ەرتەڭ ەلوردادا «جاس قانات-2015» رەسپۋبليكالىق بايقاۋى كەزەكتى رەت شىمىلدىعىن تۇرەدى. ءۇش كۇنگە سوزىلاتىن مۋزىكالىق دودا بارىسىندا 15 تالاپكەر ءانشى ونەر جارىستىرادى.
كەشە بايقاۋدى ۇيىمداستىرۋشىلار قاتىسۋشىلاردى قالىپتاسقان داستۇرگە ساي «استانا-بايتەرەك» مونۋمەنتىنىڭ ۇشار باسىنا جيناپ, جەرەبە تارتۋ ءراسىمىن وتكىزدى. سونىڭ ناتيجەسىندە قىزىلجارلىق ميراس بايانوۆ بايقاۋدىڭ العاشقى كەزەڭىندە ساحناعا ءبىرىنشى بولىپ شىعاتىنى, ال سەمەيلىك مەرحات قاناپيانوۆ وسى كەزەڭدى قورىتىندىلايتىنى انىقتالدى.
ايتا كەتەيىك, بۇل جولى بايقاۋعا ەلوردالىق بەس ورەن – سۇلتان احمەت, سۇلەيمەن ولجاس, نۇربول سىدىقوۆ, نۇرلان تۇكەنوۆ جانە ەركەبۇلان تۇرمۇحامبەتوۆ قاتىسىپ وتىر. باستاپقى جىلداردان بايقاۋ تىزگىنىن قولدان جىبەرمەي, ۇستاپ كەلە جاتقان مۇرات ەرعاليەۆتىڭ ايتۋىنشا, جالپى بيىل 80-نەن استام ءانشى قاتىسۋعا ءوتىنىم بەرىپتى. «ىرىكتەۋ كەزەڭىندە ءبىز 25 ادامدى تاڭدادىق. الايدا, بايقاۋ جۇگى كوتەرمەيتىن بولعاننان سوڭ, 15 ءانشىنى قالدىردىق. بىراق, ىرىكتەۋدەن وتە الماعاندار مويىماسىن. ولارعا كەلەسى جىلدارى قايتادان كەلىپ, باقتارى مەن باپتارىن سىناۋعا بولادى. ماسەلەن, قازىرگى دارىندى انشىلەردىڭ قاتارىنان ويىپ تۇرىپ ءوز ورنىن العان ديماش قۇدايبەرگەن بايقاۋعا قاتىسۋعا ءۇش مارتە ءوتىنىم بەردى. العاشقى ەكى رەتتە شيكىلىگىن بايقاپ, قاتىسۋشىلاردىڭ اراسىنا قوسپادىق. ءۇشىنشى رەت كەلگەندە عانا جولداما بەردىك» دەيدى ۇيىمداستىرۋشى.
بيىلعى بايقاۋعا قاتىسۋشىلاردىڭ قاتارىندا قىزدارعا قاراعاندا جىگىتتەردىڭ سانى كوپ. ءۇش قىز عانا – قاراعاندىلىق لاۋرا ايتباەۆا, شىمكەنتتىك ايگەرىم ءتاجي جانە تالدىقورعاندىق گۇلنۇر راحيموۆا ىرىكتەۋدەن ءوتىپتى. وسىلاردىڭ ىشىندە لاۋرانى سوزگە تارتتىق. «كۇندە كەشكىسىن بارلىعىمىز دايىندىق جاسايمىز. ۇيىمداستىرۋشىلار ءان ايتۋ مانەرىمىزدى, ساحناداعى ءجۇرىس-تۇرىسىمىزدى قاتتى قاداعالاۋدا. جالپى, انشىلەردى قارسى الۋ مەن دايىندىقتى ۇيىمداستىرۋ جاعىنان ءمىن جوق. سول ءۇشىن بايقاۋعا جاۋاپتىلارعا ءوز تاراپىمنان راحمەت ايتقىم كەلەدى. جىل سايىن تالاي انشىگە ۇلكەن ونەرگە جولداما بەرەتىن «جاس قانات» ۇزبەي كورۋگە تىرىسامىن. وسى بايقاۋعا قاتىسۋ ارمانىم بولاتىن. مىنە, سول ارمانىم ەدى.
بايقاۋ بەيبىتشىلىك جانە كەلىسىم سارايىندا اشىلادى. ءبىرىنشى كەزەڭنەن سۇرىنبەي وتكەن انشىلەر جارتىلاي فينالعا جولداما الىپ, باس بايگە – «التىن قاناتقا» ءبىر تابان جاقىندايدى.
امانعالي قالجانوۆ
