مۇگەدەكتەر ءۇيى. ارباعا تاڭىلعان بوزبالا عۇمىر. اۋىر وي ەڭسەنى باسقىسى كەلەدى. جاس جىگەر ەرىك بەرسىن بە؟.. سول جىگەرى عوي, قۇرماشتى ومىردەن باز كەشتىرمەي, قايراتىن جانىپ وتىرعان. ايتپەسە… يا, ايتپەسە, ەندىگى بورداي مۇجىلىپ, ۇگىتىلىپ كەتەر مە ەدى, كىم ءبىلسىن؟! تاعدىردىڭ سىناعى, جازمىشتىڭ جازۋى دەپ تۇسىنەدى. تۇسىنەدى دە جاڭا عانا باستالىپ جاتقان بوزبالا عۇمىرىن, جارقىن ساتتەرىن, شاتتىقتى جانارىن اڭسايدى. اڭسايدى دا ساعىنادى. ساعىنعان ساتتە كەۋدەدەگى ءبىر كەسەك ەتى تاعى دا جانشىلىپ, ويمەن, مۇڭمەن, مازاسىزدىقپەن, قالا بەردى جالعىزدىقپەن كۇرەسەدى.
و-و-و, ول كەزدە ءبارى جاقسى ەدى عوي…
ادەمى وتىرىس باسىنداعى اڭگىمەنى بەزىلدەي جونەلگەن قوڭىراۋ ۇنى بۇزدى. شەتكەرىرەك وتىرعان قۇرماش ەسىكتى اشا قويماق ەدى. بۇل بارعانشا, قوڭىراۋ تاعى «القىمنان الىپ» بارادى. ىلگەكتى اعىتقانى سول, باسا-كوكتەپ كىرگەن جەتى-سەگىز جىگىت تابالدىرىقتاي اتتاي جاعاسىنا جارماستى ونىڭ.
– ەي, سەن نەگە اشپاي جاتىرسىڭ؟ الدە, جاقتىرماي تۇرسىڭ با؟.. –
اكىرەڭدەي كىرگەندەر كوللەدجدىڭ «ستارشاكتارى » ەدى. اۋىزدارىنان اراق پەن شىلىمنىڭ كۇلىمسى ءيسى مۇڭكيدى.
– تاماقتارىڭدى قىزعاندىڭدار ما؟! كەرەك بولسا, شەتتەرىڭنەن كەڭىردەكتەرىڭدى سۋىرىپ الامىز! – دەيدى تاعى. بۇل كەزدە داستارحان باسىندا وتىرعان قۇرماشتىڭ دوستارى دا دالىزگە شىعىپ, توپتالا قالعان. «ستارشاكتاردىڭ» وسى جولعى باسىنۋىنا شىدامدارى شىداس بەرمەدى. كيكىلجىڭنىڭ ارتى شىن توبەلەسكە اينالدى…
***
قۇرماش ەسىن اۋرۋحانادا جيدى. اپپاق توسەك. اپپاق داكەگە قاباتتالا ورالعان ەكى اياعى جوعارىعا اسىلىپ تۇر. بەلىن باتپانداي قورعاسىن باسىپ قالعان سياقتى.
***
بۇل جاتقان وبلىستىق اۋرۋحانانىڭ زاقىم كەلگەن جۇلىنعا وتا جاساۋعا قاۋقارى جوق. استاناداعى ونكولوگيالىق اۋرۋحاناعا جىبەردى. مۇندا دا اپپاق بولمە, اق توسەك, اق حالاتتى دارىگەرلەر… الگىندە بولمەسىنە كەلگەن قارا تورى ءوڭدى مەدبيكە قىز ەرتەڭ وتا جاسالاتىنىن جەتكىزىپ كەتكەن. ىشىندە قورقىنىش بار. جۇرە الماي قالسا نە ىستەمەك؟ جالعىز اناسى بولسا – زەينەتكەر. جالعىز اعاسى تىرشىلىك قامىمەن وسىندا, استانادا قۇرىلىس جاعالاپ ءجۇر. كىمنىڭ موينىنا ماسىل بولماق؟! بىراق بۇل استانا عوي! دارىگەرلەرى دە بىلىكتى بولار.
«ءۇمىتسىز – سايتان». جىگەر جاسىماسىنشى! …تۇس كورىپتى. تۇسىندە قارا تۇنەكتىڭ ىشىندە اداسىپ ءجۇر ەكەن دەيدى. الىستان جارىمجان ساۋلە كوزگە شالىنادى. سوعان جەتسەم دەپ قارمانادى. ءال-دارمەنى ەرىك بەرەر ەمەس… ويانعاندا ءبىلدى. وتا جاسالىپ قويىپتى. كەشەگى مەدبيكە كۇلىمدەپ, جىميىپ تۇر. «وپەراتسيا ساتتى اياقتالدى» دەيدى. ءبىر جەتىدەن سوڭ ەكىنشى وتا جاسالماق. وزىن-ءوزى ەداۋىر جاقسارعانداي سەزىنگەن. بالداقپەن تۇرىپ-جۇرە الادى. اندا-مۇندا ءوز اياعىمەن بارادى. قۋانىشتى! الداعى ارماندارى تۋرالى ويلايدى. قيالدىڭ بيىگىنە سامعايدى… الگىندەگى مەدبيكە قانداي سۇيكىمدى ەدى! «جاعدايىڭ تاۋىر مە؟» دەپ, اياعىنان سيپادى عوي. بولار بولماس جانى بار بالتىرى سۇلۋدىڭ جۇمساق الاقانىنىڭ جىلۋىن سەزىنگەن… تاعى سيپاي تۇسسە ەكەن دەيتىندەي. قوس بالتىردىڭ داۋاسى سول قىزدىڭ الاقانىندا سياقتى…
بۇگىن سوڭعى وپەراتسيا! دارىگەردىڭ تۇسى سۋىقتاۋ كورىندى بۇعان. ونى- مۇنى سۇراپ, قاسىنداعى مەدبيكەلەرگە وتاعا دايىنداڭدار دەگەندى يشارامەن ءبىلدىردى دە, قايتا شىعىپ كەتتى. كوپ ۇزاماي كوزى ءىلىنىپ كەتىپتى…
تاعى دا وتكەندەگى ءتۇس: قاپ-قارا تۇنەك… جارىمجان ساۋلە مۇنارتادى… بارعىسى كەلەدى… جەتكىزەر ەمەس…
كوزىن اشقاندا بولمەدە جالعىز ەدى. جۇرەك تۇسى الدەنەگە قوبالجۋلى. تۇلابويى ۇيىپ قالعانداي. اياقتارىن قوزعالتىپ كورەدى. جان جوق!.. سيپاعاندى دا سەزبەيدى! سەزىنەر ەمەس! ءوزى ءولىمشى ءۇمىت ءبىر لاپ ەتىپ, ءسوندى دە قالدى! ءوزى ۇزدىگىپ تۇرعان ءۇمىت ءۇزىلىپ كەتتى! ءۇمىت… سۇيكىمدى مەدبيكە دە بۇل بولمەگە
ات ءىزىن سالمادى بۇگىن…
***
…كوپ ۇزاماي ەلورداداعى قارتتار مەن مۇگەدەكتەرگە ارنالعان مەديتسينالىق-الەۋمەتتىك مەكەمەسىنىڭ تابالدىرىعىن اتتادى. استىنا مۇگەدەكتەر ارباسىن بەردى. مەدبيكەلەر قاس-قاباعىنا قارايدى. ۋاقىتىلى ءدارى-دارمەكتەرىن بەرىپ, ەمدەۋ شارالارىن جۇرگىزەدى. ءارى وزى سەكىلدى جارىمجان ادامدارمەن تانىسادى, اڭگىمەلەسەدى. بىردە تەلەديداردان مۇگەدەكتەر ارباسىمەن ولاي دا, بىلاي دا ويقاستاپ, بيلەپ جۇرگەندەردى بايقاپ قالدى. سوسىن اڭسارى بيگە اۋدى دا تۇردى. بىردەن الىپ كەتۋ قيىنعا سوققان-تىن. كەيىن كەلە باپكەر دە تابىلا كەتتى. ءاليا ەسىمدى جاتتىقتىرۋشى قۇرماشتىڭ تالابىن كورىپ, قۋانا جەتەكتەيتىنىن
ايتقان. ءوزى تۇراتىن مەكەمەنىڭ اكت زالىنان شىقپايدى. دايىندالادى, قيمىلدايدى, تەر توگەدى. اليا جىگەرىن جانىپ, ودان بىرنارسە شىعاتىنىن ايتىپ, قايراي تۇسەدى.
بىرنەشە جارىستارعا دا قوستى. ولجاسىز قايتقان ەمەس. جاقىندا گوللاندياعا بارىپ-قايتتى. حالىقارالىق چەمپيوناتتا جامان ناتيجە كورسەتكەن جوق. ەندى ەلىمىزدە وتەتىن دوداعا قاتىسپاق…
P.S.
كەيىپكەرىمىز قۇرماش – قۇرمانالي ءابۋوۆ. ەرىك-جىگەرىنىڭ مىقتىلىعىنان بولار, ءبىر اياعىنا جان ەنە باستاعانىن ايتادى. ءوزى دە سەنىمدى ەرتەڭىنە, ءالى-اق اتتاي شاۋىپ كەتەرىنە. «ءبارى تاعدىر جازۋى,-دەيدى ول,-كونەمىن, بىراق جەڭىپ شىعام!»
قۇرماش جەڭىپ شىعادى!..
اسحات رايقۇل
