ۇلتتىق مۋزەيدە سيرەپ بارا جاتقان جان-جانۋارلاردى بەينەلەيتىن National Geographic Photo Ark فوتوكورمەسى اشىلدى. جەر بەتىنەن مۇلدەم جويىلىپ كەتۋدىڭ الدىندا تۇرعان تىرشىلىك يەلەرى پورترەتتەرىنىڭ اۆتورى – الەمگە تانىمال فوتوگراف دجوۋل سارتوري.
كورمەنىڭ اشىلۋ راسىمىنە عىلىم جانە جوعارى ءبىلىم مينيسترى ساياسات نۇربەك, پارلامەنت ءماجىلىسىنىڭ دەپۋتاتى دارحان مىڭباي, مەديا-مەنەدجەر ارمانجان بايتاسوۆ, قوعام بەلسەندىلەرى جانە ديپلوماتيالىق قوعامداستىق وكىلدەرى قاتىستى.
– National Geographic-ءتىڭ وسىنداي جوباسىن كورۋگە اسىعىپ كەلدىك. كورمەنىڭ ميسسياسى – ۇلتىمىزدىڭ داستۇرىنە ساي. قورشاعان ورتامىزعا, جالپى جان-جانۋارلارعا ۇلكەن قۇرمەتپەن قاراۋ حالقىمىزدىڭ بولمىسىندا بار. عاسىردىڭ اياعىنا دەيىن جوعالىپ كەتۋ قاۋپى بار وسىنشا جانۋارلاردىڭ سۋرەتىن كورىپ, ءوزىمىز تاڭعالىپ وتىرمىز. بۇل ەكولوگيالىق جاڭاشا ويلاۋدى تالاپ ەتەتىن ءۇردىس, سوعان ءبىر قادام دەپ ايتۋعا بولادى, – دەدى پارلامەنت ءماجىلىسىنىڭ دەپۋتاتى دارحان مىڭباي.
كورمەگە ستۋديالىق ساپادا تۇسىرىلگەن 74 سۋرەت قويىلدى. ەكسپوزيتسيانى 4 جەلتوقسانعا دەيىن ۇلتتىق مۋزەيدىڭ 5 قاباتىندا ورنالاسقان زالدا تاماشالاۋعا بولادى.
