ەلوردالىق پوليتسەيلەر «سىنعان تەرەزەلەر» باعدارلاماسى شەڭبەرىندە قالالىق كوممۋنالدىق قىزمەت وكىلدەرىمەن بىرلەسە كريمينالدىق قىلمىس ورىن الاتىن اۋماقتاردى رەتكە كەلتىرۋگە كىرىستى.
بيىلعى جىلدىڭ ءساۋىر ايىندا مەملەكەت باسشىسى قالا اكتيۆىمەن بولعان كەزدەسۋدە باتىس ەلدەرىنىڭ سىرتتاي قورشاۋ ارقىلى قىلمىستى انىقتاۋ باعدارلاماسىن تاجىريبەمىزگە قولدانۋ كەرەكتىگىن ايتقان ەدى. مۇنداي باعدارلاما ارقىلى قوعامدىق ءتارتىپتى ساقتاۋ, ۇساق قۇقىقبۇزۋشىلىقتى انىقتاۋ الدەقايدا ءتيىمدى. اقش ەلىندە بۇل باعدارلاما «سىنعان تەرەزەلەر» دەپ اتالادى. جوبانى ۇيىمداستىرۋشى قالا پوليتسەيلەرى بارىنشا كريمينالدى اۋماقتى تاڭداپ, الەۋمەتتىك جانە كوممۋنالدىق قىزمەت وكىلدەرىن جۇمىلدىرۋدا. ماسەلەن, كەشە «تەحنوپارك» تەرريتورياسىندا (رەسپۋبليكا داڭعىلى, 58 ءۇي) باعدارلاما شەڭبەرندە ءىس-شارا ءوتتى. بۇل اۋماق – اباتتاندىرىلماعان, تۇرعىلىقتى جەرى جوق جانداردىڭ ءجيى باس قوساتىن جەرى. سوندىقتان, مۇندا ءتارتىپ بۇزۋشىلىق كوپ كەزدەسەدى. بەلگىلى بولعانداي, اۋماق يەسىز قالعان اۆتوكولىكتەردىڭ تۇراعىنا اينالعان. شاعىن اۋداننىڭ سىرتقى كورىنىسى ەلوردالىق ستاتۋسقا ساي كەلمەيدى. كوممۋنالدىق قىزمەت وكىلدەرى مەن استانالىق ءتارتىپ ساقشىلارى الداعى ۋاقىتتا مۇنداي ورىنداردى جويىپ, قاۋىپسىز ءومىر سۇرۋگە جاعداي تۋدىرماق.
*پىكىر
تالعات جامانعارين, سارىارقا اۋداندىق ءىىب اكىمشىلىك پوليتسيا ءبولىمىنىڭ باستىعى:
– قۇقىق بۇزۋشىلىقتىڭ پروفيلاكتيكاسى بويىنشا جۇمىستىڭ جاڭا نىسانى مەن ءادىسىن ەنگىزۋ ماقساتىندا ىشكى ىستەر مينيسترلىگى «سىنعان تەرەزەلەر» پروفيلاكتيكالىق باعدارلاماسىن ەنگىزۋدى ۇسىندى. «سىنعان تەرەزەلەر» – پسيحوفيزيولوگيالىق كريمينولوگيالىق تۇجىرىمداماسىنا سايكەس قىلمىستىڭ جاسالۋىنا ىقپال ەتەدى. ساراپشىلاردىڭ پىكىرىنشە, دەۆيانتتىق مىنەز-قۇلىققا قالا كوشەلەرىندەگى ءتارتىپتىڭ بولماۋى جاتادى. سىرتقى تارتىپسىزدىك (سىنعان تەرەزەلەر, ەلەكتر جارىعىنىڭ بولماۋى, قاراۋسىز قالعان ماشينالار, كوشەلەردەگى قوقىستار) بۇل –الەۋمەتتىك باقىلاۋدىڭ بولماۋى, جازاسىز قالۋ, قيراپ, ءبۇلىنۋ جانە بيلىكسىز قالۋ بەلگىلەرى. بۇل اۋماقتىڭ قاداعالاۋسىز جانە باقىلاۋسىز قالۋىنا, بيلىكتىڭ جوقتىعىنا, سول سەبەپتى, ەگەر ءبىر تەرەزە سىنسا وعان ەشكىم مازالانباسا, وندا باسقا تەرەزەنى سىندىرۋعا بولاتىنىنا سەندىرەدى. بۇگىنگى ءىس-شارادا بۇل ماسەلەلەر كەڭىنەن قاراستىرىلدى.
