جاڭا اۆتوبۋستار جولعا شىقتى
قاراشا ايىنىڭ سوڭىندا قوعامدىق كولىكتەردىڭ جۇمىسىنداعى كەمشىلىكتەر تۋرالى قالا تۇرعىندارى تاراپىنان كەلىپ تۇسكەن شاعىمداردىڭ كوپتىگىنە بايلانىستى ەلوردا اكىمى ادىلبەك جاقسىبەكوۆ جولاۋشىلارى كوپ باعىتتارعا 36 جاڭا اۆتوبۋس شىعارۋدى تاپسىرعان ەدى. سونىڭ ناتيجەسىندە كەشە استانادا № 9, 10 باعىتتارى بويىنشا قاتىنايتىن جاڭا اۆتوبۋستار كوپشىلىككە تانىستىرىلدى.
ەلوردا اكىمى ادىلبەك جاقسىبەكوۆ جاڭا اۆتوبۋستاردىڭ تەحنيكالىق سيپاتتامالارىمەن تانىسىپ, ولاردىڭ مۇمكىندىگى شەكتەۋلى جانداردى تاسىمالداۋعا ارنالعان ەدەندەرىنىڭ ءتومەندىگىمەن ەرەكشەلەنەتىنىنە كوز جەتكىزدى. پاندۋستى كولىكتەر كوپشىلىكتىڭ كوڭىلىنەن شىعارى ءسوزسىز.
اۆتوبۋستار اياقاستى اۋا رايىنىڭ قۇبىلۋىنا بەيىمدەلىپ جاسالعان. ياعني, تەرەزەلەرى 3 قابات شىنىدان تۇرادى. اۋا اينالىمىن رەتتەۋ جانە جىلىتۋ جۇيەلەرى ورناتىلىپ, ەدەندەرىنە ارنايى جابىن توسەلگەن. سونىمەن قاتار, جاڭا اۆتوبۋستاردا بەينەباقىلاۋ, WI-FI, ۆاليداتور جانە جولاۋشىلاردى اقپاراتتاندىرۋ جۇيەسى دە قاراستىرىلعان. ارقايسىسى شامامەن 270 مىڭ اقش دوللارىن قۇرايتىن,
زاماناۋي تەحنيكامەن جابدىقتالعان فرانتسيادان اكەلىنگەن 24 ورىندىق جاڭا كولىكتەردىڭ ىشىنە جەتپىسكە جۋىق جولاۋشى ەمىن-ەركىن سىيادى.
سونىمەن قاتار, جولاۋشىلاردىڭ قاۋىپسىزدىگىنە الاڭداعان قالا باسشىلارى مەن اۆتوپارك وكىلدەرى جۇرگىزۋشىلەر مەن كوندۋكتورلاردى ارنايى ورتالىقتا الدىن الا وقىتقان. الايدا, كەلەر جىلدىڭ ناۋرىزىنان باستاپ كوندۋكتورلاردىڭ ورنىن ولاردىڭ ەلەكتروندى نۇسقاسى الماستىرماقشى. جولاقىسى 90 تەڭگە كۇيىندە قالادى. ەندى 28 جانە 42 باعىتتارىنا قاتىنايتىن تاعى 80 اۆتوبۋس جىل سوڭىنا دەيىن پايدالانۋعا بەرىلەدى دەپ كۇتىلۋدە.
استانادا كۇن سايىن شامامەن 720 مىڭ جولاۋشى قوعامدىق كولىك قىزمەتىن پايدالانادى ەكەن. الداعى ۋاقىتتا تاسىمالداۋشىلار جولاۋشىلار اعىنىن
الدە دە ۇلعايتپاق نيەتتە. بۇل جۇمىستىڭ باستى كومپونەنتتەرىنىڭ ءبىرى اۆتوبۋستار پاركىن جاڭارتۋ جانە ۇلعايتۋ بولماق.
نۇريسلام قۇسپانعالي