ساپالى مەكتەپ, بىلىكتى مۇعالىم

«ەرتەڭ – مۇعالىمدەر كۇنى! ۇستازدار – وسكەلەڭ ۇرپاققا باعىت-باعدار بەرۋشى, بولاشاعىمىزدىڭ تاربيەلەۋشىسى! ولاردىڭ جۇمىسى كاسىبيلىكتى عانا ەمەس, ەرەكشە قاسيەتتەردى دە قاجەت ەتەدى. سەبەبى مۇعالىم بالالارعا تەك ءبىلىم بەرىپ قانا قويماي, زياتكەرلىك الەۋەتىن اشۋعا, ولاردىڭ مىقتى قاسيەتىن انىقتاۋعا, بىلىمىنە سەنۋگە جانە كاسىبىن تاڭداۋعا كومەكتەسەدى. مۇعالىمدەر مەن پەداگوگيكا سالاسىنىڭ ارداگەرلەرىن كاسىبي مەرەكەسى – مۇعالىم كۇنىمەن قۇتتىقتايمىن» دەدى نۇر-سۇلتان قالاسىنىڭ اكىمى التاي كولگىنوۆ ەلوردالىق مۇعالىمدەرمەن كەزدەسۋ كەزىندە.

«ەلوردالىق ءبىلىم بەرۋدىڭ نەگىزى – ساپالى مەكتەپ ينفراقۇرىلىمى مەن مۇعالىمدەردىڭ بىلىكتىلىگى. ۇستازداردىڭ كۇندەلىكتى ەڭبەگىنىڭ ارقاسىندا ءبىلىمدى ازاماتتار تاربيەلەنىپ ءوستى.
ەل باسشىلىعى مۇعالىمدەردىڭ جاعدايىن جاساۋعا جانە ولاردى قولداۋعا ەرەكشە كوڭىل بولەدى: 2024 جىلعا دەيىن جىل سايىن پەداگوگتەردىڭ جالاقىسى 25%-عا ارتىپ, بىلىكتىلىكتى ارتتىرۋ بويىنشا باعدارلامالار ەنگىزىلدى, سول سياقتى جوعارى وقۋ ورىندارىنا گرانتتار ءبولىندى. بۇعان قوسا قولايلى جۇمىس ىستەۋ جانە وقۋشى ورىندارىمەن قامتاماسىز ەتۋ ءۇشىن جىل سايىن وقۋ ورىندارى سالىنىپ جاتىر. بيىل 15 مەكتەپ سالىنىپ, پايدالانۋعا بەرىلەدى. بۇل شامامەن 40 مىڭ وقۋشى ورنىن قۇرۋعا مۇمكىندىك بەرەدى. سالىستىرار بولساق, 2020 جىلدان ەكى ەسە, 2019 جىلدان ءتورت ەسە كوپ.
سونداي-اق الەۋمەتتىك تۇرعىن ءۇي سالىپ, تۇرعىن ءۇي سەرتيفيكاتتارىن ءبولىپ جاتىرمىز.
«نۇر-سۇلتان قالاسىنىڭ قۇرمەتتى پەداگوگى» اتانعان مۇعالىمدەر 1 ميلليون تەڭگە كولەمىندە اقشالاي سىيلىقتارمەن ماراپاتتالدى. بۇل اقشالاي ماراپات وتكەن جىلدان باستاپ ەنگىزىلدى. سونداي-اق «قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى» جانە قر بعم «ى.التىنسارين» توسبەلگىلەرى, ديپلومدار بەرىلدى. ال №7 «اققۋ» بالاباقشاسىنا, №85 مەكتەپ-ليتسەيى­نە جانە Astana Polytechnic جوعارى كوللەدجىنە 7 ملن تەڭگەدەن گرانتتار بەرىلدى.
ۇستازدارىمىزدى شىن جۇرەكتەن كاسىبي مەرەكەمەن قۇتتىقتايمىن, سىزدەرگە زور دەنساۋلىق, باقىت جانە تابىس تىلەيمىن» دەدى ءوزىنىڭ قۇتتىقتاۋىندا التاي كولگىنوۆ.
كەشە ەلوردالىق مۇعالىمدەردىڭ قۇرمەتىنە قالا اكىمدىگىنىڭ ۇيىمداس­تىرۋىمەن «استانا» كونتسەرت زالىندا «ۇستاز مەرەيى» كونتسەرتتىك باعدارلاماسى قويىلدى. كونتسەرتتى نۇر-سۇلتان قالاسىنىڭ مەملەكەتتىك فيلارمونياسىنىڭ «شالقىما» بي ءانسامبلى اشتى. التىناي جوراباەۆا, قانات, سۆەتا ايتپاەۆتار, قايرات باەكەنوۆ, التىنبەك ءابدىلدا سىندى تانىمال انشىلەر, «تۋعان جەر» بالالار حورى,  سونداي-اق «فورمات» توبى مۇعالىمدەر قاۋىمىنىڭ كوڭىلىن كوتەرىپ, قۋانىشقا بولەدى.