كەشە ءىىى رەسپۋبليكالىق «قايىرىمدىلىق كەرۋەنى» بايقاۋىنا قاتىسقان ەلوردالىقتار ماراپاتتالدى. بايقاۋعا قايىرىمدى ىستەرمەن تۇراقتى تۇردە اينالىسىپ, قوعامعا كومەگى تيگەن ازاماتتاردى نۇر-سۇلتان قالاسى ىشكى ساياسات باسقارماسىنىڭ باسشىسى داۋرەن بابامۇراتوۆ قۇتتىقتاپ, سىيلىقتار تابىس ەتتى.
نۇر-سۇلتان قالاسى الماتى اۋدانىنىڭ اكىمى ەرلان بەكمۇرزاەۆتىڭ ايتۋىنشا, رەسپۋبليكالىق سايىسقا جالپى سانى 670 ءوتىنىم قابىلدانسا, ونىڭ 100-گە جۋىعى ەلوردا تۇرعىندارىنان بولعان.
– قاتىسۋشىلاردىڭ اراسىندا ۇلكەن قۇرىلىس كومپانياسىنىڭ باسشىلارى, دارىگەرلەر, ءورت سوندىرۋشىلەر بولدى. قايىرىمدىلىق شارالارىمەن كۇندەلىكتى اينالىساتىن جانداردان قوعامعا كەلەر پايدا زور. سول سەبەپتى ولاردى ماراپاتتاۋ ءراسىمى جوعارى دەڭگەيدە ءوتتى, – دەدى قازاقستان ىسكەر ايەلدەر قاۋىمداستىعىنىڭ مۇشەسى نازگۇل ماعجان.
بايقاۋ قاتىسۋشىلارىنىڭ ءبىرى, ەلورداداعى №3 كوپبەيىندى ينفەكتسيالىق اۋرۋحانانىڭ پۋلمونولوگيا ءبولىمى مەڭگەرۋشىسى, دارىگەر ساپاركۇل بەردەشوۆا كوروناۆيرۋس ىندەتى ەندى باستالعان شاقتا كۇنى-ءتۇنى اۋرۋحانادا قالىپ, جاپپاي ءتۇسىپ جاتقان ناۋقاستاردى ەمدەگەن. «كوروناۆيرۋس باستالىسىمەن, ءبىزدى پروۆيزورلىق ورتالىققا اۋىستىردى. مايدان دالاسىنا مىلتىقسىز توپ ەتە قالعانداي بولدىق. كۇنىنە 200-دەي ادام تۇسكەن كەزدەر بولدى. توسەك-ورىن جەتىسپەيدى. ەكى اپتا بويى ۇيگە بارماي, اۋرۋحانادا قالعان تۇندەرى ۇيىقتايتىن ورىن جوق بولعان سوڭ, تۇرەگەپ وتىرىپ كوز ىلەتىنبىز. ادام شىعىنى بولماسا ەكەن, ناۋقاستار جازىلىپ شىقسا ەكەن دەپ تىلەدىك. بىراق كوپ ادامنان ايىرىلدىق. ينفەكتسيانىڭ ورتاسىندا جۇرگەن سوڭ, ءوزىم دە اۋىرىپ قالدىم. جولداسىمنىڭ وكپەسى – 70%, وزىمدىكى 45% زاقىمدانىپ, ايتەۋىر, جازىلىپ شىقتىق» دەيدى ول.
سول سياقتى مەديتسينا سالاسى بويىنشا حالىققا ۇشان-تەڭىز پايداسى تيگەن اننا تسەپكە مەن تاتيانا تسەچوەۆا ماراپاتتالدى. سونداي-اق قاتىسۋشىلاردىڭ ىشىندە توتەنشە جاعداي كەزىندە تەگىن پسيحولوگيالىق كەڭەس بەرۋمەن اينالىسقان استانالىقتار دا بار. ماسەلەن, دينارا جاقىپبەكوۆا مەن ايدانا بەيسەمبەنوۆا Bek Air اۋەكومپانياسىنىڭ ۇشاعى اپاتقا ۇشىراعاندا, توتەنشە جاعدايعا ۇشىراعاندار مەن ولاردىڭ جاقىندارىنا پسيحولوگيالىق كومەك كورسەتكەن.
ايدارحان كەمالادينوۆ ءورت لاۋلاپ جاتقان پاتەردەن جۇكتى ايەل مەن ءتورت بالانى قۇتقارىپ قالسا, ءنادىر ومارعازيەۆ كىشكەنتاي بالانى قۇدىقتان شىعارىپ العان. ال سەرگەي جانە اننا لياحوۆتار باسسەينگە باتىپ كەتكەن بالانى الىپ شىعىپ, العاشقى كومەك كورسەتىپ, ءولىم اۋزىنان اراشالاپ قالعان.
بۇگىنگى تاڭدا «قايىرىمدىلىق كەرۋەنى» IV رەسپۋبليكالىق بايقاۋىنا قاتىسۋعا ءوتىنىم قابىلدانا باستادى.
