كەشە استانا قالاسىنىڭ ادىلەت دەپارتامەنتىندە جەمقورلىقتىڭ الدىن الۋ ماسەلەلەرى جونىندەگى سەمينار ءوتتى. وعان ەلورداداعى قۇزىرلى ورگان وكىلدەرى قاتىسىپ, اتالمىش پروبلەماعا جول اشاتىن جايتتاردى تالقىلادى.
مەملەكەتتىك قىزمەت ىستەرى مينيسترلىگىنە قاراستى دەپارتامەنتتىڭ باس مامانى اسقار ءراحماتۋلليننىڭ ايتۋىنشا, كوررۋپتسيامەن كۇرەستە ءبىز وزگە مەملەكەتتەردىڭ تاجىريبەسىنە سۇيەنۋىمىز كەرەك.
– كورشىلەس رەسەيدە ساراپشىلار جەمقورلىق سەبەپتەرىنە تالداۋ جاساعاندا بىرنەشە قۇبىلىستاردى انىقتاعان. ماسەلەن, ازاماتتىڭ جەمقورلىققا توسقاۋىل قوياتىن زاڭداردان حابارسىز بولۋى, تۇراقسىز ساياسي احۋال, مەملەكەتتىك قىزمەتكەرلەردىڭ كاسىبي تۇرعىدان ساۋاتسىزدىعى, تامىر-تانىستىق پەن ساياسي جاقتاۋشىلىق, مەملەكەتتىك بيلىك جۇيەسىندە اۋىزبىرشىلىكتىڭ جوقتىعى, مەملەكەتتىك سەكتورداعى جالاقىنىڭ ازدىعى سەكىلدى قۇبىلىستار جوعارىداعىداي قۇقىق بۇزۋشىلىققا الىپ كەلەدى ەكەن. سوڭعى كەدەرگىنى قازاقستاندىق ۇكىمەت تە ماقۇلداپ, جەمقورلىققا قارسى ستراتەگياعا ەنگىزگەن-ءدى. مۇنىمەن قوسا, كەلەر جىلدىڭ 1 قاڭتارىنان باستاپ بۇقارانى جالپىلاما ماعلۇمداۋ جۇمىسى جۇرگىزىلەدى. ناتيجەسىندە حالىقتىڭ بارلىق كىرىستەرى مەن شىعىستارى ناقتى بەلگىلى بولادى, – دەدى دەپارتامەنت مامانى.
ال استانا قالاسى بويىنشا جەمقورلىقپەن كۇرەس جونىندەگى ۇلتتىق بيۋرو دەپارتامەنتى شتابىنىڭ اعا وفيتسەرى ايگۇل سامەنقۇلوۆا جەمقورلىقتىڭ الدىن الۋعا باعىتتالعان زاڭنامالارعا توقتالدى. ول بيىل قابىلدانعان جاڭا زاڭدار, ونىڭ ىشىندە, «جەمقورلىققا قارسى كۇرەس» پەن «مەملەكەتتىك قىزمەت كورسەتۋلەر» تۋرالى زاڭداردى, «مەملەكەتتىك قىزمەتشىلەردىڭ ەتيكالىق كودەكسىن» جۇرتشىلىققا تولىققاندى تانىستىرىپ, قىلمىستىق كودەكستەگى وزگەرىستەردى حابارلادى.
ءوز كەزەگىندە وسى دەپارتامەنتتىڭ اكىمشىلىك-قۇقىق ءبولىمىنىڭ مامانى اينۇر قاسەنوۆا جەمقورلىقپەن كۇرەس جونىندەگى ۇلتتىق بيۋرونىڭ قۇرىلىمى مەن قىزمەتىن ءتۇسىندىردى.
بوتاگوز ماراتقىزى
