نۇر-سۇلتان قالاسىندا ستۋدەنتتەردەن قۇرالعان قۇرىلىس جانە «جاسىل ەل» ەڭبەك جاساقتارىنىڭ XV ەڭبەك ماۋسىمى اشىلدى.
نۇر-سۇلتان قالاسى قوعامدىق دامۋ ىستەرى باسقارماسى بيىل جاستاردى جۇمىسپەن قامتۋ ءۇشىن 10-نان اسا ۇيىممەن كەلىسىم جاساسقان. ولاردىڭ قاتارىندا «استانا ورمانى», «استانا كوگالداندىرۋ قۇرىلىس» جشس جانە بىرقاتار قۇرىلىس كومپانيالارى مەن ءبىلىم بەرۋ ورىندارى بار.
«جاسىل ەل» باعدارلاماسى رەسپۋبليكامىزدا 2005 جىلدان باستاپ جاستاردى جۇمىسپەن قامتۋ ىسىمەن اينالىسىپ كەلەدى. وسى رەتتە استانالىق «جاسىل ەل» شتابى 14 جاستان 29 جاس ارالىعىنداعى ازاماتتاردى جۇمىسقا شاقىرىپ, ولاردىڭ ەكونوميكالىق تابىس تابۋىنا مۇمكىندىك جاساپ قانا قويماي, ەڭبەككە باۋلىپ, قورشاعان ورتانى جاسىلداندىرۋ جۇمىسىنا تارتىپ كەلەدى. ماسەلەن, وتكەن جىلى 1120 ادام جۇمىسپەن قامتىلعان.
– بيىل باعدارلاما بويىنشا ەلورداعا 975 كۆوتا بولىنگەن. ولاردىڭ قاتارىندا كوپبالالى جانە تۇرمىس دەڭگەيى تومەن وتباسىلاردىڭ بالالارى, سونداي-اق يۋۆەنالدى پوليتسيانىڭ ەسەبىندە تۇرعان 14 جاسقا تولعان جاسوسپىرىمدەردى جۇمىسپەن قامتۋ قاراستىرىلعان, – دەيدى نۇر-سۇلتان قالاسى قوعامدىق دامۋ ىستەرى باسقارماسىنىڭ جاستارمەن جۇمىس ءبولىمىنىڭ جەتەكشىسى باقىتجان جۇنىسبەكوۆ.
