استانا بۇگىندە الەم تانىعان, تورتكۇل دۇنيەگە اتى ءماشھۇر جەر بەتىندەگى اسەم قالالاردىڭ بىرىنە اينالىپ وتىر. وسىنداي اسەم شاھاردا ەڭبەك ەتۋ ارقىلى ەلوردامىزدىڭ كوركەيۋىنە ينەنىڭ جاسۋىنداي بولسا دا پايدا كەلتىرۋ – مەن ءۇشىن ۇلكەن ابىروي.
راسىندا دا, قازىرگى استانا كوزدىڭ جاۋىن الاتىن ءزاۋلىم عيماراتتارىمەن, مۇنتازداي تازا ءارى كەڭ كوشەلەرىمەن كورىكتى. ەسىلە اعىپ جاتقان ەسىل دە ەرەكشە سۇيكىمدى. بۇل قالادا تۇراتىن كەز كەلگەن ادام وسىنداي عاجايىپتاردى كوزبەن كورگەننەن كەيىن ونىڭ گۇلدەنۋىنە وزىنشە ۇلەس قوسۋعا تىرىسادى. مەن دە سولاردىڭ قاتارىنانمىن.
قالالىق ءماسليحاتتىڭ دەپۋتاتى بولعاندىقتان, سايلاۋشىلارىمىزبەن تىعىز جۇمىس جۇرگىزۋ – ءبىزدىڭ مىندەتىمىز. بۇل رەتتە حالىقتىڭ ءوتىنىش-تىلەكتەرىن ورىنداۋ ماقساتىندا قولدان كەلگەنىنشە ولاردىڭ پىكىرلەرىن نەگىزگە الا وتىرىپ, تالاپتارىن اياقسىز قالدىرماۋعا تىرىسامىز.
اسىرەسە, اتا-انالار تاراپىنان مەكتەپ جاسىنا دەيىنگى سابيلەرىن بالاباقشاعا ورنالاس-تىرۋ ماسەلەسى ءجيى كوتەرىلەدى. سونىمەن قاتار, ەلوردالىقتار اراسىندا جۇمىسقا سۇرانىس باسىم. وسىعان وراي, قالاداعى جۇمىسپەن قامتاماسىز ەتۋ ورتالىقتارىمەن دە تىعىز بايلانىستا جۇمىس ىستەپ كەلەمىز. سونىڭ ىشىندە ەلباسى بەلگىلەپ بەرگەن «قازاقستان-2050» ستراتەگياسى: قالىپتاسقان مەملەكەتتىڭ جاڭا ساياسي باعىتى» اتتى جولداۋدى باسشىلىققا الا وتىرىپ, ءوزىم ەڭبەك ەتەتىن ءبىلىم بەرۋ سالاسىنا قاتىستى ماسەلەلەردى دە ۋاقىتىندا شەشىپ وتىرامىز.
ەلباسىنىڭ “قازاقستان-2050” جاڭا دامۋ باعدارلاماسى – قازاقستاندىقتاردى جاڭا بەلەستەردى باعىندىرۋعا جەتەلەيتىن, ورتاق ماقساتتاردى ورىنداۋعا جۇمىلدىراتىن تاريحي قۇجات بولىپ تابىلادى. وندا ءبىلىم بەرۋ سالاسىن جاقسارتۋعا زور كوڭىل ءبولىنىپ وتىر. ءبىلىم بەرۋ سالاسىندا وتاندىق ءبىلىم بەرۋ جۇيەسىنە يننوۆاتسيالىق ادىستەردى, شەشىمدەردى جانە قۇرالداردى قارقىندى ەنگىزۋ مىندەتتەرى ايقىندالعان. ءوز ەلىنە پايداسىن تيگىزۋ, ءوز وتانىنىڭ تاعدىرىنا جاۋاپتى بولۋ – ءاربىر قازاقستاندىق ءۇشىن پارىز جانە ابىروي. سوندىقتان, 2050 جىلى قازاقستاندىقتار ءۇش تىلدە سويلەيتىن ءبىلىمدى, ەركىن ادامداردىڭ قوعامىندا ءومىر سۇرەدى دەگەن سەنىمدەمىز. جالپى, مەن ءۇشىن سايلاۋشىلارىمنىڭ سەنىمى بارىنەن قىمبات.
مەملەكەت باسشىسىنىڭ زەينەتاقى جۇيەسىن جاڭعىرتۋ ماسەلەسى بويىنشا مالىمدەمە جاساپ, قازاقستان حالقىنا ۇندەۋ جولداعانىن ءبارىمىز بىلەمىز. وسىعان بايلانىستى ءتۇرلى پىكىرلەر دە ايتىلۋدا. جالپى, ەرلەر مەن ايەلدەردىڭ زەينەتكە شىعۋ جاسىن تەڭەستىرۋ تۋرالى ماسەلە قازىرگى ەڭ وزەكتى تاقىرىپقا اينالدى. ايەلدەردىڭ زەينەت جاسىن ۇلعايتۋدىڭ باستى سەبەبى زەينەتاقى تولەۋدەگى قاراجاتتىڭ بولجامدى دەفيتسيتىمەن بايلانىستى بولىپ وتىر.
بۇگىندە كوپتەگەن ەلدەر زەينەتاقى جۇيەسىن رەفورمالاۋدا. ءومىر ءسۇرۋدىڭ ورتاشا ۇزاقتىعىنىڭ ارتۋى جانە حالىق قۇرىلىمىنداعى زەينەتكەرلەر ۇلەسىنىڭ كوبەيۋى وسىنداي قادامدارعا بارۋدى تالاپ ەتۋدە. بۇل رەتتە «وزىڭە سەن, ءوزىڭدى الىپ شىعار, اقىلىڭ مەن قايراتىڭ ەكى جاقتاپ» دەپ اباي اتامىز ايتقانداي, ادامنىڭ قامسىز قارتتىعىن ونىڭ ءوزى ويلاستىرۋى كەرەك.
ەلباسى زەينەت جاسىن كەزەڭ-كەزەڭىمەن ۇزارتۋدى 2014 جىلعى 1 قاڭتاردان ەمەس, 2018 جىلدىڭ 1 قاڭتارىنان باستاۋدى ۇسىنىپ, زەينەتاقى رەفورماسىنىڭ كۇردەلى ماسەلەسى بويىنشا دۇرىس شەشىم تابۋدىڭ جولىن كورسەتىپ بەردى. مەملەكەت باسشىسىنىڭ زەينەتاقى رەفورماسى جايلى ايتقان ساليقالى ويى, سالماقتى پىكىرى, ۇتىمدى ۇسىنىسى ەلىمىزدەگى نازىكجاندىلارعا دەگەن قامقورلىقتىڭ وزىق ۇلگىسى دەر ەدىم.
ەلميرا سۋحانبەرديەۆا,
استانا قالاسى ءماسليحاتىنىڭ دەپۋتاتى
