مەملەكەت باسشىسىنىڭ تاپسىرماسى بويىنشا 2021 جىلدان باستاپ ەلوردادا بالالارعا ارنالعان ۇيىرمەلەردىڭ قولجەتىمدىلىگىن قامتاماسىز ەتۋگە باعىتتالعان مەملەكەتتىك شىعارماشىلىق جانە سپورتتىق تاپسىرىس ىسكە اسىرىلۋدا. جوبانى ىسكە اسىرۋ باستالعاننان بەرى, ياعني 3 جىل ىشىندە شىعارماشىلىق تاپسىرىس بويىنشا 26 مىڭنان اسا بالانى تەگىن شىعارماشىلىق ۇيىرمەلەرىمەن قامتۋعا مۇمكىندىك بەرىلدى. وسى باعىتتا بيۋدجەتتەن 10 ميللياردقا جۋىق قارجى ءبولىندى. قازىر ەلوردادا شىعارماشىلىق باعىتتاردىڭ 50 ءتۇرى بويىنشا 713 ۇيىرمە بار. وعان 343 جەتكىزۋشى قىزمەت كورسەتەدى.
كەشە استانا قالاسى ءماسليحاتىنىڭ توراعاسى ەرلان كاناليموۆتىڭ توراعالىعىمەن وتكەن ەلوردا ءماسليحاتىنىڭ كەزەكتى سەسسياسىندا ءبىرقاتار ماڭىزدى ماسەلە قارالدى. سونىڭ نەگىزگىسى: مەملەكەتتىك سپورتتىق جانە شىعارماشىلىق تاپسىرىستى ىسكە اسىرۋ ماسەلەلەرى بويىنشا قالا اكىمىنىڭ ورىنباسارى ەسەت بايكەن بايانداما جاسادى.
– مەملەكەت باسشىسىنىڭ تاپسىرماسى بويىنشا 2021 جىلدان باستاپ ەلوردادا بالالارعا ارنالعان ۇيىرمەلەردىڭ قولجەتىمدىلىگىن قامتاماسىز ەتۋگە باعىتتالعان مەملەكەتتىك شىعارماشىلىق جانە سپورتتىق تاپسىرىس ىسكە اسۋدا. جوبانى ىسكە اسىرۋ باستالعاننان بەرى, ياعني 3 جىل ىشىندە شىعارماشىلىق تاپسىرىس بويىنشا 26 مىڭنان استام بالانى تەگىن شىعارماشىلىق ۇيىرمەلەرىمەن قامتۋعا مۇمكىندىك بەرىلدى. وسى باعىتتا بيۋدجەتتەن 10 ميللياردقا جۋىق قارجى ءبولىندى. قازىر ەلوردادا شىعارماشىلىق باعىتتاردىڭ 50 ءتۇرى بويىنشا 713 ۇيىرمە بار. وعان 343 جەتكىزۋشى قىزمەت كورسەتەدى, – دەدى ەسەت بايكەن.
ونىڭ ايتۋىنشا, مەملەكەتتىك سپورتتىق تاپسىرىس اياسىندا تەگىن ۇيىرمەلەرمەن 26 مىڭنان استام بالا قامتىلدى. باعدارلاما باستالعالى بۇعان قالا بيۋدجەتىنەن 11,7 ملرد تەڭگە ءبولىندى. قازىر سپورتتىڭ 31 ءتۇرى بويىنشا 930 سەكتسيا جۇمىس ىستەيدى, ال قىزمەتتى جەتكىزۋشىلەر سانى – 337.
2021-2022 جىلدارى مەملەكەتتىك شىعارماشىلىق تاپسىرىس «ارتسپورت» پلاتفورماسىندا جۇزەگە استى. وتكەن جىلدان بەرى بۇل تاپسىرىس «دامۋ بالا» پلاتفورماسىندا ىسكە اسۋدا. جالپى مەملەكەتتىك شىعارماشىلىق جانە سپورتتىق تاپسىرىسقا وسى جىلدىڭ جارتىجىلدىعىنا 8 ملرد تەڭگە ءبولىندى. بۇل قارجى 52 مىڭ ۆاۋچەردى, ياعني وسىنشاما بالانى قامتۋعا باعىتتالعان. ال جالپى بيىل ءتيىستى جۇمىسقا قالا بيۋدجەتىندە 14 ملرد تەڭگە قاراستىرىلعان.
قالا اكىمىنىڭ ورىنباسارى الدىندا بۇل باعىتتا بىرقاتار ماسەلە تۋىنداعانىن, اكىمدىك ولاردى ءساتتى شەشە بىلگەنىن مالىمدەدى. اتاپ ايتقاندا, 2023 جىلعا دەيىن ۆاۋچەرلەر تەك قانا «ارتسپورت» پلاتفورماسىندا بەرىلەتىن. سول ۋاقىتتا قىزمەتتى جەتكىزۋشى وتە كوپ تاپسىرىس ورنالاستىرىپ, قالا بيۋدجەتى ونى كوتەرمەي قالدى. تاپسىرىستار بەلگىلەنگەننەن ەكى ەسە اسىپ كەتكەن. سوعان قاراماستان, قالالىق ءماسليحاتتىڭ قولداۋىمەن قالا اكىمدىگى بۇل ماسەلەنى شەشتى. سونداي-اق ۆاۋچەرلەر, قىزمەتتى جەتكىزۋشىلەر بويىنشا دا پروبلەمالار تۋىنداعان. ولار دا شەشىلدى.
– قازىر ەلورداداعى كوشى-قون مەن سابيلەردىڭ دۇنيەگە كەلۋ دەڭگەيى بارشاعا بەلگىلى. باقىتىمىزعا وراي, جىل سايىن استانادا 35 مىڭنان استام بالا تۋادى. بۇعان قوسا, وسىنشاما بالا وڭىرلەردەن كوشىپ كەلەدى. ياعني ىشكى كوشى-قون جاقسى دامىعان. بيىل, ماسەلەن, 1-سىنىپقا 30 مىڭنان استام بالا قابىلداۋدى جوسپارلاپ وتىرمىز. بۇدان بۇرىن 20 مىڭ بالا العاش مەكتەپ تابالدىرىعىن اتتايتىن. سوندىقتان مەملەكەتتىك شىعارماشىلىق جانە سپورتتىق تاپسىرىسقا سۇرانىس ودان سايىن ارتادى دەپ بولجاپ وتىرمىز. سول كەزدە بيۋدجەتتەن وعان بولىنەتىن قارجى دا كوبەيەدى, – دەدى ەسەت بايكەن.
ونىڭ ايتۋىنشا, قازىر دەرەكتەردى تالداۋ جانە باسقا اقپاراتتىق جۇيەلەرمەن بىرىكتىرۋ بويىنشا قالالىق تسيفرلاندىرۋ جانە مەملەكەتتىك قىزمەت باسقارماسى, دەنە شىنىقتىرۋ جانە سپورت باسقارماسى, مادەنيەت باسقارماسى بىرىگىپ جۇمىس ىستەپ جاتىر. اتاپ ايتقاندا, «ميندال», «ينديگو» جانە وزگە دە قوسىمشا بىلىمگە قاتىستى پلاتفورمالار «دامۋ بالا» پلاتفورماسىمەن بىرىگەدى.
– «دامۋ بالا» پلاتفورماسى قالا اكىمدىگىنىڭ سەرۆەرىندە ورنالاسقان. ياعني اكىمدىكتىڭ مۇلكى, ونداعى مالىمەتتەر ەشقايدا جوعالمايدى. ءتيىستى ەرەجە بويىنشا ءبىر بالاعا ءبىر ۆاۋچەر بەرىلۋى كەرەك. قازىر قالادا ءبىر بالاعا ەكى ۆاۋچەر بەرىلگەنى, ياعني ول تەگىن ەكى ۇيىرمەگە بارادى دەگەن اڭگىمە ايتىلىپ جاتىر. الەۋمەتتىك شيەلەنىس پەن تۇرعىنداردىڭ نارازىلىعىن تۋدىرماس ءۇشىن قاتارداعى سپورتشىلار مەن شىعارماشىلىقپەن اينالىساتىن بالالاردان ارتىق ۆاۋچەرلەردى الىپ قويمادىق. بىراق بولاشاقتا اقپاراتتىق جۇيەلەر بىرىكتىرىلگەندە, بۇل ماسەلە مۇقيات قاداعالانادى, – دەدى اكىم ورىنباسارى.
بالالاردىڭ تەگىن ۇيىرمەدەگى ساباققا ناقتى قاتىسۋىن اتا-انالار ەلەكتروندى-تسيفرلىق قولتاڭبامەن راستاۋ كەرەك. بۇل ماسەلەدە قىزمەتتى جەتكىزۋشى مەن اتا-انالار ءوزارا كەلىسىپ, جالعان مالىمەت بەرگەن جاعدايلار كەزدەسكەن. ياعني اقپاراتتىق جۇيەدە وتىرىك دەرەكتەردى ەنگىزۋدەن قورعايتىن تەتىك جوق.
ەسەت بايكەننىڭ ايتۋىنشا, اتالعان ماسەلەنى شەشۋ ءۇشىن تەگىن ۇيىرمە عيماراتتارىندا مەكتەپتەردەگىدەي تۋرنيكەت ورناتۋ ماسەلەسى قاراستىرىلىپ جاتىر. بىراق قىزمەتتى جەتكىزۋشى شىعىندانبايدى, ءتيىستى جۇمىس پەن قارجىنى موينىنا الاتىن ينۆەستور ىزدەستىرىلۋدە. ەلوردا اكىمدىگى بۇل تاراپتا قىزىلوردا وبلىسىنىڭ ءتاجىريبەسىن زەرتتەگەن. سىر ءوڭىرى وسى باعىتتا ءبىر جىل ىشىندە 3 ملرد تەڭگەدەن استام قارجىنى ۇنەمدەگەن.
– سىر وڭىرىندە جانە ەلوردادا تەگىن ۇيىرمەمەن قامتىلعان بالالاردىڭ سانى, ارينە, سايكەس كەلمەيدى. بۇل تاراپتا استانادا الدەقايدا كوپ قارجى ۇنەمدەلەدى دەپ بولجاۋعا بولادى. وسى ۇنەمدەلگەن قارجىنى باعدارلاماعا قايتا سالىپ, تەگىن ۇيىرمەلەرمەن قامتىلاتىن بالالاردىڭ سانىن كوبەيتۋگە بولادى. قىزمەتتى جەتكىزۋشىلەر دە كوبىرەك تابىس تاۋىپ, جاڭا جۇمىس ورىندارىن اشۋعا مۇمكىندىك الار ەدى, – دەدى ەسەت بايكەن.
قالا اكىمىنىڭ ورىنباسارى مەملەكەتتىك سپورتتىق تاپسىرىستى ىسكە اسىرۋ بويىنشا كوممۋنالدىق مەملەكەتتىك مەكەمە قۇرۋ قاجەتتىگى تۋىنداعانىن جەتكىزدى. وتكەن جىلى قالا ءماسليحاتىنىڭ قولداۋىمەن قالالىق مادەنيەت باسقارماسىنىڭ جانىنان مەملەكەتتىك شىعارماشىلىق تاپسىرىستى ىسكە اسىراتىن وسىنداي مەكەمە اشىلعانىن باياندادى. بۇل ديرەكتسيا تەگىن ۇيىرمەلەر بويىنشا قارجى وپەراتسيالارىن جۇرگىزىپ, ساپانى باقىلايدى.
استانا قالاسى ءماسليحاتىنىڭ دەپۋتاتى, ءماسليحاتتىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسيا مۇشەسى ساۋلە ساميدين بالالارعا قوسىمشا ءبىلىم بەرۋ جانە سپورتقا بەيىمدەۋ ماسەلەلەرىنە توقتالدى. ونىڭ مالىمەتىنشە, استانا قالاسىندا قازىر سپورتپەن 50 مىڭعا جۋىق بالا نەمەسە ولاردىڭ جالپى سانىنىڭ 15,9 پايىزى اينالىسادى. سونىڭ 10,7 پايىزى «ارتسپورت» پلاتفورماسى ارقىلى تەگىن ۇيىرمەلەرگە بارادى. دەپۋتات ەرەكشە قاجەتتىلىگى بار بالالارعا ۆاۋچەر بەرۋ ماسەلەسىن كوتەردى.
قالالىق ءماسليحاتتىڭ باسقا دا دەپۋتاتتارى مەملەكەتتىك شىعارماشىلىق جانە سپورتتىق تاپسىرىس ماسەلەسىنە ءوز كوزقاراسىن ءبىلدىرىپ, قالا اكىمىنىڭ ورىنباسارىنا سۇراقتار قويدى, ساۋالدارىنا ءتيىستى جاۋاپتار الدى.
