ەلوردادا «Super اجە-2024» بايقاۋى ءوتتى.
بيىل ەكىنشى رەت وتكەن بايقاۋدى استانا قالاسى اكىمدىگىنىڭ قولداۋىمەن «شاراپات» الەۋمەتتىك قىزمەت كورسەتۋ ورتالىعىنىڭ ديرەكتورى ارداق سەيىتوۆا مەن ەرەكشە جان ۆالەنتينا تولماچەۆا ۇيىمداستىردى. مۇمكىندىگى شەكتەۋلى انانىڭ ايتۋىنشا, بۇل جولى دا قاتىسۋعا تىلەك بىلدىرگەندەر وتە كوپ بولدى. سولاردىڭ ىشىنەن اسا دارىندى, جان-جاقتى شەبەر ءارى ەپتى اجەلەر ىرىكتەلىپ الىندى.
– بايقاۋعا 63-تەن 76 جاسقا دەيىنگى 10 اجە ىرىكتەلدى. ولاردىڭ بارلىعى دا قالالىق بەلسەندى ۇزاق ءومىر ءسۇرۋ ورتالىعىنىڭ مۇشەلەرى. ەگدە تارتسا دا ءالى كۇنگە دەيىن وتباسىنا عانا ەمەس, قوعامعا بەرەرى مول جاندار شەتىنەن تالانتتى. قاتىسۋشىلاردىڭ قاي-قايسىسى دا باسقا زەينەتكەرلەر ءۇشىن ۇلگى. ەندەشە وسى كىسىلەردەن ءتالىم-تاربيە الۋ كەرەك, – دەدى ۆالەنتينا بوريسوۆنا.
قاتىسۋشى اجەلەر الدىمەن الدىن الا دايىندالعان بەينەروليكتەر ارقىلى وزدەرىن تانىستىردى. اسپازدىق شەبەرلىك بايقاۋىنا, سونداي-اق دەفيلە شوۋىنا قاتىسىپ, حالىق بيلەرىن, ۆوكالدىق نومىرلەرىن جانە وزدەرىنىڭ اۆتورلىق اندەرىن ورىندادى.
ساحنادا «گاۋھارتاستى» سىزىلتا ايتىپ, «بورتە» ءبيىن بۇلكىلدەتە بيلەپ, جىر وقىپ, كلاسسيكالىق تۋىندىلاردى ناقىشىنا كەلتىرە ورىنداعان اجەلەردىڭ اراسىنان شىن مىقتىنى تاڭداۋ وڭايعا سوقپادى. اسىرەسە, ولاردىڭ شىعارماشىلىق بۇيىمدارى – توقىما زاتتار, قۇراق كورپەشەلەر, كىلەمشە, ءتۇرلى تاقىرىپتا سالىنعان سۋرەتتەر بىرىنەن-ءبىرى وتەدى.
– سايىس ادەمى باستالدى: كەربەز باسقان اجەلەردى ساحناعا ۇلتتىق ۇلاننىڭ ساربازدارى الىپ شىقتى, اتا بۋىنعا نەمەرە بۋىننىڭ قامقور, سۇيەۋ ەكەنىن كورسەتكەندەي. اجە مەن اتانى قاۋقارسىز قارتتار ەمەس, قوعام ومىرىنە بەلسەنە ارالاساتىن, اقىلدى, ونەرپاز, ءبىلىمدى, شەبەر, ەڭ باستىسى, مەيىرىمدى جاندار ەكەنىن كورسەتۋگە ۇلەس قوسقان ءىس-شارا اركىمگە وي سالعانى انىق. سىرى كەتسە دە, سىنى كەتپەگەن اجەلەرگە قاراپ كورەرمەندەر ادەمى قارتايۋدىڭ شەبەرلىك ساباعىنا قاتىسقانداي, – دەدى قازىلار القاسىنىڭ مۇشەسى, جازۋشى كامال الپەيىسوۆا.
جاس ۇرپاقتى اتا-بابا ءداستۇرىمەن تاربيەلەپ, اجە ونەگەسىن ۇلگى ەتۋ ماقساتىندا ۇيىمداستىرىلعان ءىس-شارا بارىسىندا ءۇش كەزەڭنەن دە مۇدىرمەي وتكەن 2 بالانىڭ اناسى جانە 4 نەمەرەنىڭ اجەسى, 76 جاستاعى رىمكەش سەيىتقازىقىزى ورداباەۆا «Super اجە» اتاندى. 40 جىل ءبىلىم سالاسىندا قىزمەت اتقارعان ايتىسكەر ءارى ديكتور – بۇگىندە بەلسەندى ۇزاق ءومىر ءسۇرۋ ورتالىعىنىڭ مۇشەسى. سونىمەن بىرگە «بايتەرەك» شىعارماشىلىق انسامبلىندە ونەر كورسەتەدى ەكەن. ودان بولەك, سۋرەت سالادى, توعىزقۇمالاق وينايدى, دومبىرا تارتادى, توقىمامەن اينالىسادى. ماراپاتتاۋ بارىسىندا جەڭىمپاز اجەنىڭ
باسىنا ءتاج كيگىزىلىپ, قولىنا
100000 تەڭگەنىڭ سەرتيفيكاتى تابىستالدى.
سونداي-اق بايقاۋعا قاتىسقان دامەتكەن ماحمەدوۆاعا «اقىلدى اجە», اقىنگۇل الىمحانقىزىنا «ەڭ شەبەر اجە», ءمادينا جولداسوۆاعا «ەڭ زاماناۋي اجە», ءۇمىتجان كيكيموۆاعا «ەڭ مەيىرىمدى اجە», راكيلا ساديروۆاعا «بۇلبۇل اجە», روزا دوشانوۆاعا «ەڭ ءبىلىمپاز اجە», باقىتكۇل تۋراميەۆاعا «ەڭ كوڭىلدى اجە», بانۋ جۇسىپوۆاعا «ەڭ ونەرلى اجە» جانە زۋلفيرا درەگەرگە «ەڭ تاپقىر اجە» نوميناتسيالارى بەرىلدى. ءىس-شارانى ۇيىمداستىرۋشىلار ولاردىڭ ارقايسىسىنا 50000 تەڭگەنىڭ سەرتيفيكاتىن تابىستادى.
