استانالىق مۇمكىندىگى شەكتەۋلى جاندار «باستاڭعى» جاساپ, «تيفليس» مەيرامحاناسىندا باس قوستى.
– قىز-كەلىنشەكتەر مەن انالار مەرەكەسىنىڭ قارساڭىندا باس قوسۋىمىزدىڭ ءبىر سەبەبى – جاڭا جوبالارىمىزبەن تانىستىرۋ, مۇگەدەكتەر ماسەلەسىنە قاتىستى سۇراقتاردى ءوز ورتامىزدا تالقىلاۋ. بۇل ءىستىڭ وڭ باسۋىنا عانا ەمەس, ارقايسىمىزدىڭ كوڭىلىمىزدە ءۇمىت وياتىپ, جىگەرلەندىرە تۇسەدى. كەڭ جەردە كەزدەسىپ, تاعدىرلاس ادامدارمەن ارالاسىپ, مىنا دۇنيەدە جالعىز ەمەس ەكەندىگىمىزگە كوز جەتكىزۋ ارقىلى ءبىر-ءبىرىمىزدىڭ جىگەرىمىزدى جانيمىز. ونىڭ بىزدەي جاندارعا كوپ سەپتىگى بار, – دەيدى «دوس» تاۋەلسىز ءومىر» ورتالىعىنىڭ ءتورايىمى دينا ەرديلدينوۆا.
باستاڭعىنىڭ باستى قوناقتارىنىڭ ءبىرى – استانا قالاسى كاسىپكەرلەر پالاتاسى ديرەكتورىنىڭ الەۋمەتتىك ماسەلەلەر جونىندەگى ورىنباسارى ايتۋعان وماروۆ: «شىنىن ايتۋ كەرەك, مۇمكىندىگى شەكتەۋلى ازاماتتاردىڭ ورتاسىندا بولعان سايىن, ولاردىڭ رۋحىنىڭ بيىكتىگىنە ءتانتى بولامىن. قول-اياعى امان, دەنى-قارى ساۋ بولسا دا تەگىس جەردە سۇرىنەتىن تالاي ازاماتتارىمىزعا ۇلگى بولىپ, ومىرگە دەگەن كوزقاراسىن وزگەرتۋگە ناق وسى جاندار سەبەپكەر دەۋگە بولادى. كاسىپكەرلەر مۇمكىندىگى شەكتەۋلى ازاماتتاردىڭ جاعدايىمەن جاقسى تانىس. ولاردىڭ بيزنەسكە تالپىنىسىن تۇسىنىستىكپەن قابىلدايدى. قولدارىنان شىققان تۋىندىلارى مەن قىزمەت تۇرلەرىن نارىققا شىعارىپ, تۇتىنۋشىسىن تابۋعا كومەكتەسۋدى موينىمىزعا الىپ وتىرمىز. وسى رەتتە, بىرىگىپ جاسايتىن جۇمىستارىمىز ءوز ناتيجەسىن بەرەدى دەپ ويلايمىن» دەپ, ءوز ويىمەن ءبولىستى.
باسقوسۋدا بەلگىلى بولعانداي, تەك ەستۋ-سويلەۋ جاعىنان كەمىستىگى بار مۇگەدەكتەردىڭ قالانىڭ قۇرىلىس الاڭدارىندا ەڭبەك ەتۋگە دەگەن ىقىلاسى جاڭا جوبالاردىڭ اشىلۋىنا تۇرتكى بولۋدا. استانالىق تانىمال قۇرىلىس كومپانيالارىمەن كەلىسىمگە كەلە وتىرىپ, تاپشى كاسىپكە ۇيرەتىپ, تۇراقتى جۇمىسقا ورنالاستىرۋدى قالالىق كاسىپكەرلەر پالاتاسى جۇزەگە اسىرماق ەكەن.
ال, رەسپۋبليكالىق نەيروحيرۋرگيا ورتالىعىنىڭ دارىگەرى جومارت قاماروۆ: «الەمدىك تاجىريبەدە مۇمكىندىگى شەكتەۋلى جانداردىڭ ءومىرىن جەڭىلدەتۋ ءۇشىن نەيروستيمۋلياتور قوندىرعىسى قولدانىلادى. قۇنى ءۇش ميلليوندىق قۇرىلعىلار ومىرتقا جۇلىنى زاقىمدانعانداردىڭ اعزاسىنداعى كەيبىر اۋىتقۋشىلىقتاردى جويادى. ونى ناۋقاستارعا تەگىن ورناتىپ, جۇيەلى تۇردە مەديتسينالىق باقىلاۋدا ۇستايمىز. مۇنداي جانداردى ءبىزدىڭ ورتالىقتا ەمدەۋ, وڭالتۋ ماسەلەلەرى دە وڭ شەشىمىن تاۋىپ كەلە جاتىر» دەيدى.
ويدى وي قوزعايدى. راسىندا, مۇمكىندىگى شەكتەۋلى جانداردىڭ اراسىندا ومىرگە ەسەسى كەتىپ, اشىنعان جان جوقتىڭ قاسى. ماڭدايىنا جازعانعا ءۇنسىز كونىپ, ارەكەتسىز مويىنسۇنۋ دا بۇلارعا جات ەكەن. الا تاڭدى كوزىمەن اتىرىپ, سىرقاتى جانىنا باتقانىن دا ايتىپ جاتپايدى. مۇنداي جاندار بارلىق ءىلتيپات پەن قامقورلىققا لايىق.
ايگۇل ۋايسوۆا
