استانا اكىمى ادىلبەك جاقسىبەكوۆتىڭ قالالىق ءماسليحات سەسسياسىندا سويلەگەن ءسوزى

قۇرمەتتى دەپۋتاتتار!

استانا قالاسىنىڭ الەۋمەتتىك-ەكونوميكالىق جانە قوعامدىق-ساياسي جاعدايى تۇراقتى دامۋ ۇستىندە.

وزدەرىڭىز بىلەسىزدەر, ەلباسىمىز استانا قالاسىن ارقاشان نازارىندا ۇستاپ كەلەدى. ەلوردامىزدى دامىتۋ – بارلىعىمىزعا ورتاق مىندەت. بۇگىنگى ءبىر اۋىزدان قابىلدانعان شەشىم وعان كۋا. الداعى ۋاقىتتا دا بىرىگە جۇمىس اتقارامىز دەپ ويلايمىن جانە سەنەمىن.

قادىرلى دەپۋتاتتار!

بۇگىن ماڭىزدى قارجىلىق قۇجات – قالا بيۋدجەتى قابىلداندى.

سىزدەردى بيلىكتىڭ زاڭ شىعارۋ ورگانىنىڭ وكىلدەرىن بۇل شەشىممەن قۇتتىقتاعىم كەلەدى.

وسىمەن 2015 جىلعى قىزمەتتىڭ نەگىزى قالاندى. كەيىننەن رەفورمالار بارىسىندا ول تولىقتىرىلۋى, قاجەت بولسا, بيۋدجەتتىك ساياساتتىڭ باعىتتارى بويىنشا تۇزەتىلۋى مۇمكىن.

اعىمداعى جىل استانا ءۇشىن قولايلى بولدى. ەلوردامىز ءوزىن-ءوزى قامتۋ دەڭگەيىنە شىقتى. دامۋدىڭ بارلىق نەگىزگى دامۋ باعىتتارى بويىنشا جوعارى ەكونوميكالىق كورسەتكىشتەر بايقالادى.

2014 جىلعى 10 ايدىڭ ىشىندە ونەركاسىپتىك ءونىم كولەمى 228,6 ملرد تەڭگەنى قۇرادى.

نەگىزگى كاپيتالعا 472,2 ملرد تەڭگە تارتىلدى, ءوسىم 12,7%-دى قۇرادى.

قۇرىلىس جۇمىستارىنىڭ كولەمى 31,5%-عا ۇلعايدى. 903,6 مىڭ شارشى مەتر تۇرعىن ءۇي پايدالانۋعا بەرىلدى, 2013 جىلدىڭ سايكەس مەرزىمىمەن سالىستىرعاندا ءوسىم 4,5%-دى قۇرادى.

ورتاشا ايلىق كورسەتكىشى 11,3%-عا ارتىپ, 168,5 مىڭ تەڭگەگە جەتتى.

2011-2013 جىلدار ارالىعىندا جالپى وڭىرلىك ءونىم يندەكسى بويىنشا جىل سايىن ورتا ەسەپپەن 11% تۇراقتى ءوسۋ قارقىنى بايقالۋدا, بۇل رەسپۋبليكالىق دەڭگەيدەن ايتارلىقتاي جوعارى (ورتا ەسەپپەن – 106 %).

بۇل – قىسقاشا ستاتيستيكالىق مالىمەت. بىراق وعان قاراپ, مەملەكەت باسشىسىنىڭ جىل سايىنعى جولداۋلارىندا تاپسىرعان جۇمىستاردىڭ ورىندالۋىنىڭ ناتيجەسىن كورۋگە بولادى.

كوپتەگەن ساراپشىلاردىڭ پىكىرىنشە, الداعى جىلدارى داعدارىستىڭ ءورشي تۇسەتىنىنە قاراماستان, نۇرسۇلتان ءابىشۇلى ءوزىنىڭ «نۇرلى جول» جولداۋىندا جاڭا ەكونوميكالىق ساياساتتى جانە ەلىمىزدىڭ دامۋىنىڭ نەگىزگى باعدارىن انىقتادى.

ەلباسى جاريا ەتكەن جوبالاردىڭ ەلىمىزگە داعدارىستى ەڭسەرۋگە, سونداي-اق, يننوۆاتسيالىق جانە تەحنولوگيالىق بولاشاققا سەرپىندى قادام جاساۋعا مۇمكىندىك بەرەتىنىنە سەنىمدىمىن.

قۇرمەتتى دەپۋتاتتار!

مەملەكەت باسشىسىنىڭ ەلوردامىزدىڭ دامۋىنا باسا نازار اۋداراتىنىن بىلەسىزدەر. كوپتەگەن ينۆەستيتسيالىق جوبالار جۇزەگە اسىرىلىپ جاتىر.

2015 جىلى 200 استام جوبانى ىسكە اسىرۋعا مەملەكەتتىك بيۋدجەتتەن 170 ملرد تەڭگەدەن ارتىق قارجى قاراستىرىلدى.

استانا رەسپۋبليكالىق كولەمدەگى شارالاردى وتكىزۋگە بەلسەندى قاتىسادى. كەلەر جىلى مەرەيتويلار كوپ بولادى. اتاپ ايتقاندا, قازاقستان رەسپۋبليكاسى كونستيتۋتسياسىنىڭ 20 جىلدىعى, قازاق مەملەكەتتىلىگىنىڭ 550 جىلدىعى, قازاقستان حالقى اسسامبلەياسىنىڭ 20 جىلدىعى جانە ت.ب.

وسىعان وراي ءماسليحات دەپۋتاتتارى مەن قالا اكىمدىگى بارلىق شارالارعا جانە جوبالاردى جۇزەگە اسىرۋعا بەلسەندى قاتىسۋى كەرەك.

جاقىندا «استانانىڭ ەرەكشە مارتەبەسى تۋرالى» زاڭعا ءماسليحات پەن اكىمدىككە قوسىمشا وكىلەتتىكتەر بەرۋ تۋرالى تۇزەتۋلەر ەنگىزۋ باستاماسىن كوتەردىك.

مەملەكەت باسشىسى بۇل باستامانى قولدادى. بۇل وزگەرىستەر ءماسليحات دەپۋتاتتارىنىڭ ءرولىن كۇشەيتۋگە, باقىلاۋ ساپاسىن ارتتىرۋعا, جەرگىلىكتى دەڭگەيدە قارجىلىق ءتارتىپتى جاقسارتۋعا, ەلوردانىڭ دامۋى ءۇشىن ماڭىزدى شەشىمدەر قابىلداۋعا مۇمكىندىك بەرەدى.

قۇرمەتتى دەپۋتاتتار!

الدا ەكونوميكالىق ساياساتتىڭ جاڭا پرين­تسيپتەرىنە ءوتۋ مىندەتى قويىلدى. سونىمەن قاتار, الەۋمەتتىك كەپىلدەمەلەر مەن مىندەتتەمەلەردىڭ ەڭ تومەن ستاندارتتارىن تولىق كولەمدە قامتاماسىز ەتۋگە مىندەتتىمىز.

ايتا كەتەيىن, الداعى جىلى قىزۋ جۇمىس جۇرگىزىلەدى.

ءبىرىنشى, بىزگە بيۋدجەت شىعىندارىن بارىنشا ازايتۋ جانە ونىڭ شىعىس بولىگىن ءتيىمدى پايدالانۋ بويىنشا شارالار قولدانۋ كەرەك.

مەنىڭشە, باعدارلامالاردىڭ اكىمشىلەرىنە بيۋدجەتتى ورىنداۋ جانە قاجەتتى شارالاردى ۋاقىتىلى قابىلداۋ بويىنشا جەكە جاۋاپ­كەرشىلىك جۇكتەلۋى ءتيىس.

بارلىق پايدالانىلاتىن بيۋدجەت قارجىسىن العا قويىلعان ماقساتتار مەن مىندەتتەردى شەشۋگە باعىتتاۋ كەرەك, ولار ناقتى ناتيجەلەرگە اكەلۋى ءتيىس.

بيۋدجەت قارجىسىن جوسپارلاۋدى جانە جۇمساۋدى, ەسەپكە الۋ مەن ەسەپتىلىكتىڭ شىنايى جانە دۇرىس جۇرگىزىلەتىنىن باقىلاۋ دەپۋتاتتىق كورپۋسقا بايلانىستى دەپ ويلايمىن. جەرگىلىكتى مەملەكەتتىك ورگانداردىڭ ستراتەگيالىق جوسپارلارىن جانە بيۋدجەتتىك باعدارلامالاردى جۇزەگە اسىرۋدى ءتيىمدى باقىلاۋ جونىندەگى تۇراقتى كوميسسيالاردىڭ جۇمىسىن كۇشەيتۋ كەرەك.

ەكىنشى. ەلوردامىزعا «ەكسپو-2017» حالىقارالىق مامانداندىرىلعان كورمەسىن وتكىزۋ بويىنشا ەرەكشە جاۋاپكەرشىلىك جۇك­تەلدى. الدىن الا بولجامدارعا سايكەس, كور­مەگە 5 ملن جۋىق ادام كەلەدى.

ءبىز ءۇشىن كولىك ينفراقۇرىلىمى ماسەلەلەرى ماڭىزدى, سونىڭ ىشىندە قابانباي باتىر داڭ­عىلىن مودەرنيزاتسيالاۋ, استانا اۋەجايىندا ۇشىپ-قونۋ الاڭىنىڭ جاڭا تەرمينالىن, جاڭا تەمىرجول ۆوكزالىن سالۋ مىندەتى تۇر.

جەو-1, جەو-2 قالپىنا كەلتىرۋ جانە جەو-3 قۇرىلىسى دا ايرىقشا ماڭىزعا يە.

حالىقارالىق دەڭگەيدەگى شارالاردى وتكى­زۋگە ەكى جىلدان ارتىق ۋاقىت قالدى. بەلسەندى جۇمىس ىستەۋ كەرەك.

ءۇشىنشى. قالانى دامىتۋدىڭ نەگىزگى باعىت­تارىنىڭ ءبىرى – «اقىلدى قالا» جوباسىن جۇزەگە اسىرۋ. ول ەلوردانىڭ تىنىس-تىرشىلىگىنىڭ كوپتەگەن سالالارىن قامتيدى. اتاپ ايتقاندا, «زياتكەرلىك كولىك جۇيەسى», «برت», «كەشەندى تىرشىلىك ارەكەتىن قام­تاماسىز ەتۋ جۇيەسى» جانە ت.ب. جوبالار. بۇل ماسەلەنى باقىلاۋدا ۇستاۋ قاجەت. جوبانى جۇزەگە اسىرۋ قالاعا دا, تۇرعىندارعا دا بارىنشا پايداسىن تيگىزۋى كەرەك.

ءتورتىنشى. الەۋمەتتىك سالاداعى ماسەلەلەردى شەشۋ.

دەنساۋلىق ساقتاۋ سالاسىندا اۋرۋلاردىڭ الدىن الۋعا جانە بولدىرماۋعا, العاشقى مەديتسينالىق كومەك كورسەتۋ مەن ەمحانا قىزمەتتەرىنىڭ ساپاسىن ارتتىرۋعا باسىمدىق بەرىلۋى كەرەك.

بۇگىن قالادا بەلگىلى ءبىر دارەجەدە بىلىكتى مەدي­تسينالىق كادرلاردىڭ جەتىسپەۋشىلىگى بايقالادى. دەنساۋلىق ساقتاۋ سالاسىنىڭ قىزمەتكەرلەرى ءۇشىن جەرگىلىكتى بيۋدجەتتەن الەۋمەتتىك توپتامانى كەڭەيتۋ, قىزمەتتىك جاتاقحانالار سالۋ مۇمكىندىگىن قاراستىرۋ قاجەت.

سونىمەن قاتار, مەديتسينالىق كوللەدجدىڭ جاڭا تيپتىك عيماراتىن سالۋ ماسەلەسىن قاراس­تىراتىن ۋاقىت كەلدى دەپ ويلايمىن.

ەلوردادا جۇمىسسىزدىق ماسەلەسى دە وزەكتى, اسىرەسە, جاستار اراسىندا. ولاردى جۇمىسقا ورنالاسۋعا ىنتالاندىرۋ شارالارى مەن جاڭا مۇمكىندىكتەرى جايلى ويلانۋ كەرەك.

ءبىلىم بەرۋ سالاسىندا مەملەكەتتىك تاپسىرىستى جانە بالاباقشالاردا اتا-انالار تولەم­دەرىنىڭ كولەمىن ۇلعايتۋدى قاراۋ
كەرەك. ءۇش جىلدىڭ ىشىندە بۇل كورسەتكىش وزگەرگەن جوق.

بۇل رەتتە بالالاردى تاماقتاندىرۋ قۇنىن وزگەرتۋ مۇمكىندىگىن دە قاراستىرۋ قاجەت. بۇگىندە بۇل كورسەتكىش 29 مىڭ تەڭگەنى قۇرايدى جانە ول 2012 جىلدان بەرى وزگەرمەگەن. ءبىز دەۆالۆاتسيانى, ازىق-تۇلىك باعالارىنىڭ كوتەرىلگەنىن, جىل سايىنعى ينفلياتسيانى ەسكەرمەيمىز. بۇل – قازاقستان بويىنشا ەڭ تومەنگى كورسەتكىش.

قوعامدىق كولىكپەن جول جۇرۋگە كەلسەك, قازىرگى كەزدە «وقۋشىلارعا ارنالعان قو­عام­دىق كولىكپەن جول ءجۇرۋ جەڭىلدىكتەرى تۋرالى» ءماسليحات شەشىمىنە سايكەس ءبىلىم مەكە­مەلەرىندە وقيتىن كوپبالالى وتباسىلاردان شىققان بالالارعا قوعامدىق كولىكپەن جول ءجۇرۋ كەزىندە جەڭىلدىكتەر جاسالادى.

جەڭىلدىكتى جول ءجۇرۋ قۇقىعىن بارلىق وقۋ­شىلارعا بەرگەن دۇرىس بولادى دەپ سانايمىن! ارينە, بىردەن ەمەس, كەزەڭ-كەزەڭمەن وسىعان دا كەلەمىز. مۇنى ەگجەي-تەگجەيلى تالداۋ كەرەك.

قۇرمەتتى دەپۋتاتتار!

بۇگىندە ءبىز ءۇشىن ەڭ باستىسى – بۇل وزەكتى ماسەلەلەردى شەشۋگە مۇددەلى بولۋ, بۇل ءوز كەزەگىندە, بارلىق قيىندىقتار مەن قاراما-قايشىلىقتارعا قاراماستان سوڭىندا قالامىز­دىڭ دامۋى ءۇشىن اسا قاجەتتى ماڭىزدى جانە قاجەتتى شەشىمدەر قابىلداۋ بولىپ تابىلادى.

ءبىز بار كۇش-جىگەرىمىزدى بىرىكتىرىپ, مەملەكەت باسشىسىنىڭ بارلىق تاپسىرمالارىن ورىنداپ, العا قويعان جاڭا مىندەتتەردى شەشەتىنىمىز ءسوزسىز.

استانا قالاسى ءماسليحاتىنىڭ دەپۋتاتتىق كورپۋسىن جەمىستى ءارى ساپالى جۇمىسى ءۇشىن شىن جۇرەكتەن العىس ايتامىن.

وسى جاعدايدى پايدالانا وتىرىپ, زالدا وتىرعانداردىڭ بارلىعىن الداعى قازاقستان رەسپۋبليكاسىنىڭ تاۋەلسىزدىگى كۇنىمەن قۇتتىقتايمىن.

نازارلارىڭىزعا راحمەت!