وتكەن اپتانىڭ سوڭعى كۇندەرىندە اۋا رايى كۇرت جىلىنىپ, سوڭى جاڭبىرعا ۇلاستى. تىلسىم تابيعاتتىڭ وسىلايشا تەز قۇبىلۋى ەلورداداعى جاۋاپتى سالا ماماندارى دا, تۇرعىنداردى دا ءبىرشاما اۋرە-سارساڭعا سالعانى انىق. جالپى, بۇل ماسەلە قالالىقتارعا قانشالىقتى اسەر ەتكەنىن ءبىلۋ ماقساتىمەن ءبىز كوشە قيىلىسىندا كەزدەسكەن ءبىر توپ استانالىقتى اڭگىمەگە تارتقان ەدىك.
ايزات قويلىباي, مەملەكەتتىك قىزمەتشى:
– اۋا رايىنىڭ قۇبىلمالىلىعى كۇندەلىكتى تىرلىگىمىزگە بالەندەي اسەر ەتپەيدى دەسەم, قاتەلەسكەن بولار ەدىم. ەلىمىزدىڭ باسىم ايماقتارىندا كۇن كۇرت جىلىنىپ, اينالاداعى قار تەز ەرىگەلى بەرى قالالىقتار ىڭعايسىزدىقتى سەزىنۋدە. اسىرەسە, تاڭەرتەڭگى ۋاقىتتا جۇمىستارىنا اسىققان جۇرتتىڭ بەرەكەسى قاشتى. ماسەلەن, كوشە تازالاۋشىلار قاردى سىرتقا شىعارىپ ۇلگەرمەي جاتقاندىقتان, ەرتەڭگىسىن قار تيەگەن كولىكتىڭ كوپتىگىنەن كەپتەلىس ازايماي وتىر.
كۇننىڭ كۇرت جىلىنۋىنا بايلانىستى جەردە جاتقان قار تەز ەرىپ, ونىڭ استىنداعى ءشوپ-شالام, كۇل-قوقىس كورىنىپ قالدى. ال, بۇل قالا كوركىن بۇزىپ تۇر. سوندىقتان اكىمدىكتىڭ ۇيىمداستىراتىن ءداستۇرلى تازالىق شارالارىن, ەكولوگيالىق ايلىقتار مەن سەنبىلىكتەردى كۇتپەي, اركىم ءوز اۋلاسىن, ءۇيىنىڭ ماڭىن تازالاۋ ارقىلى اينالانى اباتتاندىرۋدى رەتكە كەلتىرۋى كەرەك دەپ ەسەپتەيمىن.
ايناگۇل ساعىندىققىزى, مۇعالىم:
– قاردىڭ ەرۋى – تابيعي قۇبىلىس. باياعىدا ەسەپشىلەر تابيعات قۇبىلىستارى مەن اسپان دەنەلەرىنە قاراپ, «كەلەر جىلى بالەن بولادى, ودان كەيىنگى جىلى تۇگەن بولادى» دەپ الدىن الا توپشىلاپ وتىرادى ەكەن. ال, قازىرگى عىلىم مەن تەحنيكا دامىعان زاماندا قار, جاۋىن-شاشىن مولشەرىن الدىن الا بولجاۋعا بولماي ما؟ جەردەگى قاردىڭ قالىڭدىعى قانشا, قار قاتتى ما الدە ۇرپەك پە, قار قورىنىڭ ساقتالۋى قانشالىقتى, سونىڭ ءبارى ارنايى اۋا رايىن باقىلاۋ بەكەتتەرى ارقىلى ەسەپتەلىنىپ وتىرىلسا, ەلىمىزدە اپاتتار سانى ازايار ەدى.
كۇنى كەشە ورتالىق ساياباق ماڭىنان ءوتىپ بارا جاتىپ, كىرەبەرىستەگى سۋعا شومىلاتىن حاۋىزدىڭ قوقىسقا تولعانىن كوردىم. بۇعان دەيىن قالىڭ قاردىڭ استىندا كورىنبەي جاتقان وسى كۇل-قوقىستى ەندى ەشكىمنىڭ نۇسقاۋىن كۇتپەي, تەز ارادا جيناۋعا كىرىسۋىمىز كەرەك.
قالا – وزىمىزدىكى. بىزگە ونى سىرتتان بىرەۋ كەلىپ جيناپ بەرمەيتىنى انىق. ەندەشە, استانانىڭ ايناداي ءارى وزگەلەرگە ۇلگى بولۋىنا تەك ءوزىمىز اتسالىسۋىمىز قاجەت. ارينە, بۇل رەتتە كوممۋنالدىق قىزمەت سالاسىنىڭ ماماندارى ەرەكشە بەلسەندىلىك بايقاتسا, دۇرىس بولار ەدى.
بەرىك ماقساتوۆ, اۆتوجۇرگىزۋشى:
– اۋا رايىنىڭ كۇرت جىلىنۋى سالدارىنان قىس بويى جاۋعان قالىڭ قار تەز ەرىپ, جەرگىلىكتى جەردەگى وزەندەردىڭ ارناسى مەن كانالدار, كوپىر ماڭى تازارتۋدى قاجەت ەتىپ تۇر. اسىرەسە, استانا جولدارىنىڭ پروبلەماسى – تاۋسىلمايتىن تاقىرىپ.
قار ەرىگەن سوڭ, ويقىش-ۇيقىشى كورىنىپ, شۇڭقىر جەرلەرمەن ءجۇرۋ قيىندادى. بۇل رەتتە جەڭىل كولىكتەرگە تىم وبال-اق.
قالانىڭ ىشىندە ءجۇرىپ-اق, كەيبىر شاعىن اۋدانداردا اۆتوكولىگىمىزدىڭ استىن كۇنىنە سان مارتە سوعامىز دا جۇرەمىز. مىنە, وسىنىڭ ءبارىن شۇعىل تۇردە قولعا الۋىمىز كەرەك.
ءتىپتى, كۇنى ەرتەڭ ەكسپو كورمەسىن وتكىزگەلى وتىرمىز. مۇنى دا ەسكەرگەن ءجون.
دايىنداعان
گۇلبارشىن وكەشقىزى
