بۇل مەرەكە ءبىزدىڭ اۋلەت ءۇشىن دە اسا قاستەرلى سانالادى. قارا نيەتتى فاشيزممەن شايقاسقان ايتۋلى سوعىسقا اقمولا قالاسىندا تۋعان ۇلكەن اتامىز اسقار يسەنوۆ تە قاتىسىپ, ەرلىك كورسەتكەن.
اتامىز قىزىل اسكەر قاتارىنا 1939 جىلى الىنعان. وتان الدىنداعى مىندەتىن وتەپ بولىپ, ەندى ەلگە ورالامىن دەپ جۇرگەندە سوعىس باستالىپ كەتەدى. سودان ۋكراينا مايدانىنان ءبىر-اق شىعادى. دنەپر وزەنىنەن ءوتۋ ءۇشىن بولعان قيان-كەسكى ۇرىستى باسىنان كەشىرەدى. وسى وپەراتسيا بارىسىندا كورسەتكەن قايسارلىعى ءۇشىن پولك باسشىلىعىنان العىس الادى. ۇلكەن اعاتايلارىمىزدىڭ ايتقاندارىنان ەستىگەنىمىز ۇلى وتان سوعىسىنا ءبىرىنشى كۇننەن كىرىسكەن اسقار اتامىز 1945 جىلى جاپونياعا قارسى جورىققا دا قاتىسىپ, سودان كەيىن عانا ەلگە ورالعان.
سوعىستان امان-ەسەن ەلگە ورالعان اتامىز ءنازيفا اجەمىزگە جولىعىپ, ەكەۋى ءبىرىن-ءبىرى ۇناتىپ, شاڭىراق قۇرعان. اتامىز بەيبىت ءومىردىڭ ەڭبەك مايدانىندا دا جەمىستى ەڭبەك ەتكەن. اجەمىز ەكەۋى جەتى بالا تاربيەلەپ-وسىرگەن. ۇلدارىن ۇياعا, قىزدارىن قياعا قوندىرعان. بالالارىنىڭ ءبارى تاربيەلى, جوعارى ءبىلىمدى. ال سول بالالارىنان وربىگەن كوپتەگەن نەمەرەلەرى ءوسىپ قالسا, ءبىر توپ شوبەرەلەرى دە جۇگىرىپ ءجۇر. مەن دە بۇگىن ارداگەر اتامنىڭ رۋحىنا باسىمدى ءيىپ, بارلىق نەمەرە-شوبەرەلەرەلەرىنىڭ اتىنان وسى ءبىر ەستەلىگىمدى جازىپ وتىرمىن.
ءبىز جىل سايىن 9 مامىر – جەڭىس كۇنىندە ۇلى وتان سوعىسىنىڭ مايدانگەرى – اسقار اتامىزدى ەسكە الامىز. ەرلىگىنە تاعزىم ەتەمىز. ەندى ءبىزدىڭ ەلىمىزدىڭ ادامدارى ەشقانداي سوعىسقا قاتىسپاسا ەكەن دەپ تىلەيمىز. بارلىق سوعىس ارداگەرلەرىن ۇلى جەڭىستىڭ 70 جىلدىعىمەن قۇتتىقتايمىز. قازاق ەلى گۇلدەنە بەرسىن دەپ تىلەيمىز.
نۇرلان يسەنوۆ
