ەلوردادا تاكسي قىزمەتىنە تالاپ كۇشەيىپ, قالا اكىمدىگى قاۋىپسىز تاكسي قىزمەتىنە ەرەكشە دەن قويا باستادى. قالا كوشەلەرىنە ەكونوم, ستاندارت جانە بيزنەس-كلاستاعى مىڭنان اسا كولىك شىقپاق. بىرىڭعاي تاكسيدىڭ سالونىندا تولەم كارتاسىن قابىلدايتىن تەرمينال, تاكسومەتر جانە wi-fi ورناتىلادى.
باس قالادا تاكسي قىزمەتىنە سۇرانىس كوپ. دىتتەگەن جەرىڭىزگە جەدەل جەتكىڭىز كەلسە, كەز كەلگەن تاكسيگە ءمىنىپ كەتە بەرەسىز. باعاسى دا قولجەتىمدى. ولاردىڭ قاتارىندا زاڭدى تاكسي پاركتەرىنىڭ جۇرگىزۋشىلەرى دە, «جابايى» تاكسي دە بار.
ءبىر جاقىن دوسىم – تاكسي جۇرگىزۋشىسى. سول قىزمەتىمەن استانادا ادام تاسىپ, وتباسىن اسىرايدى. تاپقان تابىسىنىڭ تەڭ جارىمىن جالداپ وتىرعان باسپاناسى مەن جاڭادان العان كولىگىنىڭ كرەديتىنە تولەيدى. ايتەۋىر, وسى جۇمىستان كەتكىسى جوق. «ۇيرەنىپ قالعام, وزىمە ۇنايدى» دەپ ءبىر جىميىپ قويادى. راسىمەن دە بۇگىنگى تاڭدا تاكسي كوپتەگەن ازاماتتاردىڭ نەگىزگى تابىس تابۋ كوزىنە اينالدى.
تاكسي قىزمەتىنىڭ كورىگى تۇنگى ۋاقىتتا قىزادى. تاڭ اتقانشا كوز ىلمەي جۇمىس ىستەيتىندەر كوپ. اسىرەسە, سونداي كەزدە جابايى تاكسيستەردىڭ ايى وڭىنان تۋادى. ولار ادامدار كوپ شوعىرلانعان ورىنداردا جۇرەدى. ماسەلەن, ۆوكزال, اۋەجاي, ۇلكەن ساۋدا ورىندارى الدىندا زاڭسىز اۆتوتۇراق جاساپ العاندار بارشىلىق. «جابايى» تاكسيستەرگە ءمىنۋ ءبىر جاعىنان قاۋىپتى. جولدان كەزىككەن كەز كەلگەن ماشيناعا ءمىنىپ, ءتۇرلى جاعدايعا ۇشىراپ جاتقان جاندار ەلىمىزدە كوپ. سوندىقتان, جولاۋشىلاردىڭ قاۋىپسىزدىگى الاڭداتادى.
بيىلعى جىلدىڭ ءساۋىر ايىندا وتكەن استانا قالاسىنىڭ الەۋمەتتىك-ەكونوميكالىق دامۋى مەن ەكسپو كورمەسى ماسەلەلەرىنە ارنالعان كەڭەستە مەملەكەت باسشىسى ەلورداداعى تاكسي قىزمەتىنە توقتالا كەلىپ: «ءالى كۇنگە دەيىن زاماناۋي تاكسي قىزمەتى جوق. «ەكوتاكسيدى» الماعاندا, بارلىق تاكسيلەر الا-قۇلا, تاكسومەترسىز, سىرتقى ءتۇرلەرىنىڭ ستاندارتى, بىرىڭعاي كيىم فورماسى جوق» دەگەن ەدى.
قازىرگى تاڭدا ەلوردا حالقىنىڭ سانى ميلليونعا جاقىندادى. ەلىمىزدەگى ءىرى مەگوپوليس دەسە دە بولادى. سول تالاپقا سايكەس باس قالاداعى تاكسي قىزمەتى دە جوعارعى دەڭگەيدە بولۋى قاجەت. وسىنى ەسكەرگەن ەلوردا اكىمدىگى زاڭدى جۇمىس ىستەپ جۇرگەن تاكسيلەرگە بىرىڭعاي تالاپتار ەنگىزبەك. جۇرگىزۋشىلەر ءجۇرۋ ەرەجەلەرىن قاتاڭ ءبىلۋ قاجەت. جولاۋشىلارمەن مادەنيەتتى
ءتىل تابىسۋ كەرەك. ۋاقىت تالابىنا ساي اعىلشىن ءتىلىن دە مەڭگەرگەن ءجون. ويتكەنى, الدىمىزدا بارلىق الەم كوز تىگىپ وتىرعان «ەكسپو–2017» حالىقارالىق كورمەسى كەلە جاتىر.
«استانا LRT» جشس جولاۋشى كولىگى باسقارماسىنىڭ جەتەكشىسى بەيبىت ەسجانوۆتىڭ ايتۋىنشا, ەلورداداعى تاكسي جەلىسىن جەتىلدىرۋگە ارنالعان جوبا «City taxi» دەپ اتالادى. «تاكسيدىڭ سىرتقى ءتۇرى بىرىڭعاي فورماتتا بەكىتىلۋى كەرەك. سونىمەن قاتار وسى قىزمەت ءتۇرى ليتسەنزيالانۋى قاجەت. بۇل ليتسەنزيانى الۋ ءۇشىن جۇرگىزۋشى الدىمەن ءتيىستى مامانداندىرىلعان وقۋ ورنىندا بىلىكتىلىگىن جەتىلدىرۋگە مىندەتتى بولادى» دەيدى بەيبىت ەسجانوۆ.
اتالعان جوبا اياسىندا تاكسي ينفراقۇرىلىمىن دامىتۋ كوزدەلگەن. بۇگىندە قالا بويىنشا تاكسيلەرگە ارنالعان 47 ورىن جاساقتالعان, الداعى ۋاقىتتا ولاردى 300-گە دەيىن ارتتىرۋ كوزدەلگەن.
اسىلى, تاكسي قىزمەتى نارىقتىق قاتىناستار زاڭىنا باعىنعان. بۇگىندە استانادا جەڭىل كولىكتەرمەن جولاۋشىلار جانە شاعىن جۇك تاسىمالداۋمەن اينالىساتىن 14 تاكسي پاركى تىركەلگەن. وسىدان ءتورت جىل بۇرىن پايدالانۋعا بەرىلگەن «استانا ەكو تاكسي» قالالىق تاكسوپاركى قىزمەتى جونىندە جۇرتشىلىق جىلى پىكىردە. ولاردىڭ قىزمەت كورسەتۋ دەڭگەيى ايتارلىقتاي. كولىكتەردىڭ بارلىعى ۋاقىت تالابىنا ساي جاراقتالعان. ەكولوگيالىق وتىنمەن جۇرەدى.
جولاۋشىلاردىڭ قاۋىپسىزدىگى دە قورعالعان. بيىلعى جاڭا جىلدان باستاپ استانا اۋەجايىندا جولاۋشىلاردى رەسمي تاسىمالداۋشى رەتىندە «ەكوتاكسي» ءوز قىزمەتىن جۇزەگە اسىرا باستادى. ونىڭ قىزمەتكەرلەرى جولاۋشىلاردى قارسى الىپ, كەڭەس بەرەدى.
ءبىز وسى جەردە ەلورداداعى «كەرۋەن» ساۋدا ويىن-ساۋىق ورتالىعىنىڭ الدىندا «استانا Company KZ» جشس تاكسي ءجۇرگىزۋشىسى ساكەن بولات دەگەن ازاماتپەن كەزدەسىپ, پىكىرلەسكەن ەدىك.
– وسى مەكەمەدە ەكى جىلدان بەرى جۇمىس ىستەيمىن. ءبىز ادامدارعا تاۋلىك بويى قىزمەت كورسەتەمىز. ارينە, جۇرگىزۋشىلەر اۋىسىممەن اۋىسىپ وتىرادى. استانادا تاكسي قىزمەتىندە باسەكەلەستىك كۇشتى. اسىرەسە, جابايى تاكسيلەر الدىمىزدى ورايدى. سوندا دا ءوز كليەنتتەرىمىزدىڭ كوڭىلىن قالدىرمايمىز. ءبىزدىڭ فيرمادا 30-عا جۋىق ماشينا بار. ولاردىڭ بارلىعى زاڭدى قىزمەت كورسەتەدى. جولاۋشىعا شەك بەرەمىز. كۇنىنە كومپانياعا ماشينانى جالعا العان ءۇشىن بەس جارىم مىڭ تولەيمىز. ونىڭ سىرتىندا جانارماي بار, ديسپەتچەر قىزمەتى دە اقىلى. قالعان تابىسىمىزبەن وتباسىمىزدى اسىرايمىز. ارنايى قىزمەت كيىم كيەمىز. «ەكسپو-2017» حالىقارالىق كورمەسىنە مۇقيات دايىندالىپ جاتىرمىز. كولىكتەرىمىز دە جاڭارادى, – دەيدى ول.
قورىتا كەلگەندە, ەلورداداعى تاكسي قىزمەتىنە تالاپ كۇشەيمەك. ونىڭ بارلىعى ادامداردىڭ قاۋىپسىزدىگى مەن جايلىلىعى ءۇشىن اتقارىلىپ جاتقان ىزگىلىكتى ءىس دەۋگە بولادى.
ازامات ەسەنجول
