مەملەكەت باسشىسى قاسىم-جومارت توقاەۆ انا مەن بالا ۇلتتىق عىلىمي ورتالىعىنداعى سمارت-سىنىپتىڭ جۇمىسىمەن تانىستى. مۇندا ەم الىپ جاتقان جاسوسپىرىمدەردىڭ «اقىلدى سىنىپ» ارقىلى وقۋدان قول ۇزبەۋگە مۇمكىندىگى بار.
مەكتەپ باعدارلاماسىنا سايكەس ماتەماتيكا, تاريح جانە باسقا دا پاندەر وقىتىلادى. مۋزىكانىڭ جانە ەرتەگىلەردىڭ كومەگىمەن تەراپيا ساباقتارى, ءتۇرلى شىعارماشىلىق ويىندار مەن شاحمات ۇيىرمەسى وتكىزىلەدى. بۇل – بالانىڭ اقىل-ويىن دامىتۋدا تاپتىرمايتىن قۇرال.
پرەزيدەنت رەسپۋبليكانىڭ ءار وڭىرىنەن كەلىپ, ەم الىپ جاتقان بالالارمەن جانە ولاردىڭ اتا-انالارىمەن اڭگىمەلەستى. ءارى جەتكىنشەكتەردىڭ تەزىرەك ساۋىعىپ كەتۋىنە تىلەكتەستىك ءبىلدىردى. قاسىم-جومارت توقاەۆ بالالار جىلىنىڭ اياسىندا ءبىلىم, دەنساۋلىق ساقتاۋ, سپورت جانە باسقا دا سالادا جەتكىنشەكتەرگە كوڭىل بولىنگەنىن ايتىپ, بۇدان ءارى دە قولداۋ شارالارى جالعاساتىنىن جەتكىزدى.
پرەزيدەنتكە بالالار بولىمشەلەرىندە 351 بالا ەم الىپ جاتقانى تۋرالى باياندالدى. بيىل بۇل جەردە 18 مىڭعا جۋىق بالا ەمدەلدى. كەيىنگى 3 جىلدا انا مەن بالا ۇلتتىق عىلىمي ورتالىعىنا 30-دان استام جاڭا مەديتسينا تەحنولوگياسى ەنگىزىلىپ, ماماندارى شەتەلدە بىلىكتىلىگىن جەتىلدىردى.
كەزدەسۋ سوڭىندا پرەزيدەنت بالالاردى جاڭا جىل مەرەكەسىمەن قۇتتىقتاپ, بارلىعىنا سىيلىق ۇلەستىردى.
