قر ۇلتتىق ەكونوميكا ءمينيسترى قۋاندىق بيشىمباەۆ پەن ەلوردا باسشىسى اسەت يسەكەشەۆ استاناداعى بىرقاتار ساۋدا نىساندارىن ارالادى
ساپار بارىسىندا قالا اكىمى الەۋمەتتىك ماڭىزدى ونىمدەردىڭ باعاسىن ۇستاپ قالۋ ماسەلەسى ۇدايى نازاردا بولاتىنىن اتاپ ءوتتى.
«بارلىق بازارلارداعى باعالارعا تۇراقتى مونيتورينگ جۇرگىزەتىن بولامىز, سونداي-اق قالا اۋماعىندا كۇن سايىن جارمەڭكەلەر وتكىزىلەدى. ازىق-تۇلىك كولىكتەردەن ساتىلادى. كوكونىس, جەمىس-جيدەك, جارما جانە تاعى باسقا ونىمدەردى ساتۋ ءۇشىن كولىكتەرگە كۇندە «جاسىل ءدالىز» اشىلادى. قانت, نان, ۇنعا كەلسەك, بۇل ماسەلە مونوپولياعا قارسى قىزمەتپەن بىرگە زەرتتەلەدى, ونى باقىلاۋعا الامىز», – دەدى اسەت يسەكەشەۆ.
اكىمنىڭ ايتۋىنشا, بۇگىندە قازاقستاننىڭ وزگە وڭىرلەرىمەن اۋىل شارۋاشىلىق ونىمدەرىن ەلورداعا جەتكىزۋ بويىنشا ۋاعدالاستىققا قول جەتكىزىلدى. باعالاردى ۇستاپ قالۋعا باعىتتالعان شارالاردىڭ العاشقى ناتيجەلەرى جاقىن كۇندەرى بەلگىلى بولادى.
قر ۇەم قۋاندىق بيشىمباەۆ ءوز بازارلارىمىزدى ازىق-تۇلىكپەن قامتاماسىز ەتۋ كەرەك ەكەندىگىنە توقتالدى. سوندىقتان وندىرۋشىلەر مەن كوتەرمە دايىنداۋشىلاردى تارتىپ, ولارمەن قارىم-قاتىناستاردى رەتتەۋ قاجەت, بۇل ىشكى نارىقتى قامتاماسىز ەتۋگە جول اشادى.
«ۇكىمەتتە نارىقتى رەتتەۋگە مۇمكىندىك بەرەتىن شەكتى باعا تەتىكتەرى بار. ول ءۇشىن باعانىڭ شەگىن بەلگىلەۋ كەرەك, ال جەرگىلىكتى ورگاندار بولشەك جانە كوتەرمە ساۋدا بازارلارىندا ونى قامتاماسىز ەتۋى ءتيىس», – دەدى مينيستر.
