استانا تاڭداۋى – 2012
استانا تۇرعىندارى اراسىندا ۇزدىك ماماندىق يەلەرىن تاڭداۋ جالعاسۋدا. ءوز سالاسىنىڭ بىلگىرى رەتىندە «ۋچاسكەلىك ينسپەكتور» نوميناتسياسىنا ۇسىنىلعانداردىڭ ءبىرى – نۇرلان ومىربەكوۆ.
ەلوردا تەك قوعامدىق-ساياسي ورتالىق قانا ەمەس, ءتارتىپتىڭ دە بيىك ۇلگىسىن كورسەتۋى ءتيىس. وسى رەتتە تۋىندايتىن ەڭ باستى ماسەلە – قوعامدىق ءتارتىپ پەن قاۋىپسىزدىك. ال, ونى قاداعالايتىن – ءتارتىپ ساقشىلارى. نۇرلان ۇسىپبەكۇلى – №17 پوليتسيا بولىمشەسىنىڭ ۋچاسكەلىك ينسپەكتورى. استانا تاڭداۋى بايقاۋىنا ۇسىنىلعان نەبارى ءۇش ۇمىتكەردىڭ ءبىرى. 2004 جىلدان بەرى ىشكى ىستەر سالاسىندا ەڭبەك ەتىپ كەلە جاتقان ازامات سوڭعى ءۇش جىلدان بەرى وسى بولىمشەدە قىزمەت ەتەدى. ونىڭ ايتۋىنشا, ينسپەكتورلارعا قۇقىقبۇزۋشىلىقتىڭ الدىن الۋ, ونى بولدىرماۋ, ءتۇرلى قىلمىستاردىڭ جولىن كەسۋ جۇكتەلگەن. ازاماتتار كۇندەلىكتى ومىردە كەزدەسەتىن ءتۇرلى جاعدايلارمەن(ۇرلىق, توبەلەس, جانجال, الاياقتىق) قۇقىق قورعاۋ ورگاندارىنا حابارلاسادى. بۇل ماسەلەلەر بويىنشا, ەڭ الدىمەن, وقيعا ورنىنا ۋچاسكەلىك ينسپەكتور اتتانادى. مەرەكە كۇندەرى استانالىقتار توي تويلاپ جۇرگەندە, پوليتسيا قىزمەتكەرلەرى سول مەرەكەنىڭ كوڭىلدى ءوتۋىنىڭ قاۋىپسىزدىگىن قامتاماسىز ەتەدى. «پوليتسيا بولىمشەسىندە قۇقىقبۇزۋشىلىقپەن اينالىساتىن ادامدار تىركەۋدە تۇرادى. ولاردىڭ كوبى –بۇرىن سوتتالعاندار مەن وتباسى شىرقىن بۇزاتىندار, ناشاقورلار, جۇيكە جۇيەسى اۋرۋلارىمەن اۋىراتىندار. ءتىپتى, كامەلەتتىك جاسقا تولماعاندار دا بار. بولىمشەگە كۇنىنە ورتاشا ەسەپپەن 20-دان اسا شاعىم تۇسەدى» دەيدى نۇرلان ومىربەكوۆ بىزبەن اڭگىمە بارىسىندا.
استانا تاڭداۋى بايقاۋىنا ءوزىن كىم ۇسىنعانىنان مۇلدەم بەيحابار نۇرلان قوعامدىق قاۋىپسىزدىك قىزمەتكەرلەرىنىڭ جۇمىسى وتە اۋىر ەكەنىن العا تارتتى.
ماعان قاراستى اۋماقتا ون مىڭداي ادام تۇرادى. قالا ۇلكەيگەن سايىن, مەنىڭ اۋماعىمداعى حالىق سانى دا كوبەيۋدە. ماسەلەن, سەيفۋللين كوشەسى بويىندا مەملەكەتتىك باعدارلاما بويىنشا سالىنعان كوپتەگەن ۇيلەر پايدالانىلۋعا بەرىلدى. بىزدە ءتارتىپ ساقشىلارى از بولعانىنا قاراماستان, اۋقىمدى جۇمىستى كوتەرىپ كەلەمىز. ويتكەنى, بىزگە ءتيىستى اۋماقتاعى حالىق سانى ەرەجەدە كورسەتىلگەن شامادان الدەقايدا ارتىق, – دەيدى ول.
نۇرلان ومىربەكوۆتى «استانا تاڭداۋى – 2012» بايقاۋىنا ۇسىنعان ادام ول تۋرالى قالا اكىمدىگىنىڭ سايتىنا مىناداي مالىمەت قالدىرىپتى:
«ول ءۇش جىلدان بەرى پيك پەن جەرگىلىكتى تۇرعىندارمەن بىرلەسە وتىرىپ, ءوز مىندەتىن ءمىنسىز ورىنداپ كەلە جاتىر. كۇندەلىكتى ەرىنبەي, ءتارتىپتىڭ ساقتالۋىنا بار كۇشىن سالادى. جۋىردا تۇرعىندارمەن بىرگە ۇلكەن جينالىس جاساپ, وندا اكىمشىلىك زاڭ بۇزۋشىلىقتار جايلى كەڭىرەك تۇسىنىكتەمە بەرىپ ءوتتى. نۇرلان استانالىق ۋچاسكەلىك ينسپەكتورلار اراسىنان ۇزدىك دەپ تانىلىپ, باسقا جاس جىگىتتەرگە ۇلگى بولادى دەپ سەنەمىز».
ونىڭ ايتۋىنشا, ءوزى باقىلايتىن اۋماق بۇگىندە قالىپتى. ونداعى ءۇيسىز جۇرگەن جاندار مەن قايىر سۇرايتىن وزگە ۇلت ادامدارىن وڭالتۋ ورتالىعىنا جەتكىزگەن. ۋاقىتى تىم از نۇرلان كەلگەن بويدا وزىنە قاراستى اۋماقتا ەكى ماشينەنىڭ تەرەزەسىن بەلگىسىز بىرەۋلەر سىندىرىپ كەتكەنىن ايتتى. سول جەردە كۋاگەرلەردىڭ بارىنەن سۇراۋ الىپ, ءىستى جالعاستىرۋ ءۇشىن تەرگەۋ توبىنان كەلگەن قىزمەتكەرلەرگە تاپسىرعانىن جەتكىزدى.
«نۇرلان ءۇش جىلدان بەرى بىزدە قىزمەت ەتىپ كەلەدى. ونى بۇل كونكۋرسقا ۇسىنعان – حالىقتىڭ ءوزى. حالىقپەن ەتەنە جۇمىس ىستەپ, ولاردىڭ العىسىنا بولەنگەن جانداردىڭ ءبىرى. جالپى, قوعامدىق قاۋىپسىزدىك پەن ءتارتىپتى ساقتاۋدا ەڭبەك ەتىپ جۇرگەن ينسپەكتورلار كۇن بولسىن, ءتۇن بولسىن ءوز جۇمىستارىنىڭ جاۋاپكەرشىلىگىن سەزىنە ءبىلىپ, ءارى قالىڭ جۇرتتىڭ سەنىمىنەن شىعۋعا تىرىسادى» دەيدى №17 پوليتسيا بولىمشەسىنىڭ باستىعى سىرىمبەت سەركەباەۆ.
گۇلميرا ايماعانبەت
