بيىل ەلوردامىزدا قۇرىلىسى ەندى بىتكەن ءتورت جاڭا مەكتەپ قولدانىسقا بەرىلدى. سونىڭ ءبىرى – №70 مەكتەپ-ليتسەيدىڭ ەڭ العاشقى قوڭىراۋىنا ەلباسى نۇرسۇلتان نازارباەۆ قاتىستى.
– مەملەكەت ساپالى ءبىلىم الۋ ءۇشىن جاعداي جاساۋعا ەرەكشە نازار اۋدارىپ كەلەدى. تاۋەلسىزدىگىمىزدىڭ 20 جىلى ىشىندە ءبىز جۇزەگە اسىرعان ىستەر دامۋىمىزدىڭ ىرگەتاسىنا اينالدى. اعىنعا قارسى ءجۇزىپ ۇيرەنىڭدەر, ءسال ايالدادىڭ با – تولقىن سەنى كەرى الا جونەلەدى. ۇنەمى اقىلىڭدى سەرىك ەتىپ, ءبىلىمىڭدى جەتىلدىرىپ, سپورتپەن شۇعىلدانىڭدار. دامۋ ءۇشىن ءبىلىم مەن سپورت سەندەردىڭ الدارىڭدا جاڭا مۇمكىندىكتەر اشادى, – دەدى نۇرسۇلتان نازارباەۆ سالتاناتتى اشىلۋ راسىمىندە سويلەگەن قۇتتىقتاۋ سوزىندە.
قازاقستان پرەزيدەنتى تەك بيىلدىڭ وزىندە ەلىمىزدە 146 جاڭا مەكتەپ ەسىگىن اشقانىن, ال 2015 جىلعا دەيىن 522 مەكتەپ سالىناتىنىن ايتتى.
– زاماناۋي جابدىقتارمەن جابدىقتالعان بۇل مەكتەپتە 1200 بالا ءبىلىم الادى. بۇگىندە استانادا 270-كە جۋىق ءبىلىم بەرۋ مەكەمەسى جۇمىس ىستەيدى. ەگەر وتكەن جىلى استانا مەكتەپتەرىندە ءبىرىنشى سىنىپتارعا 10 مىڭعا جۋىق بالا قابىلدانسا, ولاردىڭ قاتارى بيىل 12 مىڭنان استى. بۇل – ەلوردامىزدا حالىق سانىنىڭ قارقىندى وسكەنىنىڭ كورسەتكىشى. بۇل مەكتەپتە سپورتپەن شۇعىلدانۋ, رۋحاني جانە مادەني دامۋ ءۇشىن بارلىق جاعداي جاسالعان. وتكەن جىلى استانالىق وقۋشىلار حالىقارالىق وليمپيادالار مەن عىلىمي كونكۋرستاردان 23 التىن مەدال جەڭىپ الدى. ەندى وسى جوعارى دەڭگەيدى استانالىق وقۋشىلار دا, ۇستازدار دا ءوز بيىگىندە ۇستاپ تۇرۋعا ءتيىس, – دەپ ەلباسى ءبىلىم ايدىنىنداعى جەتىستىكتەر تۋرالى پىكىرىن شەگەلەپ ايتتى.
جاڭا ليتسەي ب.مومىشۇلى كوشەسى مەن تاۋەلسىزدىك داڭعىلىنىڭ قيىلىسىندا, وقۋشىلار سارايىنا ىرگەلەس ورنالاسقان. اتالمىش ليتسەي ءبىرىنشى سىنىپتان ءۇش ءتىلدى مەڭگەرتۋگە لايىقتالعان. نەگىزگى باعىتى جاراتىلىستانۋ-ماتەماتيكالىق ءبىلىم بەرۋ. جەتىنشى سىنىپتان جوعارى قاراي سىنىپتاردا وسى پاندەر اعىلشىن تىلىندە وتكىزىلەتىنى دە زور ماقتانىش بولماق. مەكتەپ-ليتسەيدىڭ جالپى اۋماعى – 10 مىڭ شارشى مەتر. ءبىرىنشى سىنىپ وقۋشىلارى ءۇشىن لوگيكا, شاحمات جانە توعىزقۇمالاقتان قوسىمشا ۇيىرمەلەر وتكىزۋ ءۇشىن ۇزارتىلعان كۇن توبىن ۇيىمداستىرۋ جوسپارلانعان. مۇندا 44 وقۋ كابينەتى, 360 ورىندىق اكت زالى, وقۋ زالى مەن كىتاپحانا, 356 شارشى مەترلىك اسحانا, اعاش, مەتالل ونىمدەرىمەن جۇمىس جاساۋ, ماتا وڭدەۋ, سونداي-اق اسپازدىق شەبەرحانالارى بار. اۋدانى 422 جانە 276 شارشى مەتر بولاتىن سپورت, گيمناستيكا زالدارى جاساقتالعان.
№70 مەكتەپ-ليتسەي ديرەكتورىنىڭ وقۋ ءىسى جونىندەگى ورىنباسارى جامالحان ىڭگەباەۆانىڭ ايتۋىنشا, قازىرگى كەزدە 70 مۇعالىم جۇمىسقا قابىلدانعان. ونىڭ 25 پايىزىن جوعارى وقۋ ورنىن جاڭادان تامامداعان جاس ماماندار مەن ماگيسترلەر قۇرايدى. سونداي-اق, وقۋشىلارعا ساپالى ءبىلىم, سانالى تاربيە بەرۋ ءۇشىن ءبىرىنشى جانە جوعارى ساناتتاعى ۇستازداردى قابىلداۋعا باسىمدىق كورسەتىلگەن.
«مەملەكەتتىڭ ىستەپ وتىرعان بارلىق شارۋاسى جاستاردى تاربيەلەپ ءوسىرىپ, 21 عاسىرعا ساي, ەڭ جوعارعى دەڭگەيدە ءبىلىم بەرۋ», – دەپ تۇيىندەدى مەملەكەت باسشىسى. سالتاناتتى راسىمگە ەرەكشە كوڭىل-كۇيمەن كەلگەن بۇلدىرشىندەر ەلباسى الدىندا ءان سالىپ, تاقپاق وقىپ, ونەرلەرىن ورتاعا سالدى. ۇستازدار مەن اتا-انالار دا العاشقى قوڭىراۋدىڭ ۇنىنە ەلتىپ, بەيبىت كۇننىڭ اشىق اسپانىنا ءتۇرلى-ءتۇستى شارلاردى ۇشىرعان بالالارىنا قاراپ قۋانىشقا كەنەلدى.
شىنار ءابىلدا
