سەناتورلار جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك ساتىپ الۋ, جەر قويناۋىن پايدالانۋشىلار مەن تابيعي مونوپوليالار سۋبەكتىلەرىنىڭ ساتىپ الۋ, بايلانىس, اۆتوموبيل كولىگى جانە قورعانىس ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا قارادى. قۇجاتتىڭ باستى ماقساتى – مەملەكەتتىك ساتىپ الۋ جۇيەسىن جەتىلدىرۋ, ساتىپ الۋ ءراسىمىنىڭ تيىمدىلىگى مەن اشىقتىعىن ارتتىرۋ جانە سىبايلاس جەمقورلىق تاۋەكەلدەرىن بارىنشا ازايتۋ.
«قارجى مينيسترلىگى ەلەكتروندى قارجى ورتالىعىنىڭ دەرەكتەرىنە سايكەس, 2020 جىلى جاسالعان مەملەكەتتىك ساتىپ الۋ شارتتارىنىڭ كولەمى 5,9 ترلن تەڭگەنى قۇراعان. ونىڭ ىشىندە 2,4 ترلن تەڭگەدەن استام سوماعا تەڭ شارتتار تىكەلەي شارت جاساسۋ جولىمەن ءبىر كوزدەن الۋ تاسىلىمەن جاسالعان. بۇل كورسەتكىش مەملەكەتتىك ساتىپ الۋلاردىڭ جالپى كولەمىنىڭ 40 پايىز دان استامىن نەمەسە ءجىو-ءنىڭ 3,6 پايىزىن قۇرايدى» دەدى سەناتور ەدىل مامىتبەكوۆ.
زاڭ جوباسىنداعى جاڭاشىلدىقتاردىڭ ءبىرى – ءبىر كوزدەن الۋ تاسىلىمەن مەملەكەتتىك ساتىپ الۋدى جۇزەگە اسىرۋعا قاجەتتى نەگىزدەمەلەر سانىن قىسقارتۋ. وسىعان وراي الەۋەتتى ءونىم بەرۋشىلەر مەملەكەتتىك ساتىپ الۋدى تاۋارلار مەن ولاردىڭ باعالارى تۋرالى اقپاراتتى ورنالاستىراتىن مەملەكەتتىك ساتىپ الۋ ۆەب-پورتالى ينتەگراتسيالاعان جاڭا اقپاراتتىق جۇيە – ەلەكتروندىق دۇكەن ارقىلى جۇرگىزۋ ۇسىنىلىپ وتىر. مۇنداي ساتىپ الۋلار جالپى قۇنى اەك-ءتىڭ 4000 ەسەلەنگەن مولشەرىنەن اسپايتىن بىرتەكتى تاۋارلارعا جۇرگىزىلەدى.
