نۇر-سۇلتان قالاسىنىڭ اكىمى التاي كولگىنوۆ قولعا العان وزەكتى ماسەلەنىڭ ءبىرى – پروبلەمالى ۇلەستىك قۇرىلىس نىساندارى بولىپ وتىر. كۇنى كەشە قالانى ارالاۋ بارىسىندا ەلوردا باسشىسى قۇرىلىسى توقتاپ قالعان «گارانت», «كومفورت de Luxe» تۇرعىن ءۇي كەشەندەرى ۇلەسكەرلەرىمەن كەزدەسىپ, اڭگىمەلەستى.
وسى كۇندەرى ەلوردا اكىمدىگىنىڭ ۆەدومستۆوارالىق كوميسسياسى جۇمىسىنىڭ ناتيجەسىندە وتكەن جىلى تۇيتكىل تۋدىرعان 62 ۇلەسكەرلىك نىساننىڭ باسىم بولىگىنىڭ ماسەلەسى شەشىلدى. قازىرگى كەزدە 29 نىسان ۇزدىكسىز باقىلاۋدى قاجەت ەتەدى. بۇل نىساندار بويىنشا نەگىزگى جۇمىستى «ەلوردا قۇرىلىس كومپانياسى» جشس اتقارىپ وتىر. اتاپ ايتقاندا, قارجىلىق جانە تەحنيكالىق اۋديت جاسالىپ, جوبالىق-سمەتالىق قۇجاتتاما ءتيىستى ساراپتامامەن ازىرلەنۋى كەرەك. ودان كەيىن اتالمىش نىساندار «نۇرلى جەر» تۇرعىن ءۇي قۇرىلىسى باعدارلاماسىنا ەنگىزىلەدى. وعان 40 ملرد تەڭگە قاراستىرىلدى. جالپى پروبلەمالى تۇرعىن ءۇي كەشەندەرى قۇرىلىسىن اياقتاۋ بويىنشا جول كارتاسى تۇرىندەگى ناقتى جوسپار ازىرلەندى.
بۇگىنگى كۇنى ۆەدومستۆوارالىق كوميسسيانىڭ اعىمداعى باقىلاۋىندا بۇرىن پروبلەمالى بولىپ تانىلعان 22 نىسان تۇر. بۇل كوميسسيانىڭ ارالاسۋىمەن تۇرعىن ءۇي-قۇرىلىس كووپەراتيۆتەرىن قۇرۋ, نىسانداردى جوبالاۋ, قۇرىلىسىن جالعاستىرۋ سياقتى مەحانيزمدەر ازىرلەنىپ, ۇلەسكەرلەر قازىر قۇرىلىستى اياقتاۋمەن وزدەرى اينالىسىپ جاتىر. سونىڭ ناتيجەسىندە 22 نىساننىڭ 10-ىنا ۇلەسكەرلەر قونىستانىپ ۇلگەردى.
اكىم بارعان «گارانت», «كومفورت de Luxe» تۇرعىن ءۇي كەشەندەرى – «ازبۋكا جيليا» كومپانيالار توبىنىڭ پروبلەمالى نىساندارى. وسى جىلدىڭ باسىنان قۇرىلىس جۇمىستارىن «ەلوردا قۇرىلىس كومپانياسى» جشس ءوز قولىنا الدى. مەردىگەر مەملەكەتتىك ساتىپ الۋ كونكۋرسىنىڭ ناتيجەسىندە انىقتالىپ, اتالمىش تۇرعىن ءۇي كەشەندەرىن سالۋ ءىسى جانداندى.
«گارانت» تۇرعىن ءۇي كەشەنى ى.دۇكەنۇلى, ا.پانفيلوۆ, ش.ءۋاليحانوۆ كوشەلەرىنىڭ قيىلىسىندا ورنالاسقان. ونىڭ جالپى اۋدانى – 17 602,80 شارشى مەتر. قۇرىلىسى 2011 جىلى باستالعان ءۇي 330 پاتەرگە ەسەپتەلگەن. قۇرىلىستى اياقتاۋ ءۇشىن 2016 جىلى نىسان «وردا ينجينيرينگ» جشس-عا وتكىزىلدى. ۇلەسكەرلەردىڭ جالپى سانى – 168 ادام. نىساندى 2020 جىلدىڭ ءساۋىر ايىندا پايدالانۋعا بەرۋ مەجەلەندى.
«كومفورت de Luxe» «شۇبار» تۇرعىن الابىنىڭ قالقامان جانە ناركەسكەن كوشەلەرىنىڭ قيىلىسىندا ورىن تەپكەن. جالپى اۋدانى – 15 734,50 شارشى مەتر. ونىڭ قۇرىلىسى 2012 جىلى باستالىپ, 216 پاتەرگە شاقتالعان. الايدا ۇلەسكەر سانى اسىپ كەتىپ, 227 ادامعا جەتكەن. اتالمىش نىساندى وسى جىلدىڭ جەلتوقسانىندا اياقتاۋ جوسپارلانىپ وتىر.
«كەز كەلگەن قۇرىلىستى جۇرگىزۋ وڭاي ءىس ەمەس. مۇندا بارلىق مەرزىمدەر ساقتالۋى ءتيىس. اسىعىستىققا سالىنىپ, قۇرىلىس ساپاسىن تومەندەتۋگە بولمايدى. قازاقتىڭ سوزىمەن ايتسام, قىرقىنا شىدادىڭىزدار, ەندى قىرىق بىرىنە دە شىداڭىزدار. قانشاما كۇتتىڭىزدەر, ەندى از عانا سابىرلىق ساقتاڭىزدار. قاراجات بار, ۇيلەرىڭىزدىڭ قۇرىلىسىن اياقتايمىز, ءوز پاتەرلەرىڭىزگە كىرەسىزدەر» دەدى ۇلەسكەرلەرمەن سويلەسكەن التاي كولگىنوۆ.
كەزدەسۋدىڭ قورىتىندىسىندا قالا باسشىسى اپتا سايىن پروبلەمالى كوپپاتەرلى تۇرعىن ۇيلەردىڭ ءبىر-ەكەۋىن ارالايتىنىن ايتتى. «جوسپارلى كەستە ءتۇزىلدى. قۇرىلىستىڭ اياقتالۋ پروتسەسىن جانە سوزىلىپ كەتكەن ۇلەسكەرلەر ماسەلەسىنىڭ تۇبەگەيلى شەشىمىن تابۋىن باقىلاۋدا ۇستايمىن» دەدى ەلوردا اكىمى.
