ءتىل – تۇتاستىعىمىزدىڭ تىرەگى
حالىق پەن حالىقتىڭ قارىم-قاتىناسىن ارتتىرىپ, ۇلت پەن ۇلىستى ۇندەستىرەتىن, جالپاق جۇرتتى جاقىنداستىراتىن, بارشامىزدى ءبىر-بىرىمىزبەن بايلانىستىراتىن باستى قۇرال – ءتىل. الاش ارىسى احمەت بايتۇرسىنوۆ حح عاسىر باسىندا «ءتىلى جوعالعان ۇلتتىڭ ءوزى دە جوعالادى» دەپ كەسىپ ايتقان. بۇگىندە قوعامدا قوردالانىپ, تالايلاردىڭ تالاس-تارتىسىن تۋدىرىپ جۇرگەن ەڭ ۇلكەن ماسەلە دە وسى. جاھاندانۋ داۋىرىندە سالت-ءداستۇرىمىزدىڭ ءسات سايىن سانادا جاڭعىرۋى, ءتىلىمىزدىڭ ۋاقىت كوشىنەن قالماي, وركەنيەت تالاپتارىنا ساي دامۋى ۇلتجاندى قاۋىمدى الاڭداتاتىپ وتىرعان ماسەلەلەردىڭ ءبىرى.
قازاقستان رەسپۋبليكاسى پرەزيدەنتىنىڭ 1998 جىلعى 20 قاڭتارداعى جارلىعىمەن قىركۇيەكتىڭ ءۇشىنشى جەكسەنبىسى «قازاقستان حالقى تىلدەرىنىڭ كۇنى» دەپ بەلگىلەنگەن. وسىعان سايكەس رەسپۋبليكا كولەمىندە قازاق ءتىلىن كەڭىنەن ناسيحاتتاۋ نازارعا الىنىپ, جىل سايىن قازاقستان حالقى تىلدەرىنىڭ فەستيۆالىن وتكىزۋ ءداستۇرگە اينالدى. ەلوردامىزداعى بيىلعى XVI قالالىق ءتىل فەستيۆالدىڭ اشىلۋ سالتاناتى 5 قىركۇيەكتە «استانا» ۇلتتىق سۋرەت گالەرەياسىندا ءوتتى.
بۇل شاراعا زيالى قاۋىم وكىلدەرى, قر پارلامەنت ءماجىلىسىنىڭ جانە استانا قالالىق ءماسليحاتىنىڭ دەپۋتاتتارى, ارداگەرلەر, مەملەكەتتىك مەكەمەلەردىڭ, ۇلتتىق-مادەني ورتالىقتار مەن «مەملەكەتتىك ءتىل» قوعامدىق قوزعالىسىنىڭ, «قازاق ءتىلى» قوعامىنىڭ, ۇكىمەتتىك ۇيىمداردىڭ باسشىلارى, مەكتەپ وقۋشىلارى مەن جوو-نىڭ ستۋدەنتتەرى, استانا قالاسىنداعى 68\665 اسكەري ءبولىمىنىڭ قۇرمەت-قاراۋىل روتاسىنىڭ ساربازدارى قاتىستى.
مەملەكەتتىك ءتىلدىڭ مارتەبەسىن اسىرىپ, قوعامداعى ءرولىن ارتتىرۋ, قولدانىس اياسىن كەڭەيتۋ, ۇلتتىق قۇندىلىقتاردى ناسيحاتتاۋ ماقساتىندا ۇيىمداستىرىلعان مەرەكەلىك كونتسەرتكە ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ارتىستەرىنىڭ قاتىسىپ, ادەبي قويىلىمدار كورسەتتى. باۋىرجان يساەۆ, مارجان اراپباەۆا, جاڭاباي وتەگەنوۆ سىندى جاس انشىلەر جيىلعان جۇرتشىلىققا اسەم اۋەن تارتۋ ەتتى. سونداي-اق, «ناز» بي تەاترىنىڭ ءبيشىلەرى ساحنادا قازاقتىڭ كوركەم ءبيىن مىڭ بۇرالا بيلەسە, ايتىستىڭ اقتاڭگەر اقىندارى بالعىنبەك يماشەۆ پەن اسەم ەرەجەپقىزى ايتىسىپ, ۇلتىمىزدىڭ ۇلاعاتىن, جالپى قازاق رۋحانياتىنىڭ كوكەيكەستى ماسەلەلەرىن جىرلارىنا ارقاۋ ەتتى.
قۋات قيىقباي