جەكسەنبى كۇنى قىزىلوردادان استاناعا باعىت العان «Bek اir» اۋە كومپانياسى ۇشاعىنىڭ الدىڭعى ءشاسسيى اشىلماي, اپاتتى جاعدايدا قوندى. ابىروي بولعاندا, 116 جولاۋشى مەن 5 ەكيپاج مۇشەلەرىنىڭ ءبارى دە ءدىن امان.
– وزەننىڭ ۇستىنەن ءۇشىنشى رەت وتكەنىمىزدە توتەنشە جاعدايدىڭ بولعانىن ءبىلدىم, – دەيدى بورتتا بولعان زاپاستاعى گەنەرال-مايور, اۋعانستان سوعىسىنىڭ ارداگەرى ءالىمجان ەرنيازوۆ. – بىرنەشە مينۋتتان سوڭ, ەكيپاج مۇشەلەرى اپاتتى جاعدايدا قوناتىنىمىزدى حابارلادى. جولاۋشىلار شۋ كوتەرمەي, سابىر ساقتاپ وتىردى. ۇشاق جەرگە قاتتى سوعىلعان جوق, تەك كومانديردىڭ تەجەگىشتى بىردەن ىسكە قوسقانىن سەزدىك. ەكيپاج, بورتسەرىكتەر جانە اۋەجايدىڭ قاۋىپسىزدىك قىزمەتتەرى ۇيلەسىمدى جۇمىس ىستەدى. ءبىز جەرگە قونعان ۋاقىتتا ارنايى تەحنيكالار ۇشاقپەن قاتار ءجۇرىپ, كوبىك شاشتى. سونىڭ ارقاسىندا ۇشاقتان ءورت شىقپاي, جەڭىل قوندى.
كەستەگە سايكەس, ۇشاق استاناعا تاڭعى ساعات 9.45-تە قونۋى ءتيىس بولعان. الايدا, ۇشاقتىڭ جەرگە سوعىلۋ قاۋپىن مەيلىنشە ازايتۋ ءۇشىن 50 مينۋت بويى اۋەدە قالىقتاۋىنا تۋرا كەلگەن. وسى ۋاقىت ىشىندە استانا اۋەجايىنىڭ قاۋىپسىزدىك قىزمەتتەرى ۇشىپ-قونۋ الاڭىنا كوبىك شاشقان. سونىمەن قاتار, 7 ءورت ءسوندىرۋ تەحنيكاسى مەن 4 جەدەل جاردەم كولىگىن دايىنداپ تۇرعان.
ازاماتتىق اۆياتسيا كوميتەتى «Bek اir» اۋە كومپانياسىنىڭ باسشىلىعىنا اگرەگاتتار مەن شاسسيلەردى ءبىر رەتتىك تەحنيكالىق تەكسەرىستەن وتكىزۋدى تاپسىردى. ال, كومپانيا ديرەكتورى اسقار ۇمىتبەكوۆ ارنايى ماماندار بارلىق اۋە كەمەلەرىن تەكسەرىپ شىققانىن مالىمدەدى.
