وتكەن بەيسەنبىدە الماتى اۋدانىنىڭ اكىمى ساپار قايراتۇلى احمەتوۆ رەداكتسيامىزعا كەلىپ, «استانا اقشامى» گازەتىنىڭ وقىرماندارىمەن تىكەلەي بايلانىسقا شىقتى.
ەلوردا تۇرعىندارىن تولعاندىراتىن سۇراق تا از بولمادى. تەلەفون ارقىلى حابارلاسقان قالالىقتاردىڭ باسىم بولىگى اسەم استانامىزدى قايتسەك كوركەيتەمىز دەگەن ماسەلەنى العا تارتسا, اۋدان اكىمى بۇل ماقساتتا اتقارىلىپ جاتقان جۇمىستارعا توقتالا كەلە, باسىلىم جاناشىرلارىن ورتاق ىسكە جۇمىلا كۇش بىرىكتىرۋگە شاقىرىپ, كوپشىلىك كوكەيىندەگى ساۋالدارعا جاۋاپ بەردى. قۋانىشتىسى, ەكى جاقتىڭ دا كوكسەگەنى ءبىر ەكەن, ول – استانانىڭ اجارى مەن ابىرويىن اسقاقتاتۋ.
– سالەمەتسىز بە, ساپار قايراتۇلى؟! مەنىڭ قىزىم ەت جانە ءسۇت ونىمدەرىنىڭ تەحنولوگى. بىرنەشە جىلدان بەرى وزىنە لايىقتى جۇمىس تابا الماي ءجۇر. قانداي كومەك كورسەتە الاسىز؟
– قىزىڭىز الدىمەن قالامىزداعى جۇمىسپەن قامتۋ جانە الەۋمەتتىك باعدارلامالار باسقارماسىنا بارىپ, تىركەۋگە تۇرۋى كەرەك.
– ءيا, ول جەرگە تىركەۋگە تۇرعان. الايدا, ودان ەش ناتيجە شىقپادى.
– قىزىڭىزدىڭ اتى-ءجونى مەن تەلەفونىڭىزدى قالدىرىڭىز, باسقارما باسشىلارىنا حابارلاسىپ, كومەكتەسۋگە تىرىسامىز.
– مەنىڭ ەكى نەمەرەم بىردەي بالاباقشاعا بارا الماي وتىر. ءوزىمىز الماتى اۋدانى اكىمدىگىنىڭ بۇرىنعى عيماراتىنىڭ قاسىنداعى 35-ءشى ۇيدە تۇرامىز. قازىر سول ۇيدە بالاباقشا ورنالاسقان. ورىن بولسا, نەمەرەلەرىم سوندا بارسا دەپ ويلايمىن. ەكەۋى دە كەزەكتە تۇر. كەلىنىمنىڭ ايتۋىنشا, كەزەكتەرى كەلگەنشە مەكتەپكە باراتىن ۋاقىت بولىپ قالادى ەكەن. سوندا نە ىستەۋىمىز كەرەك؟
– قازىرگى ۋاقىتتا مەملەكەتتىك بالاباقشالارعا جولداما بەرۋ استانا قالاسىنىڭ ءبىلىم باسقارماسى جانىندا قۇرىلعان ارنايى كوميسسيانىڭ قۇزىرىندا. سوندىقتان, اتالعان باسقارماعا حابارلاسۋىڭىزدى سۇرايمىن.
اۋدان اكىمدىگى مەملەكەتتىك بالاباقشالار, شاعىن ورتالىقتار جانە مەملەكەتتىك «بالاپان» باعدارلاماسى اياسىندا جۇمىس جاسايتىن جەكەمەنشىك بالاباقشالاردى مەملەكەت ەسەبىنەن قارجىلاندىرۋمەن عانا اينالىسادى. بۇل باعدارلامانىڭ ءبىر جەڭىلدىگى – اتا-انا ءوز تاراپىنان 23000 تەڭگە كولەمىندە اقشا تولەسە, قالعان 15900 تەڭگەسىن مەملەكەت تولەيدى.
– مەن – استانالىق گۇلنار بالتاباەۆا, كۇيشى دينا كوشەسى 30/1 ۇيدە تۇرامىن. №30 ءۇي مەن 30/1 ۇيلەرىنە ءبىر عانا اۋلا جاسالىنعان, ءوزى تار, بالالاردىڭ ويناۋىنا ورىن تىم از. ەسىكتىڭ الدى اباتتاندىرىلماعان, بالالاردىڭ فۋتبول وينايتىن الاڭى دا جوق. ءبىزدىڭ بالالارىمىزعا فۋتبول الاڭىن سالىپ بەرسەڭىز دەيمىن. پودەزگە بالالارمەن كىرۋ دە ۇلكەن ماسەلە بولىپ كەتتى. ۇيىمىزگە كىرەر جەردەگى باسپالداق تا, ليفتىگە دەيىنگى باسپالداقتار دا وتە بيىك, سول سەبەپتى بالا اربالارىمەن ءتۇسىپ-ءمىنۋ وتە قيىن. ليفتىگە ءۇيدىڭ تسوكولدى قاباتىنان كىرۋگە بولادى, بىراق ءبىزدىڭ ۇيگە قىزمەت كورسەتەتىن «پك ازات» پيك-ىنە قانشا رەت ءليفتىنى جەرتولەگە دەيىن جاساپ بەرۋلەرىن سۇراعانىمىزبەن, ءوتىنىشىمىز ورىندالماي-اق قويدى. وسى ماسەلەنى شەشىپ, كومەك كورسەتۋىڭىزدى سۇرايمىن.
– گۇلنار, جىل سايىن ءبىز ءار باعىت بويىنشا جۇمىس جوسپارىن قۇراستىرامىز. بيىلعى جىلى قالاداعى وتىنىمدەردىڭ ەسەبىنەن جوسپار بويىنشا اۋدانىمىزدا 17 اۋلا اباتتاندىرىلدى. سىزدەردىڭ ۇيلەرىڭىزگە قاراستى اۋماقتاردىڭ اباتتاندىرىلۋى 2013 جىلدىڭ جۇمىس جوسپارىندا قاراستىرىلعان, قاجەتتى قارجىلاندىرۋ بولعان جاعدايدا جۇمىستار جۇرگىزىلەتىن بولادى.
ءليفتى ماسەلەسى بويىنشا ايتارىم: بۇگىنگى كۇندە ءسىز تۇراتىن ۇيدە «ازات-نت-قۇرىلىس» جشس كۇشىمەن تسوكولدى قاباتتىڭ قايتا جوندەۋ جۇمىستارى جۇرگىزىلىپ جاتىر. قۇرىلىس جۇمىستارى اياقتالعان سوڭ, ليفتىلەرىڭىز ىسكە قوسىلاتىن بولادى.
– ساپار قايراتۇلى, سىزگە رەسپۋبليكا داڭعىلىنداعى №18 ءۇيدىڭ تۇرعىندارى اتىنان حابارلاسىپ تۇرمىن. اتى-ءجونىم ايگۇل تۇسىپبەكوۆا. ءۇيىمىز يمانوۆ كوشەسى مەن رەسپۋبليكا داڭعىلىنىڭ قيىلىسىندا ورنالاسقان. ءۇش پودەزد بار. وسى كۇنگە دەيىن ءبىرىنشى جانە ەكىنشى پودەزدىڭ اراسىندا شلاگباۋم تۇراتىن, ول ەشقانداي قىزمەتتىك كولىكتەرگە كەدەرگى كەلتىرمەيتىن. ەندى ونى الىپ تاستاپتى, اكىمنىڭ تاپسىرماسى دەپ ەستىدىك, نەگە الىپ تاستادىڭىزدار؟ قازىر اۋلامىز ارقىلى كولىكتەردىڭ بارلىعى جوعارى جىلدامدىقپەن جۇرەدى, بالالارىمىز ءۇشىن الاڭدايمىز. شلاگباۋمدى ورنىنا قويۋلارىڭىزدى سۇرايمىز.
– شلاگباۋمدى الىپ تاستاۋ – اكىمنىڭ تاپسىرماسى دا, بۇيرىعى دا ەمەس. ءوزىڭىز ايتقانداي, اۋلا اۋماعىنداعى جولداردا, تروتۋارلاردا جىلدامدىقتى تەجەيتىن شلاگباۋمدار, تەمىر قورشاۋلار, بەتوندى بلوكتار قويۋعا تىيىم سالىنادى دەگەن 2004 جىلعى 30 ناۋرىزداعى ءماسليحاتتىڭ شەشىمى بار. سىزدەرگە ىشكىورام اۋماعىندا كولىك جىلدامدىعىن باقىلاۋ ءۇشىن جاساندى تەجەۋلەر قويۋدى ۇسىنامىن. اكىمدىكتىڭ اباتتاندىرۋ ءبولىمىنىڭ ماماندارى توتەنشە جاعدايلار باسقارماسىمەن بىرلەسە وتىرىپ, ونى ورناتۋدا ءوز تاراپتارىنان كومەك كورسەتەتىن بولادى.
– قالامىزداعى «قازاقستان» سپورت كەشەنىنىڭ جانىندا بالالاردىڭ ويىن الاڭى بار. قولىمىز تيگەندە بالالارىمىزدى, نەمەرەلەرىمىزدى سوندا اپارىپ جۇرەتىنبىز. اتكەنشەكتىڭ نەشە تۇرىنە ءمىنىپ, بالالارىمىز دا قۋانىپ قالۋشى ەدى. قازىر سول جەردە جەكە كاسىپكەرلەر تۇرىپ الىپ, قىتايدىڭ ارزان ويىنشىقتارىن ساتاتىن بولدى. وعان بالالار البەتتە قىزىعادى. اپەرمەسەڭ, جىلايدى. اقىلى قىزمەت تۇرلەرى دە قاپتاپ كەتتى. وسىعان توسقاۋىل قويۋعا بولماي ما؟ بۇل كاسىپكەرلەردىڭ رۇقسات قاعازى بار ما؟
– بۇل كاسىپكەرلەر استانا قالاسىنىڭ سالىق باسقارماسىندا تىركەلگەن, قولدارىندا رۇقسات قاعازدارى بار. ارينە, ەگەر ولار جان-جاقتارىن لاستاپ, تالاپ بويىنشا ءتيىستى جۇمىستاردى اتقارمايتىن بولسا, ول كاسىپكەرلەردى ەسكەرتىپ, كاسىپكەرلىك جانە ونەركاسىپ باسقارماسىنا حابارلايتىن بولامىز. ازىرشە بىزگە ونداي ەسكەرتۋ, شاعىمدار كەلىپ تۇسكەن جوق, سوندىقتان ولاردىڭ جۇمىس ىستەۋىن توقتاتۋ مۇمكىن ەمەس.
– سوڭعى كەزدەرى استانادا كوپتەگەن دەنساۋلىق ساقتاۋ, ءبىلىم مەكەمەلەرى بوي كوتەرۋدە. بۇل, ارينە ءبىزدى قاتتى قۋانتادى. ال, الماتى اۋدانى بويىنشا بيىل قانشا اۋرۋحانا, مەكتەپ, بالاباقشا سالىندى؟ الداعى ۋاقىتتا تاعى قانشا الەۋمەتتىك نىسان سالىنادى دەپ جوسپارلانىپ وتىر؟
– ءيا, ەلباسىنىڭ تاپسىرماسى بويىنشا ەلوردادا جىل سايىن كوپتەگەن نىساندار سالىنۋدا. بيىلعى جىلى اۋدانىمىزدا №70 جاڭا مەكتەپ اشىلىپ, №42 مەكتەپ جاڭا عيماراتقا كوشتى, كەلەسى جىلى اشىلاتىن مەكتەپتەر الداعى جىلى شەشىلەتىن بولادى. سونىمەن قاتار №59, №60 بالاباقشالار ىسكە قوسىلدى. جىل سوڭىنا دەيىن تاعى دا ءبىر شاعىن ورتالىق پەن №9 بالاباقشانىڭ قوسىمشا عيماراتىن تاپسىرۋ ويىمىزدا بار. ال كەلەسى جىلى 6 بالاباقشانى تاپسىرۋ جوسپارلانىپ وتىر.
اۋرۋحانالارعا كەلەتىن بولساق, وسى جىلى اۋدانىمىزدا №1 قالالىق اۋرۋحانا مەن №2 بالالار اۋرۋحاناسى سالىندى, الدا قاراوتكەل كەنتىندە ورنالاسقان №6 امبۋلاتورلىق-ەمحانالىق كەشەن ىسكە قوسىلاتىن بولادى.
– ءبىز ەلوردانىڭ وڭتۇستىك-شىعىس اۋدانىنداعى بالقانتاۋ كوشەسىندە تۇرامىز. بىلتىر جولىمىز جوندەلىپ, كوشەگە جارىق بەرىلدى. ەندى جۇرت وسىنداعى ۇيلەر جىرىلادى دەگەن سوزدەردى ايتىپ ءجۇر. وسى راس پا؟
– كوشەلەرىڭىزدە ءۇي بۇزۋ جۇمىستارى جۇرگىزىلمەيدى. قالانىڭ باس جوسپارى بويىنشا بۇل جەردە تۇرعىن ۇيلەر سالىنۋى ءتيىس, الايدا, بۇل اۋدانداردىڭ دامۋى كاسىپكەر قۇرىلىسشىلاردىڭ ىنتاسىنا جانە ينۆەستيتسيالارىنا بايلانىستى بولادى.
– قالاداعى كولونكالاردىڭ كوبىن الىپ تاستادى عوي. ءبىزدىڭ توقتاروۆ كوشەسىندە دە وسىنداي جاعداي. بارىنەن دە جاسى 90-نان اسقان شەشەمە قيىن بولدى. دالاداعى سۋدى ۇيگە ەنگىزۋدە وسىنداي جاسى ۇلكەن زەينەتكەرلەرگە قانداي دا ءبىر جەڭىلدىكتەر قاراستىرىلا ما؟
– توقتاروۆ كوشەسى سارىارقا اۋدانىنا قاراستى عوي, سوندىقتان ءسىزدىڭ ماسەلەڭىزدى ارىپتەسىم, سارىارقا اۋدانىنىڭ اكىمى ەرمەك سابىربەكۇلى وسپانوۆقا حابارلايىن. ول كىسى ءتيىستى شارا قابىلدايدى دەپ ويلايمىن.
– سالەمەتسىزدەر مە؟ ءبىز ابىلاي حان داڭعىلىنداعى 6/5 ءۇيدىڭ تۇرعىندارىمىز. مىنە ءۇش ايدان بەرى ۇيىمىزدە ىستىق سۋ جوق. ەسىكتىڭ الدىن قازىپ تاستادى. نە ىستەۋ كەرەكتىگىن بىلمەيمىز, «نەگە بۇلاي؟» دەپ سۇراساق, سەبەبىن ەشكىم تۇسىندىرمەيدى. ءجۇرىپ-تۇرۋىمىز قيىنداپ كەتتى. قاشانعى وسىنداي كۇي كەشەمىز؟
– ابىلاي حان داڭعىلى, 6/5 تۇرعىن ءۇيىنىڭ سىرتقى جىلۋ تورابىنىڭ قۇرىلىسى جوباعا سايكەس ورىندالماعان. سوندىقتان ۇستىمىزدەگى جىلى لەۆ گۋميلەۆ اتىنداعى ەۋرازيا ۇلتتىق ۋنيۆەرسيتەتى ەسەبىنەن قاراجات ءبولىنىپ, جۇمىستار اتقارىلۋدا. جۇمىستاردى 30 قىركۇيەككە دەيىن اياقتاپ, ىستىق سۋمەن قامتۋ جۇيەسى قالپىنا كەلتىرىلەدى.
– اتى-ءجونىم ايدانا ەرجانقىزى. ەلباسى «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى ماقالاسىندا ەڭبەك قانا ادامدى جەتىستىكتەرگە جەتەلەيدى دەگەن وي ايتتى. وسىعان وراي پىكىرىڭىزدى بىلسەك دەپ ەدىك.
– ايدانا, ەلباسىمىزدىڭ بارشا قازاقستاندىقتارعا ارناعان باعدارلامالىق تاپسىرمالارىمەن بۇگىندە بارلىعىمىز تانىسپىز. باعدارلامادا الەمدىك باسەكەگە قابىلەتتىلىكتىڭ باستى فاكتورى – ەڭبەك ەكەندىگىن پرەزيدەنتىمىز باسا ايتتى.
ەلباسىمىز الەمدىك وركەنيەتتىڭ بارلىق قۇندىلىقتارى, بارلىق ەكونوميكالىق جانە مادەني بايلىقتار ادام ەڭبەگىمەن جاسالاتىندىعىن, ونى «كەيىنگە قالدىرۋعا بولمايتىندىعىن» اتاپ ءوتىپ, ءتيىستى ورىندارعا ناقتى تاپسىرمالار بەردى. مۇنداي شەشىمدى بارلىق قازاقستاندىقتار ءبىر ادامداي قولداۋعا ءتيىس دەپ ەسەپتەيمىن. حالقىمىز «ەڭبەك – ءبارىن دە جەڭبەك», «ەڭبەك ەتسەڭ ەرىنبەي, تويادى قارنىڭ تىلەنبەي» دەپ تەگىننەن-تەگىن ايتپاعان عوي.
قازىرگى زاماندا بارلىق وركەنيەتتى مەملەكەتتەر عىلىم مەن ءبىلىم, يننوۆاتسيالىق تەحنولوگيالارعا ارقا سۇيەپ وتىر, سولاردىڭ جەتىستىكتەرى ناتيجەسىندە الدىڭعى ەلدەر قاتارىندا كەلەمىز. ەلباسىمىز ءبىزدى دە وسىنداي جولمەن جۇرۋگە شاقىرادى. قانداي دا ءبىر جەتىستىككە قول جەتكىزۋ ءۇشىن ەڭ الدىمەن وقىتۋ ادىستەرىن قازىرگى زامانعا ساي ەتىپ, جاڭا تەحنولوگيالاردى بارلىق جەرلەردە قولدانۋ – باستى شارت دەپ ويلايمىن.
ارينە, ەڭبەك ەتكەن ادام عانا ءوزىنىڭ ماقساتتارىنا قول جەتكىزەتىنىن ءومىردىڭ ءوزى الدەقاشان دالەلدەدى. تەك ەڭبەكپەن عانا جەمىس ونبەك, تەك ەڭبەكپەن عانا بار قيىندىقتى جەڭەمىز. ءوز باسىم جۇرگەن جەرىمدە وسى ماسەلەنى ۇنەمى ءسوز ەتىپ, جاستارعا ەڭبەكتىڭ ءتۇبى بەرەكە ەكەنىن ايتىپ وتىرامىن. ءتىپتى, مىناۋ جىل سايىن قالا اكىمدىگىنىڭ ۇيىمداستىرۋىمەن وتكىزىلىپ جاتقان سەنبىلىكتىڭ دە تاربيەلىك ءمانى ەرەكشە. اركىم كۇرەك-كەتپەنىن قولىنا الىپ, تازالىق جۇمىستارىنا كىرىسكەندە اينالامىز اباتتانىپ قانا قويمايدى, سول جۇمىستى اتقارعان ادامداردىڭ ىشكى جان دۇنيەسى دە تازارىپ, جارقىراي تۇسەدى ەمەس پە؟! سوندىقتان, ادام ءوز ءۇيىنىڭ ءىشىن, بولمەلەرىن قالاي تازا ۇستاسا, ونىڭ كىرە بەرىسى مەن اۋلاسىنىڭ دا جيناقى بولۋىنا كوپ كوڭىل ءبولۋى كەرەك. جالپى, مەن قالا كوشەلەرىمەن كەلە جاتىپ, بوگدە بىرەۋلەردىڭ قوقىس لاقتىرىپ جاتقانىن كوزىم شالسا, ۋاقىتىمنىڭ تىعىزدىعىنا قاراماستان, الگى كىسىنى توقتاتىپ, تاستاعان زاتىن قوقىس جاشىگىنە سالعىزامىن. كەلەسى جولى بۇلاي ىستەمەۋىن, كەرىسىنشە ونىڭ دا وزگەلەردى تۋعان قالامىزدىڭ تازالىعىنا اتسالىسۋعا شاقىرىپ, اينالاعا جاناشىرلىقپەن قاراۋىن قاراپايىم تىلمەن ءتۇسىندىرىپ, ەسكەرتەمىن. ويتكەنى, تازالىق پەن ءتارتىپ – بۇگىنگى كۇننىڭ باستى تالابى.
– قايىرلى كۇن, ساپار اعا! جەكەمەنشىك ءۇيىم بار. سول ءۇيىمنىڭ قاسىنان ستو اشايىن دەپ ەدىم, اكىمدىكتەگىلەر رۇقسات بەرمەي قويدى. قانداي كومەك كورسەتە الاسىز؟
– بولىنگەن جەر ۋچاسكەسى ماقساتتى جوبا بويىنشا جەكە تۇرعىن ءۇي سالۋعا ارنالعان بولسا, باسقا ماقساتتاعى نىساندار سالۋعا رۇقسات ەتىلمەيدى.
– باس قالامىزداعى مارشرۋتتىق اۆتوبۋس قىزمەتكەرلەرى وتە دورەكى, تىم مادەنيەتسىز. كەيبىر اۆتوبۋس جۇرگىزۋشىلەرىنىڭ ءجۇرىپ كەلە جاتىپ, تەلەفونمەن سويلەسۋى, بىلاپىت سوزدەر ايتىپ, اركىمدى ءبىر بالاعاتتاۋى سەكىلدى كەلەڭسىزدىكتەرگە ءسات سايىن كۋا بولىپ جاتامىز. قاشان جولاۋشىلار تاسىمالىندا مادەنيەت, ءتارتىپ, ادەپ بيلىك قۇرىپ, جانىمىز جاي تابار ەكەن؟
– مۇنداي كەلەڭسىز جاعدايلاردى نازاردان تىس قالدىرماي, ۋاقىتىلى ءتيىستى مەكەمەلەرگە حابارلاپ وتىرماسا, مۇلدەم جويۋ مۇمكىن بولمايدى. سول ءۇشىن قالالىق جولاۋشىلاردى تاسىمالداۋ جانە اۆتوموبيل جولدارى باسقارماسىندا جانە اۆتوبۋس پاركتەرىندە ارنايى ديسپەتچەرلىك پۋنكتتەر اشىلعان. ولاردىڭ تەلەفوندارى ءاربىر اۆتوبۋستىڭ سالوندارىندا كورسەتىلۋى ءتيىس. №1 اۆتوبۋس پاركى ديسپەتچەرىنىڭ تەلەفونى – 54-16-45, ورتالىق ديسپەتچەرلىك پۋنكت تەلەفونى -29-00-49.
سىزدەردەن تۇسكەن فاكتىلەر بويىنشا ءتيىستى شارالار قولدانىلاتىن بولادى.
– قايىرلى كۇن, ساپار قايراتۇلى, ايتىڭىزشى الماتى اۋدانىنىڭ بيىلعى قىسقا دايىندىعى قالاي؟
–اۋدانىمىزدا 1200-دەن استام كوپقاباتتى ۇيلەر بار. بۇگىندە بارلىق تۇرعىن ۇيلەر, ءبىلىم بەرۋ, دەنساۋلىق ساقتاۋ مەكەمەلەرى مەن مادەنيەت ورتالىقتارى قىس مەرزىمىنە 100 پايىز دايىن. بارلىعى «استانا-تەپلوترانزيت» اق جىلۋ ماۋسىمىنا دايىندىقتارى تۋرالى قۇجاتتارىن الۋدا.
– مەن ەلوردامىزدىڭ وڭتۇستىك-شىعىس اۋدانىنداعى ارعاناتى كوشەسىندە تۇرامىن. ماڭايىمىزدا سۋ جوق. جولىمىز قاشان اسفالتتالادى؟
– ارعاناتى كوشەسىندە ورتالىقتاندىرىلعان سۋمەن قامتۋ قۇبىرى بار. ەگەردە ءسىزدىڭ ۇيىڭىزگە سۋ تارتۋ قاجەت بولسا, سىزگە تەگىن بەرىلەتىن تەحنيكالىق شارتتاردى الۋ ءۇشىن «استانا سۋ ارناسى» مكك-نە جۇگىنۋىڭىزگە بولادى. ارعاناتى كوشەسىنىڭ اقىرتاس كوشەسىنەن ق.امانجولوۆ كوشەسىنە دەيىنگى بولىگىنە اسفالت توسەلىنگەن, ال جالپى وڭتۇستىك-شىعىس شاعىن اۋدانىنىڭ وڭ جاعىنىڭ جولدارىن جوندەۋ بويىنشا قازىرگى تاڭدا جوبالاۋ-سمەتالىق قۇجاتتاماسى دايىندالۋدا.
– مەنىڭ اتىم – قىمبات. ءبىز استانا قالاسىنداعى كۇلتوبە كوشەسىنىڭ تۇرعىندارىمىز. وسى كوشەنىڭ قاسىندا كۇلتەگىن دەگەن كوشە دە بار. كوپشىلىك سول ەكى اتاۋدى ءجيى شاتاستىرىپ جاتادى. اسىرەسە, جەدەل جاردەم شاقىرتقاندا كوپ قينالامىز. سوندىقتان, سىزگە ۇسىنىس: وسى ارالىققا ءبىر سىلتەمە جاساپ, تاقتايشا ءىلىپ قويۋعا بولماس پا ەكەن؟
– قىمبات, ءۇيىڭىزدىڭ ءنومىرىن ايتىڭىز, ءبىزدىڭ ماماندار بارىپ, جاقىن ارادا تاقتايشا ورنالاستىرىپ بەرەدى.
– ساپار قايراتۇلى, سالەمەتسىز بە؟! سىزگە حابارلاسىپ تۇرعان احمەتوۆا ايزا قايراتقىزى. ءبىز استاناداعى برۋسيلوۆسكي – يمانوۆ كوشەلەرىنىڭ قيىلىسىنداعى ۇيدە تۇرامىز. وسى قيىلىسقا باعدارشام ورناتۋ جوسپارلارىڭىزدا بار ما؟ سەبەبى, بۇل قيىلىستا كولىك وتە كوپ, سوندىقتان برۋسيلوۆسكي كوشەسىنەن سولعا قاراي يمانوۆ كوشەسىنە بۇرىلۋ قيىندىق تۋدىرادى. وسى ماسەلەمەن استانا قالاسىنىڭ ىشكى ىستەر دەپارتامەنتىنە حابارلاسىپ ەدىم, بۇل اكىمدىكتىڭ ماسەلەسى دەپ جاۋاپ بەردى. ءسىز نە ايتاسىز؟
– 2011 جىلدان باستاپ استانا قالاسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ تاپسىرىسى بويىنشا «گوردوررەمستروي» جشس مەردىگەرلىك مەكەمەسىنىڭ قاتىسۋىمەن يمانوۆ كوشەسىنىڭ ءۋاليحانوۆ كوشەسىنەن يانۋشكەۆيچ كوشەسىنە دەيىنگى بولىگىندە جول جوندەۋ جۇمىستارى جۇرگىزىلىپ جاتىر.
اتالعان باسقارمانىڭ مالىمەتى بويىنشا برۋسيلوۆسكي –يمانوۆ كوشەلەرى قيىلىسىندا باعدارشام ورناتۋ 2013 جىلعا جوسپارلانعان.
گۇلبارشىن وكەشقىزى
