رەسپۋبليكالىق «مەكتەپكە جول» اكتسياسى اياسىندا استانا قالاسى ءبىلىم باسقارماسى مەن «دار» قوعامدىق قورى بىرلەسە وتىرىپ, جالعىزباستى انا گۇلزاميرا الماحانقىزىنا قولۇشىن سوزدى.
سەگىز جاسار قىزى ايزاداعا تۋعاننان ميكروتسەفاليا دياگنوزى قويىلعان. اناسى جۇمىس ىستەمەي, ۇنەمى بالانىڭ قاسىندا وتىرادى. ويتكەنى, دارىگەرلەردىڭ ايتۋىنشا, وعان كۇندەلىكتى كۇتىم كەرەك. «بالاعا مەيىرىم سىيلا!» ۇرانىمەن ءوتىپ جاتقان اكتسيا ماقساتى بالانى مەكتەپكە دايارلاۋ عانا ەمەس, سونىمەن قاتار جاعدايى ناشار وتباسىلارعا كومەك كورسەتۋ بولعاندىقتان, بۇل وتباسىعا ازىق-تۇلىك پەن ازىن-اۋلاق كيىم-كەشەك بەرىلدى. «دەمەۋشىلىكتىڭ ارقاسىندا وزگەنىڭ جىلۋىن سەزىنىپ, ءالى دە جاقسى ادامداردىڭ بار ەكەنىنە كوزىمىز جەتتى» دەيدى گۇلزاميرا.
«كومەككە ءزارۋ وتباسىلار كوپ. ءبىز سولاردىڭ بىرىنشىسىنە عانا بارىپ قايتتىق. قايىرىمدىلىق جاساۋعا ءازىر اتىمتاي جومارتتار تاراپىنان ۇسىنىس تۇسسە, ولارعا الەۋەتى ناشار توپتاردىڭ ءتىزىمىن بەرىپ, ءۇي-ءۇيدى ارالايمىز» دەيدى ءبىلىم باسقارماسى كامەلەتكە تولماعانداردىڭ قۇقىقتارىن قورعاۋ ءبولىمىنىڭ باسشىسى ءلاززات جاقسىلىققىزى. قازىردىڭ وزىندە اۋدان اكىمدىكتەرى, «نۇر وتان» پارتياسى مەن قالالىق مەشىتتەر ساۋابى مول ىسكە جۇمىلا كىرىسۋدە. ال, جاقىندا وسى شارا شەڭبەرىندە ءبىلىم جانە عىلىم مينيسترلىگى 4 وتباسى مەن 20 بالاعا دەمەۋشىلىك جاساماق. سونداي-اق, 16-23 تامىز ارالىعىندا قالالىق الاڭدا «KZ» قوعامدىق قورىنىڭ ۇيىمداستىرۋىمەن بىرىڭعاي مەكتەپ فورماسى مەن وقۋ قۇرالدارىن تومەن باعامەن ساتاتىن جارمەڭكە وتەدى دەپ كۇتىلۋدە.
