«استانا» كونتسەرت زالىندا نۇر-سۇلتان قالاسى اكىمدىگىنىڭ ە.راحماديەۆ اتىنداعى مەملەكەتتىك اكادەميالىق فيلارمونيانىڭ كلاسسيكا جانە ەسترادالىق ۆوكال ءبولىمىنىڭ ۇيىمداستىرۋىمەن اقيىق اقىن مۇقاعالي ماقاتاەۆتىڭ 90 جىلدىعىنا ارنالعان «ەسىڭە مەنى العايسىڭ» ادەبي-سازدى كەش ءوتتى.
ادەمى ءان كەشىندە اقىننىڭ ولەڭدەرىنە جازىلعان ەلگە تانىمال اندەرمەن قاتار جاڭا تۋىندىلار شىرقالدى. مۇقاعالي دەگەندە, كومپوزيتورلاردىڭ اراسىندا نۇرعيسا تىلەنديەۆ پەن تۇرسىنعازى راحيموۆتىڭ شىعارمالارىن ەرەك اتاپ وتۋگە بولادى. سەبەبى اقيىق اقىننىڭ ولەڭدەرىن انگە اينالدىرۋدى ءبىرىنشى بولىپ نۇرعيسا باستادى. ءتىپتى, ەكەۋىنىڭ شىعارماشىلىق بىرلەستىگىنەن تۋعان «سارجايلاۋ» ءانى «مەنىڭ اتىم قوجا» فيلمىنە ەنگەن. ال تۇرسىنعازى ومىردەن وتكەنشە مۇقاعاليدىڭ جىرلارىنا ءان جازدى.
كەشتە قازاقستان جانە تاتارستان رەسپۋبليكالارىنىڭ حالىق ءارتىسى نۇرجامال ۇسەنباەۆا, قازاقستاننىڭ ەڭبەك سىڭىرگەن قايراتكەرلەرى سۇندەت بايعوجين, التىناي جوراباەۆا, سۆەتلانا ايتباەۆا, لۇقپان جولداسوۆ, ارايلىم راحىمقىزى, ەلەنا ابدىحالىقوۆا, كلارا تولەنباەۆا, مەدەت سالىقوۆ, ازامات جىلتىركوزوۆ, مادەنيەت سالاسىنىڭ ۇزدىگى روزا شوتكاليەۆا, حالىقارالىق جانە رەسپۋبليكالىق بايقاۋلاردىڭ لاۋرەاتتارى ينديرا راسىلحان, زارينا وماروۆا, دوس, مۇراتبەك حايرولدا, نۇربول بالاپانوۆ, بيبىگۇل تىنىشتىق, ايدىن جۇماباي, اقبوتا قۇسنادين, اكىمحان ماجەنوۆ, ديانا ماي, پاراسات وتان, سالتانات سەركەباەۆا, ايگەرىم وراز, جانە «اينالايىن» بالالار حورى ءان سالدى. مۋزىكالىق جاس كورەرمەن تەاترىنىڭ ارتىستەرى اقىننىڭ ولەڭدەرىن وقىدى. «اlem» ەسترادالىق بي ءانسامبلى ونەر كورسەتتى.
