جەڭىس تۋى

1945 جىل, ءساۋىر ايى. سوعىستىڭ شەشۋشى كەزەڭى. ءفاشيزمنىڭ سوڭعى قامالى رەيحستاگ قانا قالدى. نەبارى – 300-اق مەتر!..  

مىڭداعان شاقىرىمدى كەسكىلەسكەن شايقاسپەن ءجۇرىپ وتكەن جاۋىنگەرلەر ەڭ سوڭعى قۇزعىندار ۇياسىن بۇزۋ وڭاي بولمايتىنىن جاقسى تۇسىنەدى. جان اياماي ارپالىسقان جارالى جاۋدى تىزە بۇكتىرەر اقتىق ايقاس اسقان ەرلىك پەن باتىلدىقتى تالاپ ەتەدى…
30 ءساۋىر. بەرلين.
…بۇل كۇنى ەرجۇرەك قازاق جاۋىنگەرى راقىمجان قوشقارباەۆ رەيحستاگقا ەڭ ءبىرىنشى بوپ جەڭىس تۋىن تىكتى!..
«ء…ساۋىردىڭ 30-ى كۇنگى ساعات 18 بەن 19 ارالىعىنداعى ءبىزدىڭ كوڭىل-كۇيىمىزدى سوزبەن ايتىپ جەتكىزۋ مۇمكىن ەمەس. ءوزىمىزدىڭ ءتىرى ەكەنىمىزگە, ءفاشيزمنىڭ ورداسى – رەيحستاگتىڭ ءدال وزىندە تۇرعانىمىزعا سەنەر-سەنبەسىمىزدى بىلمەدىك. قۋانىشتان كوزىمىزدەن جاس شىققانىن دا اڭعارماي قالدىق. ءبىز ول كەزدە ءالى جاس ەدىك. ۆياتكالىق گريگوري بۋلاتوۆ ون توعىزدا بولسا, مەن جيىرمادان جاڭا اسقام. سول كۇنى جەتى ساعات ىشىندە (ساعات 11-دەن 18-گە دەيىن) تاقتايداي جازىق, ەش بۇدىرسىز اسفالت ۇستىمەن جاڭبىرشا جاۋعان وق استىندا بار-جوعى 300 مەتر جەر جىلجىپپىز!..» دەپ ەسكە الادى كەيىن بۇل وقيعا جايىندا راقىمجان اعامىز.
جۋىردا سول رەيحستاگقا تىگىلگەن جەڭىس تۋىنىڭ كوشىرمەسىن قر ۇلتتىق مۇراعاتىنا سالتاناتتى تاپسىرۋ ءراسىمى ءوتتى.
قاستەرلى تۋ كىرپىك قاقپاي سىمداي تارتىلعان جاس ۇلاندار توسىندە, جەڭىس مارشىمەن جازىلا كەرىلەدى…

تۇرماعانبەت كەنجەباەۆ