استانا قالاسى اكىمدىگىندە قالا اكىمىنىڭ ورىنباسارى ايدا بالاەۆانىڭ توراعالىق ەتۋىمەن الەۋمەتتىك ارىپتەستىك پەن الەۋمەتتىك جانە ەڭبەك قاتىناستارىن رەتتەۋ جونىندەگى قالالىق ۇشجاقتى كوميسسيانىڭ كەزەكتى وتىرىسى بولىپ ءوتتى.
وندا ەل پرەزيدەنتىنىڭ «قازاقستان-2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا جولداۋىندا ايقىندالعان مۇمكىندىگى شەكتەۋلى ازاماتتار مەن الەۋمەتتىك جاعىنان از قامتىلعان تۇرعىندارعا كوڭىل اۋدارۋ جانە باسقا دا الەۋمەتتىك ماسەلەلەر تالقىلاندى. سونىمەن قاتار كوميسسيانىڭ 2013 جىلعى جۇمىس قورىتىندىسى مەن 2014 جىلعى جۇمىس جوسپارى بەكىتىلدى.
جيىندا ا.بالاەۆا: «قۇرىلىس كومپانيالارىندا ءالى كۇنگە دەيىن كاسىپوداق ۇيىمى دەگەن اتىمەن جوق. سونىمەن قاتار, ادام قۇقىعىن بۇزۋشىلىق بيزنەس قۇرىلىمدارىندا دا كەزدەسەدى. وسىعان بايلانىستى كاسىپكەرلەر پالاتاسى مەن جۇمىسشىلار وداعىن ماسەلەنى بىرلەسىپ شەشۋگە شاقىرامىن» دەدى.
ۇشجاقتى كوميسسيا وتىرىسىندا, سونداي-اق,نەگىزگى ازىق-تۇلىك ونىمدەرىنە باعانىڭ جاساندى ءوسۋىن بولدىرماۋ جانە قر ەڭبەك كودەكسىنىڭ نورمالارى مەن ەرەجەلەرىن ورىنداۋ بارىسى ماسەلەلەرى تالقىلاندى.
تۇرعىنداردىڭ ءارتۇرلى الەۋمەتتىك ماسەلەلەرىن جەدەل شەشۋ جولىندا استانا قالالىق اكىمدىگى كوميسسيا وتىرىسىن ءجيى وتكىزىپ تۇرۋعا دايار. الەۋمەتتىك ماڭىزى بار ماسەلەلەر كوميسسيانىڭ 2014 جىلعى جۇمىس جوسپارىندا دا قارالادى.
نۇريسلام قۇسپانعالي
