايماقتارداعى پارتيزان وتريادتارىنداعى قازاقستاندىقتاردىڭ ەرلىك كۇرەسى, ءبىزدىڭ ەلىمىزگە كوشىرىلگەن اسكەري ءوندىرىس كەشەندەرىنىڭ مايداندى جابدىقتاۋعا قوسقان ۇلەسى جايىندا سىر شەرتەدى.
مايدان شەبىنە كەلىپ, جاۋىنگەرلەرگە رۋحاني قولداۋ كورسەتكەن, ءوز ونەرىمەن قورشاۋداعى لەنينگراد تۇرعىندارىنا دەم بەرگەن قازاقستاندىق ارتىستەر تاقىرىبى – ءوز الدىنا ءبىر توبە. مىسالى, قازاق حالقىنىڭ ۇلى اقىنى جامبىل جاباەۆتىڭ «لەنينگرادتىق ورەندەرىم» ولەڭى!..
«حالىق جاساعى» پويىزىنىڭ پوستەرلەرىنە QR-كود قويىلعان. ۇيالى تەلەفونى بارلار سول ارقىلى كورسەتىلىممەن كەڭىنەن تانىسىپ, رەسەي فەدەراتسياسىنداعى قازاقستان رەسپۋبليكاسى ەلشىلىگى مەن «قازاقستان» تەلەراديوكورپوراتسياسى بىرىگىپ دايىنداعان ۇلى وتان سوعىسى تاقىرىبىنا ارنالعان بەينەروليكتەردى دە كورە الادى.
«حالىق جاساعى» پويىزى ۇلى وتان سوعىسى تاقىرىبىن بەينەلەيتىن 50 پوستەرمەن جابدىقتالعان. ەكسپوزيتسيانى ازىرلەۋگە, سونداي-اق رەسەي اسكەري-تاريحي قوعامىنىڭ, «ۆەچەرنيايا موسكۆا» گازەتىنىڭ, ماسكەۋ مەملەكەتتىك مۇراجايىنىڭ, ۇلى وتان سوعىسى ورتالىق مۇراجايىنىڭ قىزمەتكەرلەرى دە قاتىستى.
پويىزدى ساپارعا شىعارىپ سالۋ سالتاناتىنا رەسەي فەدەراتسياسىنداعى قازاقستان رەسپۋبليكاسى ەلشىلىگىنىڭ كىشى ەلشىسى ۆيكتور تەمىرباەۆ, ماسكەۋ مەتروسى باستىعىنىڭ ورىنباسارى ۆلاديمير پوگونين مەن ارداگەرلەر ۇيىمىنىڭ وكىلدەرى قاتىستى.
ەرەكشە سۋرەت كورمەسى قويىلعان اتاۋلى پويىز ماسكەۋ مەتروسىندا جارتى جىل بويى جۇرەدى.
تۇران ەردەش
