كەلە جاتقان جاڭا جىل ادامزاتقا جانە مەنىڭ تۋعان حالقىما قايىرلى جىل بولسىن! ادام بالاسى باقىتتى بولۋ ءۇشىن عۇمىر باقي كۇرەسەدى. بالكىم, باقىت ىزدەۋ جولىندا جۇيرىك تە, جورعا دا سۇرىنەر. مەنىڭ ەلىم دە تالاي قيىندىقتى باستان وتكەردى. تاعدىرىندا تاريحتىڭ اقتاڭداقتارى بار. حالقىنىڭ مۇڭى مەن شەرىن قاي كەزەڭدە دە اقىن-جازۋشىلارى جازدى.
كۇيرەگەن رۋحتى قايتا تۇلەتىپ, جاڭعىرتىپ وتىرعان قازاقتىڭ زيالى قايراتكەرلەرى, اقىن-جازۋشىلارى, عالىمدارى ورتاق مۇددە جولىندا ازاتتىق ءۇشىن كۇرەسىپ كەلدى. ءسوز باستاپ, ارەكەت جاسادى, باسىن بايگەگە تىگىپ, قۇربان بولدى. وسىنىڭ ناتيجەسى ۇلتىنىڭ رۋحىن ءتىرىلتتى, ماڭگىلىككە قىزمەت ەتتى. بۇگىندە ەل بولىپ, ەس جيعان قازاقتى كورگەندە ءتاۋبا دەيمىز. قازاقتىڭ قازاقتان باسقا دوسى جوق. «ءوزىڭ – ولتىرمەس, جات – جارىلقاماس» دەگەننەن تۋعان وي. اللا ءومىر بەرسە, مەن بيىل توقسان جاسقا كەلەدى ەكەنمىن. بۇل جاسقا اۋليە اتا وڭىرىنە ەسىمى ءماشھۇر بولعان ءوز اتام ءاشىم داموللا دا جەتپەگەن ەكەن. العاشقىلاردىڭ ءبىرى بولىپ بۇحارادا ءدىني سەميناريانى ءبىتىرىپ كەلىپ, ەلگە بەس مەشىت سالدىرىپ, بالالاردىڭ ساۋاتىن اشىپ, ۇلتتىڭ رۋحانياتىنا قىزمەت ەتىپ ءوتتى. سويتكەن ءاشىم داموللا دا سەكسەن ءۇش جاسىندا دۇنيەدەن وزعان. اكەم ەلۋ ءتورت قانا جاس جاسادى. ورىنبوردا ءبىلىم الىپ, ەكىنشى دۇنيەجۇزىلىك سوعىسقا قاتىستى. اعارتۋشىلىق سالاسىندا باسشىلىق قىزمەتتەردە بولدى. انام الپىس جەتى جاسىندا دۇنيەدەن وزدى. مۇنى ايتىپ وتىرعانىم: «ءولىنىڭ تىرىدەن دە ءتىرىسى بولادى. ءتىرىنىڭ ولىدەن گورى ءولىسى بولادى» دەيدى. ادامنىڭ ۇلتىنا جاساعان ەڭبەگى مەن ارتىنداعى ءىسى ولمەۋى كەرەك. كەيىنگىگە ايتار ءسوز كوپ سياقتى, بىراق كەيىنگىنىڭ اقىلى كەم, بىلمەستىگى مول دەپ ايتۋ دا اعاتتىق بولار ەدى. جاستار – قوعامنىڭ بەلسەندى مۇشەسى. ولار – ءوز زامانىنىڭ تۇلعالارى. مەن دە, ماعجان اقىن ايتقانداي, جاستارعا سەنەمىن, ءۇمىت ارتامىن. بىراق «يەن دالادا جانعان وتتاي شالقي بەرۋدىڭ ءجونى جوق». وتتىڭ جىلۋى ەلگە پايداسىن تيگىزۋى كەرەك. ەلىمىز جاڭا سانانىڭ, جاڭارعان قوعامنىڭ كەزەڭىندە تۇر. ءومىر بولعان سوڭ وكىنىش تە, قۋانىش تا الما-كەزەك. بۇل – زاڭدىلىق. مەن حالقىمنىڭ باقىتتى ۇلت بولعانىن تىلەيمىن. وسى جولدا پرەزيدەنتىمىز قاسىم-جومارت كەمەلۇلى توقاەۆتىڭ ادىلەتتى جولدى تاڭداعانىنا قۋانامىن ءارى قولدايمىن. حالقىمىز ءوز پرەزيدەنتىنە قاشان دا قولداۋ كورسەتىپ, سەنىم ارتقان. جاراتقان يەم ەلدى سەرگەلدەڭنەن ساقتاعاي. حالقىمىزدىڭ ارمان-ماقساتى ورىندالار كۇن الىس ەمەس. حالىق كەيدە ساياساتقا بىرجاقتى عانا قارايتىنداي. ساياسات ورمەكشىنىڭ قۇرعان تورى ىسپەتتى. شىرعالاڭنان شىعار جولدى كەز كەلگەن جولاۋشى تابا بەرمەيدى. داڭعىل جولدى, باقىت اكەلەتىن جولدى, سوعىسسىز, بەيبىت جولدى تاڭداۋ دا ەكىنىڭ بىرىنە ەمەس, ناعىز ءبىلىمدار, قاھارمان قولباسشىعا عانا كورىنەر. ءبىز سونداي تۇلعانى تاڭدادىق, سەنىم ارتتىق. ەندى ونىڭ ويىمەن, ۇستانىمىمەن كەلىسپەۋگە حاقىمىز جوق. ەلىن داعدارىستان, كۇيزەلىستەن ساقتاۋ ءۇشىن بارىن سالاتىن جانكەشتى مەملەكەت باسشىسىنا باقىت تىلەيمىن. ول ءوز حالقىنىڭ تاۋەلسىزدىگىمەن عانا باقىتتى بولا الادى. مەن دە سىزدەرمەن بىرگە ۇلى باستامالاردىڭ ءوز مارەسىنە جەتۋىن تىلەدىم. وسى جولدا ەلىمنىڭ بەرەكە-بىرلىگى مەن تاتۋلىعىن تىلەيمىن! ءاۋمين!
اكىم تارازي,
قازاقستاننىڭ ەڭبەك ەرى, قازاقستان رەسپۋبليكاسى مەملەكەتتىك سىيلىعىنىڭ لاۋرەاتى
