ۇلىستىڭ ۇلى كۇنى قارساڭىندا ەلورداداعى №46 «سامال» ساناتوريالىق بالاباقشاسىندا «تورلەت, ناۋرىز, تورىمە!» اتتى مەرەكەلىك دۋمان بولىپ ءوتتى.
الدىمەن بالالار مەن ارنايى شاقىرىلعان قوناقتار ءۇشىن مەرەكەلىك داستارحان جايىلدى. ال, مەرەكەنىڭ شىرايىن وسىندا تاربيەلەنەتىن بالالاردىڭ وزدەرى كىرگىزدى. اتاپ ايتقاندا, ولار ءان سالىپ, بي بيلەگەندە قوناقتار اسا ريزاشىلىقپەن قوشەمەت ءبىلدىردى. بالالار قازاقتىڭ «تۇساۋكەسەر» جانە «توقىمقاعار» داستۇرلەرىن كورسەتكەندە اتا-اجەلەر اق باتالارىن بەرىپ جاتتى.
بالدىرعانداردىڭ ونەرىن تاماشالاۋعا كەلگەندەر اراسىندا قالالىق «ادىلەت» كاسىپوداق ۇيىمىنىڭ ءتورايىمى بالسۇلۋ ناۋرىزباەۆا, پروفەسسور, پەداگوگيكا عىلىمىنىڭ دوكتورى كۇلان يبراەۆا, «مەكتەپكە دەيىنگى بالالىق شاق» رەسپۋبليكالىق ورتالىعىنىڭ باس مامانى جاننا بليكوۆا بولدى.
مەرەكەلىك شارادا پەداگوگتاردان قۇرالعان «اجەلەر ءانسامبلى» اۋىلدىڭ التى اۋىزىن شىرقاسا, بەلگىلى ءانشى كلارا تولەنباەۆا تامىلجىتىپ ءان سالدى. ادىسكەر ج.قاناپينا بالالارمەن بىرگە «دومبىرا» ءانىن ورىنداعاندا كوپشىلىك دۋىلداتا قول سوقتى. بالاباقشا مەڭگەرۋشىسىنىڭ باستاماسىمەن جانە اتا-انالاردىڭ قولداۋىمەن وتكەن ايتۋلى شارا بالالاردىڭ دا, كەلگەن قوناقتاردىڭ دا كوڭىل-كۇيىن كوتەردى. وسىنداي تاعىلىمدىق ءارى تانىمدىق ءىس-شارالاردىڭ ءجيى ءوتىپ تۇرعانى بالالاردىڭ ۇلتتىق سانا سەزىمىن قالىپتاستىرۋعا زور ىقپال ەتەرى ءسوزسىز.
