نازارباەۆ ورتالىعىنىڭ مۇراجايىندا ۇلى وتان سوعىسىنىڭ ارداگەرى تەمىرعالي ادىلبەكوۆپەن جەڭىس كۇنىنە ورايلاستىرىلعان كەزدەسۋ وتكىزىلدى. تەمىرعالي ادىلبەكوۆ – ۇلى وتان سوعىسىنىڭ ارداگەرى, كۋرسك دوعاسى ۇرىسىنا قاتىسۋشى. وتستاۆكاداعى پودپولكوۆنيك بيىل ەكى بىردەي مەرەيتويدى اتاپ وتۋدە. ءبىرىنشىسى – 1 مامىردا 90 جاسقا تولسا, 5 ماۋسىمدا – كۋرسك دوعاسىنا 70 جىل تولادى.
اقساقال جينالعاندار الدىندا جاۋىنگەرلىك جولدارى تۋرالى ەستەلىكتەر ايتىپ, جاستارعا العا قويعان ماقساتقا قالاي جەتۋگە بولاتىندىعىن اڭگىمەلەدى. بارلىق قاتىسۋشىلاردى الدا كەلە جاتقان مەرەكەلەرىمەن قۇتتىقتادى. ءىس-شارانى ۇيىمداستىرۋعا قالاداعى №27 ورتا مەكتەپتىڭ 8 «ۆ» سىنىپ وقۋشىلارى جانە ورىس ءتىلى مەن ادەبيەتى ءپانىنىڭ مۇعالىمى بايانشا سادىقوۆا بەلسەنە اتسالىستى.
مايدانگەرلەرگە العىس ايتتى
استانا قالالىق ءماسليحاتىنىڭ دەپۋتاتى, س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ رەكتورى, پروفەسسور اقىلبەك كۇرىشباەۆ جەڭىس كۇنى قارساڭىندا ۇلى وتان سوعىسىنا قاتىسقان №6 سايلاۋ ايماعىندا تۇراتىن ارداگەرلەردى ۇيىنە بارىپ قۇتتىقتادى.
اقىلبەك كۇرىشباەۆ مايدان دالاسىنداعى كەسكەكتى كۇرەستەر, سوعىستان كەيىنگى قيراعان حالىق شارۋاشىلىعىن كوتەرۋگە قاتىسقان جانقيارلىق ەڭبەكتەر تۋرالى ارداگەرلەر ايتقان ەستەلىكتەردى تىڭدادى. جاسى 101-گە كەلگەن سوعىس ارداگەرى روديون سكوك رەكتورمەن اڭگىمە بارىسىندا: «سوڭعى كەزدەرى اياعىم اۋىرىپ جۇرگەنى, ايتپەسە, جەڭىس كۇنى ءوز اياعىممەن ءجۇرىپ, قىدىرعاندى جاقسى كورەتىن جانمىن» دەپ اعىنان جارىلدى. ۆارۆارا گريبنەۆا: «جاسىم 92-گە كەلدى, قۇدايعا شۇكىر, دەنساۋلىعىم جاقسى. وسىلاي ۇيگە كەلىپ قۇتتىقتاعان ىستىق لەبىزدەرىڭىزگە كوپ راحمەت. ەلىمىز امان, جۇرتىمىز تىنىش بولعاي» دەپ باتاسىن بەردى. قاريالار كەزدەسۋ سوڭىندا دەپۋتاتقا العىستارىن ءبىلدىردى.
ەركەجان ساتىمبەك
