مەرەيلى مەرەكە قارساڭىندا قازاقستان رەسپۋبليكاسى پارلامەنتى سەناتىنىڭ دەپۋتاتى سەرىك جاقسىبەكوۆ پەن قالالىق ءماسليحاتتىڭ دەپۋتاتى ەسەنجول بەكىشەۆ دەنساۋلىقتارىنا بايلانىستى قالادا ۇيىمداستىرىلعان كەزدەسۋلەرگە قاتىسا الماعان سوعىس ارداگەرلەرىنىڭ ۇيلەرىنە بارىپ, ولاردى جەڭىستىڭ 70 جىلدىعىمەن قۇتتىقتادى.
الدىمەن س.سەيفۋللين كوشەسىندە تۇراتىن سوعىس ارداگەرى فەدور يۆانوۆيچ بەلوكونەۆتىڭ ۇيىندە بولعان حالىق قالاۋلىلارى مايدانگەردى مەرەكەمەن قۇتتىقتاپ, كىر جۋعىش ماشينا مەن ازىق-تۇلىك پاكەتىن سىيعا تارتتى.
ودان سوڭ دەپۋتاتتار ۇلى وتان سوعىسىنىڭ ارداگەرى اقان تۇرقانوۆ اقساقالدىڭ ۇيىنە كەلدى. ول كىسى قوناقتاردى كەمپىرىمەن بىرگە قارسى الدى. اقان اتا 1925 جىلى دۇنيەگە كەلگەنىن, بۋىنى بەكىمەي جاتىپ, ەڭبەككە ارالاسقانىن, ال ەل باسىنا كۇن تۋعان سول ءبىر سۇراپىل سوعىس جىلدارىندا اسكەر قاتارىنا الىنىپ, سول جەردەن سوعىسقا اتتانعانىن, مايدان دالاسىندا وتان ءۇشىن جاۋمەن بەتپە-بەت شايقاسقانىن اڭگىمەلەپ بەردى. حالىق قالاۋلىلارى بولسا, بارلىق جاستىق عۇمىرىن بۇگىنگى بەيبىت زامان ءۇشىن سارپ ەتكەن مايدانگەرگە ەڭ ىزگى تىلەكتەرىن جەتكىزدى. سوڭىنان ارداگەرگە زاماناۋي تەلەديدار مەن ازىق-تۇلىك پاكەتىن تاپسىردى.
مايدانگەرلەردىڭ قاي-قايسى بولسىن ەلباسىنىڭ بۇگىنگى تاڭدا ارداگەرلەرگە كورسەتىپ جاتقان قامقورلىقتارىنا ريزاشىلىقتارىن ءبىلدىرىپ, جاستارعا بەيبىت اسپان استىندا باقىتتى عۇمىر تىلەدى.
قارتتاردىڭ مەرەكە الدىنداعى كوڭىل-كۇيى كوتەرىڭكى. ولار دەپۋتاتتارمەن ەمەن-جارقىن اڭگىمەلەسىپ, وزدەرىنىڭ ءومىر جولدارى جايلى سىر شەرتتى.
دەپۋتات ە.بەكىشەۆتىڭ ايتۋىنشا, وكرۋگتە بارلىعى ون ءۇش سوعىس ارداگەرى بار ەكەن. مەرەكە قارساڭىندا ولاردىڭ ەكەۋىنە باعالى سىيلىقتار تاپسىرىلسا, قالعان ون ءبىر ارداگەرگە اقشالاي سىيلىقتار جانە ءجۇز شاقتى تىل ەڭبەككەرىنە ازىق-تۇلىك سالىنعان پاكەتتەر تاراتىلدى. سۇراپىل سوعىس جىلدارىندا وت پەن وقتىڭ ورتاسىندا ءجۇرىپ, ەل قورعاعان جاۋىنگەرلەر قانداي قۇرمەتكە دە لايىق.
گۇلبارشىن وكەشقىزى
