جاڭا جىل قارساڭىندا قالا اكىمىنىڭ ورىنباسارى نۇرلان نۇركەنوۆ استانا قالاسى اكىمدىگىنىڭ «نۇرلى جۇرەك» الەۋمەتتىك قىزمەت كورسەتۋ ورتالىعىنا باردى. ەرەكشە بالالارعا ارنالعان ورتالىق تاربيەلەنۋشىلەرى جانە ۇجىم جۇمىسىمەن تانىسقان ول مەكەمە قاجەتتىلىگىنە ساي مەرەكەلىك تارتۋ جاسادى.
1981 جىلى «اقىل-ەسى كەم بالالارعا ارنالعان بالالار ءۇيى» رەتىندە اشىلعان ورتالىق قازىرگى تاڭدا 3 پەن 18 جاس ارالىعىنداعى بالالار مەن ستاتسيونار جانە جارتىلاي ستاتسيونار بولىمشەلەرى جاعدايىندا ودان ۇلكەن جاستاعىلاردىڭ تۇرۋىنا ارنالعان. قازىرگى تاڭدا ورتالىققا اقىل-ەسىنىڭ كەمدىگى جەڭىل, ورتاشا, اۋىر جانە وتە اۋىر دەڭگەيدەگى 278 تاربيەلەنۋشى كەلەدى. ولاردىڭ 113-ءى دتسپ, 35-ءى اۋتيزمگە شالدىققان, 32-سىندە داۋن سيندرومى بار. بالالاردى اتا-اناسى تاڭەرتەڭ اكەلىپ تاستاپ, كەشكە الىپ كەتەدى. ال اكە-شەشەسى باس تارتقان ەرەكشە بالالار ورتالىق عيماراتىنىڭ ءبىر كورپۋسىندا 18 جاسقا دەيىن ءومىر سۇرەدى. ولاردىڭ سانى – 120 بالا. بالالاردىڭ بارىنە تەگىن قىزمەت كورسەتىلەدى.
عيماراتتىڭ بارلىق كابينەتتەرىن ارالاپ كورگەن اكىمنىڭ ورىنباسارى بالالار مەن ولاردى وڭالتۋمەن اينالىساتىن قىزمەتكەرلەردى جاڭا جىلمەن قۇتتىقتادى. كەزدەسۋ سوڭىندا ول ورتالىقتىڭ اكت زالىندا بالالاردىڭ قاتىسۋىمەن شاعىن كونتسەرتتى تاماشالاپ, اكىمدىك اتىنان كومپيۋتەر مەن تەلەديدار تارتۋ ەتتى.
– ءبىز جىلداعىداي جاڭا جىل قارساڭىندا ءداستۇرلى تۇردە «نۇرلى جۇرەك» ورتالىعىنا كەلىپ قۇتتىقتاپ وتىرمىز. باسقا ۋاقىتتا دا ءجيى كەلۋگە تىرىسامىز. مۇندا ەرەكشە بالالار تاربيەلەنەدى, ولارمەن كاسىبي ماماندار جۇمىس ىستەيدى. وسى ءساتتى پايدالانىپ, ەرەكشە بالاسىن تاستاماي, ولاردىڭ سونشالىقتى ىجداھاتتىلىقپەن كۇتىمىن جاسايتىن اتا-انالار مەن ورتالىق قىزمەتكەرلەرىنە العىسىمدى ايتقىم كەلەدى. سىزدەردىڭ ەڭبەكتەرىڭىز وتە زور. وسى جۇمىستارىڭىزعا تاباندىلىق پەن تابىس تىلەيمىن! اكىمدىك تاراپىنان بۇل ورتالىققا قاشان دا ەرەكشە كوڭىل بولىنەتىن بولادى, – دەدى ن.نۇركەنوۆ.
ورتالىق ديرەكتورى نۇربول زۇلقارناەۆتىڭ ايتۋىنشا, مەكەمە ماماندارىنىڭ ماقساتى – وسىنداي بالالاردىڭ الەۋەتتى مۇمكىندىكتەرىن دامىتۋ ءۇشىن بارىنشا قولايلى جاعداي جاساۋ جانە ولاردى قوعامدا الەۋمەتتەندىرۋ, سونداي-اق اقىل-ويى مەن دەنە بىتىمىندە كەمشىلىگى بار بالالاردى وڭالتۋ, تۇزەتۋ جانە بەيىمدەۋ جۇمىستارىن جۇرگىزۋ. مەكەمەدە 8 ارنايى الەۋمەتتىك قىزمەت ءتۇرى كورسەتىلەدى, اتاپ ايتقاندا, الەۋمەتتىك-تۇرمىستىق, الەۋمەتتىك-مەديتسينالىق, الەۋمەتتىك-پەداگوگيكالىق, الەۋمەتتىك–پسيحولوگيالىق, الەۋمەتتىك-ەڭبەك, الەۋمەتتىك-مادەني, الەۋمەتتىك-قۇقىقتىق جانە الەۋمەتتىك-ەكونوميكالىق قىزمەتتەر.
