كەشە ەلباسى نۇرسۇلتان نازارباەۆتىڭ قاتىسۋىمەن «وتان قورعاۋشىلار» مونۋمەنتىنە «داڭق» گۇل تىزبەگى مەن گۇل سەبەتتەرىن قويۋ ءراسىمى ءوتتى.
«وتان قورعاۋشىلار» الاڭىنىڭ الدىندا جينالعان جۇرتشىلىقتىڭ قاراسى كوپ. جەڭىستىڭ 70 جىلدىعىنا وراي وتكىزىلگەن بۇل شاراعا 10 مىڭعا جۋىق ادام قاتىستى. سونىڭ ىشىندە ەلىمىزدىڭ تۇكپىر-تۇكپىرىنەن كەلگەن سوعىس ارداگەرلەرى بار.
ارنايى اۆتوبۋستارمەن الاڭعا جەتكىزىلگەن قارتتاردى «جاس ۇلان» رەسپۋبليكالىك مەكتەبىنىڭ جەتكىنشەكتەرى كۇتىپ الىپ, ورىندارىنا جايعاستىرىپ جاتتى. اينالادا مايدان اندەرى اۋەلەپ, ءار جۇرەككە ەرلىك پەن وتانسۇيگىشتىك سەزىمىن ۇيالاتتى.
سالتاناتتى قاراۋىل كۇزەتكەن ماڭگىلىك الاۋعا گۇلشوقتارى قويىلعاننان كەيىن جينالعان قاۋىم سوعىستا قازا تاپقان ساربازداردى ءبىر مينۋتتىق ۇنسىزدىكپەن ەسكە الدى.
رەسمي راسىمنەن كەيىن مەملەكەت باسشىسى ارداگەرلەرمەن تىلدەسىپ, حال-جاعدايلارىن سۇراستى.
سالتاناتتى شارا كەزىندە پرەزيدەنت بارشا قازاقستاندىقتاردى جەڭىس كۇنىمەن قۇتتىقتادى.
– سوعىستا ميلليونداعان ادام مايدان دالاسىندا قازا تاپتى جانە سونشاسى جاراقات الدى, جاقىندارى جاپا شەكتى. ءبىز – جەڭىمپاز اكەلەردىڭ باقىتتى ۇرپاعىمىز. ەگەر ولار جەڭىسكە جەتپەگەندە, قازىر ءبىزدىڭ جاعدايىمىز قانداي بولارىن ەلەستەتۋدىڭ ءوزى قيىن. سوندىقتان ارداگەرلەرىمىز مەرەكەدە عانا ەمەس, كۇندەلىكتى ومىردە دە بارلىق قۇرمەتكە لايىق. مەن جاستاردىڭ ارداگەرلەرگە ءاردايىم كومەكتەسكەنىن, قارت اتا-انالارىن قۇرمەتتەگەنىن قالايمىن, ءبىزدىڭ حالىق سولاي بولۋعا ءتيىس. ارداگەرلەر ارامىزدا امان-ەسەن ۇزاق ءجۇرىپ, ادامگەرشىلىك, مورالدىق ۇستانىمدارىمەن جاس بۋىنعا ۇلگى بولا بەرسىن. مەرەكەلەرىڭىزبەن, قىمباتتى قازاقستاندىقتار! ءاربىر وتباسىعا باقىت, تابىس جانە اشىق اسپان تىلەيمىن! – دەدى نۇرسۇلتان ءابىشۇلى.
ءيا, وتان ءۇشىن وت كەشكەن ارداگەرلەرىمىزگە قانداي قۇرمەت تە جاراسادى. بۇگىندە ەلوردادا 206 سوعىس ارداگەرى تۇرادى. ولارعا ءتۇرلى كومەكتەر كورسەتىلىپ جاتىر. جەڭىستىڭ 70 جىلدىعىنا وراي ءار ارداگەرگە 1 ميلليون 100 مىڭ تەڭگە بەرىلدى. قاريالاردىڭ بارلىعى دا پاتەرمەن قامتاماسىز ەتىلىپ, ۇيلەرىنە كۇردەلى جوندەۋ جۇمىستارى جۇرگىزىلۋدە.
قىمبات توقتامۇرات
